ღ تجربة متميزة ღ كورس مكثف للشعر ............... مين معايا وبالصور كمان
السلام عليكم
طبعا انا هدخل ف الموضوع علطول
كلنا بنحلم ان شعرنا يبقى احسن
ويطول ويبطل تساقط
وطبعا الشعر ده تاج المرأه فعلا
لاحظوا كده اى بنت شعرها حلة وطويل بتبقى جذابه
حتى لو هى مش حلوة اووى
طبعا القسم مليان وصفات والنت عموما منها الحلو
ومنها الوحش
وانا فعلا جربت حاجات كتير ومنتجات اكتر
انواع زيوت وكريمات
واعشاب وخلطات
سيروم شامبو
يعنى بصراحه كل ما اسمع عن وصفه
اجربها بس الوصفات الى بحس انها كويسه
عموما الوصفات الى هقولكم عليها ده
انا جربت حاجات منها لوحدها لفتره
وكانت تحفه بجد
وبعدين ضفت عليها اشياء تانيه لما سمعت عنها وعرفت
انها حلوة والكل بيشكر فيها
علشان يبقى زى كورس متكامل
وتغذيه مضاعفه
والغرض من الكورس بتاعى
ا- توقف تساقط الشعر
2- منع التقصف والهيشان
3- لمعان الشعر
4- وده الحلم الى الكل بيحلم بيه طول الشعر
5- كثافه الشعر وتقله
وحابه اقولكم ان بأذن الله مفيش مستحيل
بس اهم حاجه المواظبه والاستمرار
علشان الكلام ده مش سحر
والشعر له دورة حياه
علشان تقدرى تشوفى الفرق وتحسييه
لازم الاستمرار والصبر
انا الحمد لله شعرى طويل بس له عيوب
اهمها انه فى فترات بيبقى كويس وفى فترات بيتساقط
فترات بيبقى طرى وفترات بيبقى ناشف
فانا قصدى من الكورس ده طبعا انه يتقل ويطول زياده
ويمنع تساقطه ويبقى طرى وبيلمع
وان شاء الله هوصل للى انا عاوزاة
واتمنى انكم تستمروا معايا
وكل واحده تحقق مطلبها
نبدأ دلوقتى
اولا الشامبو الى هتغسلى بيه
انا مش هفرض نوع شامبو اى نوع بترتاحى معاه
هتجبييه وتحطى عليه كيس جيلى بودره
وتقلبييه كويس
والوصفه ده حلوة اووى للشعر فى اللمعان
ومنع التساقط لان الجيلى عباره عن جيلاتين
والجيلاتين ده الى بيستخرج من عظام
البقر يعنى عامل زى النخاغ فى فوايده
تانى حاجه دهان الشعر
وعندك حاجتين وهما الاحسن عن تجربه
الاول غالى شويه بس بيبقعد حوالى سنه
يعنى لو حسبتيها هتلاقييه بيوفر
سيروم زيرو فريز تحفه لشعر
وده صورته وهو بحوالى من 45 جنيه الى 50 مش اكتر
والتانى كريم حلو اووى ورخيص وبجد
احلى من اى نوع غالى وهو مينك واكس
بتاع الشبراويشى بحوالى 6 جنيه
وفى منه انواع انا استخدمت الى بالجرجير
كده يبقى خلصنا الغسيل والدهان
نيجى بقى للكورس بتاعنا
هنجيب الزيوت التاليه من عند اى عطار ماركه الحواج او الكابتن
1- زيت الخروع
وده طبعا معروف فوايد للتساقط الشعر وتطويله ومنع التساقط
2- زيت السمسم
وبرده ليه عامل جامد اووى فى تنعيم الشعر وتطويله
3- زيت الثوم
وده بقى الساحر للشعر طول وكثافه ومنع تساقط بشكل رهيب
4 زيت الخردل
معروف انه بيجرى الدورة الدمويه كويس وبالتالى بيوصل الغذاء المناسب لفروة الراس
وبيساعد فى تطويل الشعر
5 زيت الحلبه
برده بيساعد فى تطويل الشعر ومنع تساقطه
وعلى فكره اسعار الزيوت ده تتراوح بين 3 جنيه الى 7 جنيه اغلى زيت
زيت الثوم
اللسيون رووووووتاج
وده ب20 جنيه
وكمان السحر للشعر وسنه عن الرسول عليه الصلاه والسلام
السدر وده بيبقى اعشاب وانتى بتطحنيها بتبقى زى الحنه
نييجى بقى للطريقه
الاول هنخلط الزيوت كلها مع بعض ونضيف عليهم قدهم
من لسيون رووتاج يعنى نعاير
من اى زجاجه بتاعه الزيت علشان يبقى
نفس الكميه ونرجها كويس
وهيبقى عندنا بقيه اللسيون لوحدها
اما السدر بقى هنعمل منه برده
لسيون
هنغلى مايه حوالى كوب كبير
ونضيف عليها معلقتين كبار سدر
ونسيبهم منقوعين من الليل للصبح
والصبح يتصفى ويحفظ بالتلاجه
ونكرر العمليه بعد ما يخلص
نييجى بقى للاستعمال
طبعا هنحدد يومين فى الاسبوع
حسب ما تحبى
لو مثلا جوزك بيتاخر برده
يبقى حطييه خلطه الزيوت
الصبح علشان محدش يقول
الريحه وكده
وقبل ما ييجى اغسلى شعرك
حطى خلطه الزيت مع اللسيون الى عملناهم على جدور الشعر
بس ودلكى كويس الشعر
وحطى بونييه بلاستيك
لمده 4 او 5 ساعات حسب وقتك
او البنات الى مش متزوجه
تحطها بالليل وتغسل الصبح
وبعدين اغسلى شعرك بالشامبو مع
الجيلى وادهنى بنقطه سيروم
مع كريم منك واكس
وكل يوم
هنعمل الاتى
يوم هنحط لوسيون روتاج قبل النوم
ويوم هنحط لوسيون السدر الى عملناهم
واستمروا كده
مرتين فى الاسبوع
حمام الزيت
وكل يوم مره لوسيون السدرومره
روووتاج
وان شاء الله هتلاحظوا
الفرق مع اول اسبوع
بالنسبه للتساقط والنعومه
ومع اول شهر بالنسبه للطول
وباليييييييز يا رب يا بنات يعجبكم الموضوع
وعلى فكره ده موضوعى
ومجهودى وخلاصه تجارب كتير اووى
وانا منزلاه فى عده منتديات بس باسماء تانيه
وعاوزيين نشجع بعض ونستمى عليه مع بعض
ولو عجبكم الموضوع او استفدتم منه قيمموه
وادعولى ربنا يرزقنى بالذريه الصالحه
والسلام عليكم
رد مع الاستدلال
الروابط المفضلة