السلام عليكم
كل سنه وكلو طيبين
ويارب تكونو كلكو بالف خير
النهاردة جايبة لعيونكم موضوع مهم لكل بنت وكل ست حابة انها تفرد شعرها
هعرض الموضوع بطريقة بسيطة علشان نقدر نفهم كلنا
موضوعى عبارة عن فرد تشى واهم الاسئلة اللى ممكن تدور حواليه
كتير اوى بنات بيتصلوا بيا عايزين يفردو شعرهم وبيبقا معندهمش معلومات كافية عنه وانا جيت النهرده اجاوب على كل الاسئلة اللى دايما بتتسألى

____________________________
انا حامل ومش عارفة اذا كان الفرد مضر عليا ولا لا ؟
حبيبتى بمنتهى الامانه فرد تشى مفهوش الحمد لله ضرر على الحمل خالص ولو حابة تتاكدى وتطمنى اكتر خدى العبوة بتاعة الفرد ووديها للدكتور بتاعك وخليه يشوف المكونات اللى داخلة فى الفرد علشان يتاكد بنفسه
ملحوظة لاحلى ****** ____ كلامى واجابتى نتيجة خبرة شغلى الى جانب انى انا نفسى عملاه فى شعرى ومش دعاية لمنتج لانى باختصار معنديش اى استعداد امدح حاجة يكون فيها اى ضرر لحد احنا فى شهر مفترج وايام مبروكة واكيد كل كلمة هنقولها ربنا هيحاسبنا عليها
عايزة افرد شعرى بس عايز اصبغ ياترى افرد الاول ولا اصبغ؟
فرد تشى اهم ميزة فيه انه مش بيتعارض خالص مع الصبغة يعنى تقدرى تصبغى بعدها على طول والافضل طبعا انك تفردى وبعدين تصبغى

ايه الفرق بين فرد تشى وفرد الكرياتين وياريت تقولي الفرق بمنتهى الامانه ؟
على فكرة ياقمرات السؤال بيتسالى كده بالظبط وهجاوب عليه بمنتهى الامانه ان شاء الله
مفيش اى علاقة تربط بين فرد تشى وفرد الكرياتين
ده نوع وده نوع تانى خالص
والموضوع باختصار ان فرد تشى بتحصلى منه على 3 حاجات
اولا فرد 100 % ان شاء الله
ثانيا نعومة كبيرة بفضل سائل الحرير
ثالثا علاج على مدى بعيد بفضل الكرياتين ميست اللى بيقوى الشعر وبيمنع سقوطه
اما الكرياتين فهو عباره عن ماده بتغلف الشعر بتكون علاج اكتر منها فرد
وطبعا نسبة فرده بتكون قليلة لان اللى بتختار الكرياتين بيكون هدفها علاج اكتر
بس طبعا الكرياتين مينفعش لا للحامل ولا للاطفال
واظن كل واحدة مننا تقدر تحدد هيا محتاجة ايه ياترى فرد اكتر ولا علاج
الى جانب ان الكرياتين لازم انك تجددى الشعر كله كل فترة
اما تشى فهتفردى الجزور بس لان الشعر اللى بيتفرد مش بيكسر تانى
ملحوظة رفيعة لاحلى ****** هههههههههه حلوة رفيعة دى ________ مش بمدح منتج على حساب منتج
ده شىء وده شىء تانى وده ليه مميزاته وده ليه مميزاته
ولازم اى واحدة عايزة تفرد تقرر الاول من جواها وتقرأ كتير عن المنتج اللى حابة تستخدمه وبعد تتوكل على الله وتفرد شعرها

مدام حنان انا فردت قبل كده بحنة الشين ( حنة الفرد ) وعايزة افرد شعرى بتشى ياترى هينفع ؟
اولا اول سؤال بساله ياترى الحنه معموله من اد ايه
تانى سؤال بساله ياترى تقدر تتخلص من الاطراف اللى فيها الحنه ولا لا
لو كانت اجابتها انها عامله الحنه من سنين بس الاطراف هيا اللى فيها الحنه وهيا مش عايزة تقصها علشان ميقصرش يبقا ساعاتها بشتغل على الجزء اللى معلهوش حنه علشان احافظ على شعرها لان حنه الفرد للاسف مبتسيبش الشعر الا لما الشعر بيطول وتبتدى كل شوية تقصى الاطراف زيها زى الصبغة بالظبط
مختصر الاجابة يعنى ان حنه الفرد مينفعش نحط عليها اى نوع فرد ولا صبغة
ملحوظة رفيعة تانية هههههههههه مش عايزاكو تزهقوا منى ________ برده ارجع واقول مش معنى كده انى بسىء للحنه بس بصراحة مش بنصح بيها نهائى لان للاسف اضرارها اكتر من محاسنها ومبيتخلصش الشعر منها بسهوله

مدام حنان انا عندى بنتى صغيرة وشعرها وحش جدا ونفسى افر د ليها بتشى ياترى ينفع ؟
بالنسبة للاطفال فطبعا مفيش مشكلة المهم بس نختار نوع الفرد المناسب ليهم
وانا بشتغل مع الاطفال من سن 8 سنين علشان بس البنت يكون عندها قدرة انها تستحمل تقعد فترة طويلة معايا
لان للاسف الفرد ده اصعب شىء فيه هو الوقت بتاعه وصعب اوى للاطفال اقل من 8 انهم يستحملو يقعدوا ساعات طويلة مباشر كده ورى بعض

انا اشتريت كويك سموث او جالى من بره وعايزة افرد بيه ياترى ينفع ؟
اولا كويك سموث ده منتج ضعيف بالنسبة لفرد الشعر من اهم مميزاته انه بيقلل الهيشان وبيفرد بس بنسبة ضعيفة ومش بيستخدم مع كل الشعور
لازم اللى تستخدمه تكون فتلة شعرها ناعمة ومش سميكة
ولازم ناخد بالنا من حاجة قبل ما نشترى المنتج اولا
نسال اللى هنجيب منه او نسال اللى هتعملنا ياترى نوع شعرنا ينفع مع ده
ثانيا نسال ياترى شعرنا هيكفى كام عبوة
علشان منخسرش فلوسنا على الفاضى
بس بصراحة انا من الناس اللى بتشجع ترانسفورميشن لان نتيجته سواء فى الفرد او فى تنعيم الشعر بتكون مزهلة

انا عملت شعرى عند سين من الناس بس شعرى فيه كسرات ياترى الحل ايه ؟
اولا يابنات لو الشعر فيه كسرات بعد الفرد الموضوع مش محتاج اى قلق كل اللى هتعمليه انك هتتصلى بالكوافيرة بتاعتك وهتقوليلها ان شعرك فيه كسرات وهيا هتبقا ملزمة بيه
انا نفسى بتصل بكل زباينى بعد الفرد وبطمن عليهم والحمد لله علاقتى بيهم كويسة جداااااااا ولو فى اى حاجة ببقا ملتزمة بيها
والحكاية باختصار ان الكسرات بتيجى من المكوى
ان يكون فى مكان متكواش اوى وبيبقا معالجة الموضوع من اسهل ما يكون

انا فردت شعرى بتشى وبعانى من سقوط فظيع فى الشعر ياترى ليه والحل ايه ؟
اولا لازم نتكلم بطريقة علمية هنا بالذات علشان نقدر نرد صح على السؤال ده
لو روحتى للدكتور وسالتية اول حاجة هيقولهالك
1- ياترى عملتى صبغة
2- بتاخدى علاج
3- بتعانى من اى شىء تعبك نفسيا
4 - ايه نسبة الانيميا عندك
5- ازاى بتسرحى شعرك وكام مرة بتغسليه
6 - بتغزى شعرك كويس من الخارج والداخل ولا لا
وفى النهاية اكيد هيسالك طبعا بتفردى شعرك وايه النوع اللى بتستخدميه
يعنى كل الاسباب دى بتاثر على الشعر
ولازم قبل ما نعالج شعرنا نحط فى دماغنا كل الاسئلة دى ونحاول اننا نغذى شعرنا مش من بره بس من جوه كمان
علشان كده اول حاجة بيعملها الدكتور انه لازم يكتبلك على فيتامينات
مختصر كلامى ________ اننا لازم نفكر فى كل الاساب دى ونعالجها ومش هنلاقى شعرنا قوى بس لا ده هيطول كمان يعنى لازم نغذى شعرنا من جوه ومن بره قبل ما نقول ليه شعرنا بيسقط
حتى طريقة تسريحنا فى شعرنا بتبقا سبب قوى فى سقوط الشعر

ايه الفرق بين ترانسفورميشن الاحمر والازرق والاخضر ؟
الموضوع باختصار كده ان الاحمر للشعر البيور اللى متفردتش ولا اتصبغ
الازرق للشعر المعالج كيميائيا
الاخضر للشعر الضعيف اللى معمول صبغة وهيلايت
وكل منتج من دول بيبقا على حسب خبرة الكوافير ونظرته فى الشعر اللى ادامه

ياترى الفرد ده عبارة عن ايه ونسبة المواد الكيميائية فيه كبيرة ولا لا ؟
الفرد ده فرد امريكى العبوات بتاعته كلها متبرشمة ونسبة المواد الكيميائية اللى فيه تكاد تكون ضعيفة والدليل على كده حاجة واحدة بس
ان مادة الفرد نفسها اللى هيا الفيس 1 مبتفردتش دى بتفك الكسرات بس
الفرد كله بيجى من المكوى اللى بنسميها مرحلة الكبس واللى بنقعد فيها مش اقل من 4 ساعات
يعنى الفرد 100% بيكون فى ايد الكوافير مش الكريم نفسه

ياترى مدة الفرد اد ايه واقدر اغسل شعرى امته ؟
مدة الفرد كشغل فى ايد الكوافير مش اقل من 6 ساعات وانتى طالعة هههههه
وتقدرى تغسلى شعرك فى نفس اليوم طبعا
__________________________________________________ ___________
بتمنى يكون موضوعى عجبكو وتكونو استفادتو منه
واى سؤال مممن يخطر على بالكو انا تحت امركم
ويارب اكون قدرت اجمع اكبر قدر من الاسئلة
وارجع واقول تانى فرد تشى حاجة والكرياتين حاجة تانية ده ليه مميزت وده ليه مميزات
وفى النهاية الامر كله بيرجع للانسانه نفسها اللى هتفرد
استخيروا ربنا وان شاء الله ربنا ييسر لحال
مع خالص تحياتى وودى اليكم
مدام حنان

ممكن تبعتيلي يا مدام حنان على الخاص
رقم تليفونك والعنوان بتاع الكوافير
وهل حضرتك بتيجي البيت ولا لأ
والتكلفة لو سمحتي

شكرا جدا جدا ... استفدت كتيييييير