تحدي ال 100 يوم لأكثر من 100 كيلو
كفــــــــــــــــــــــــــــايه
دي الكلمه اللي دايما بقولها لنفسي بعد ما أكل اكله كبيره و انا عارفه انها بتخن بس الضمير ده مش عارفه ليه مبيطلعش قبل ما افتح بقي و مش بس هنا
كفـــــايه:
- عدم ثقه بالنفس.
- اللامبالاه و انا عارفه ان الناس شايفني تخينه و بقول اعمل ايه يعني.
- اللامبالااه تاني لما يعجبني اللبس في المحلات و معاكي فلوس في شنطتك و بردو مش عارفه تشتريه.
- اختيار اذواق في اللبس مختلفه عنك و بقول عجباني اوي مع انها مش عجباني اوي بس ده اللي جه مقاسي.
- حتى في الجواز لما يتقدملك واحد و مش مرتحاله أهلك يقلولك فكري كويس و هما في عنيهم فكري يابنتي .. انتي مش كل يوم هيجيلك واحد كده.
- كسل و فرجه على التليفزيون و تشوفي دي رفيعه ازاي و دي حلوه ازاي و انا زي ما أنا
- الإحساس اني مش أنا و أكني مسجونه جوا بني آدمه تانيه بشكل تاني.
- الخوف من التصوير و كل محد يصورني اقول لأ مبحبش أتصور خالص.
- حتى في الخروج اتكسف اخرج في أمكان مفتوحه او فيها جري و تنطيط عشان الناس متضحكش عليا و يا سلام لما أصحابك يقلولك رايحين نركب خيل تقولي لأ انا بخاف أوي مع اني ولا بخاف و لا حاجه بس صعبان عليا الحصان ده لو رضي هو أساسا.
- عدم إهتمام بنفسك.
و ده أهم حاجه الاهتمام بالنفس أو حبي نفسك و مع اني الاول كنت بقول لأ اللي بيحب نفسه يبقى أناني بس كذا مره ربنا يخليني أقراه حاجات بالصدفه كلها بتقول أذا لم تكن قادراً على حب نفسك فلن تستطع حب الغير.
عشان كده هتعلم أحب نفسي مثلا لما بنحب حد و يبقى عيان بمرض مزمن مش ممكن نعمل اي حاجه عشان نساعده و نشوفه رجع زي مكان و مرضه راح ده ان شاء الله اللي هعمله لنفسي ، مش هقول تاني أنا عاوزه أخس لو قدرت أخس 10 أو 15 كيلو يبقى كويس لأ لأ لأ أنا مش هعيش في الجسم ده علطول أنا مثلا زايده 40 كيلو عن وزني عشان كده هقول أنا لازم أخس 40 كيلو أن شاء الله
اللي عاوزه تبدأ فيكو معايا رحلة ال100 يوم أهلا بيها طبعاُ مع أي نظام تحبه المهم تحلف قدام ربنا و نفسها انها ال100 يوم دول هتلتزم بجد و من غير تهريج و لو ضعفت أو بوظت زي ما بنعمل ساعات في الدايتس بتاعتنا يبقى لازم تتحمل العقاب اللي هتتفق عليه المجموعه و اللي هيكون في الغالب لمصلحتها زي مثلا نطلب منها تمشي نص ساعه زياده او تلعب تمرين معين أو تفوت العشا كده يعني.
ال100 حتى يوم 19\6 بإذن الله و أكتر واحده هتخس في الفتره دي مع الالتزام ليها هدية مني و دي بجد
ده الجزء السادس يا بنات لموضوعنا و بالنسبة للجزء الأول و الجزء الثاني و الجزء الثالث والجزء الرابعو الجزءالخامسيلا يا بنات شدو حيلكو ميعاد الميزان القادم يوم 8\5\2009 عاوزين نجاح كلنا نرضى عنه الاسبوع ده عشان نشجع بعض أكتر و أنا فرحانه جداً من الناس اللي خسو
دي كانت بداية موضوعي و الحمد لله جسمي تحول من 110.5 كيلو الى 100.5 كيلو و مكملين في مشوارنا انا و البنات لحياه صحية اكتر و جسم و شكل احسن
كتبت بواسطة جورية عمري
الروابط المفضلة