أولا: أنا سعيده جدا بانضمامي لأجمل دوره فلقد إستفدت كثيرا منها والحمدلله أسلوبى مع بنتي تغير وأصبحت أكثر حرصا على تغيير الكثير من العادات التي كنت أجهلها لأنها أول طفله لي وأنا في غربه أفتقد الأهل والنصيحه في تربية الأطفال
لذلك أنا فخورة جدااابأجمل أخت وعزيزه جزاها الله كل خير على أنها فكرت في هذه الدوره المفيده
الأخت أم الأحرار بارك الله فيكى
وربنا يصبركم ويقويكم على الظروف اللى تمرو فيها
ويكتب لكم النصر اللهم أمين
كما أشكر الأخت أم هند على تعاونها معنا
وأشكر أيضا blueyamama على انضمامها للأخوات لمساعدتنا
ولا أنسى بالشكر الأخوات العضوات المشاركات في الدوره فكل واحدة تفيد الأخرى من خلال تجاربها مع أطفالها
ثانيا:أحب أعرفكم ببنتي الأمـــــــــوره (نـــــــــوووور)
عمرها سنه وخمس شهور
البرنــــــــــامج اليومي الأساسي (لنـــــــــور)
1_الإستحمام
2_تناول الوجبات وغسل الأسنان بعد كل وجبه
3_أداء بعض التمارين الرياضيه مع ماما في الصباح
4_اللعب بالألعاب
5_مشاهدة الكرتون
6_مساعدة ماما فى ترتيب البيت مع شوية بهدله طبعا
*شـــــــــــــــرح الجـــــــدول اليومي*
بما أن (نــــــــــــور) لسه صغيره والنوم عندها غير منتظم والمواعيد أيضا غير منتظمه
فلن أذكر الوقت
**أول ما نصحى من النوم أقوم بغسل أسنانى أمامها كي ترانى وأعطيها فرشاتها وهى تقلدني وتغسل أسنانها وبعدها أنا أساعدها ثم أغسل وجهها ويديها وأغيرلها البامبرز
**أخذها معي على المطبخ وأضعها على الطاوله وأعطيها بعض المعالق والادوات البلاستيكيه الخاصه بالمطبخ
كي تلعب وأنا أقوم بتحضير الفطار
**أفتح قناة الكرتون وأفطرها
**أقوم بترتب البيت وهي تحضر الفوطه وتساعدني في التلميع
بصراحه أنا مبسوطه إنها بتقلدنى خليها تتعود
وتكنس السجاد طبعا هي بتعمل اى حاجه وخلاص بس المهم انها بتقلد
**وقت الظهر أتوضا وأصلي وأقولها يلا يا نور تعالي صلي بصراحه هى اتعودت تقلدنى لما بقول الله أكبر ترفع إيديها وكمان تحط إيديها على صدرها وبعدين تسجد طبعا هي مش فاهمه بس بتقلد حتى لما أقولها صلى يا نور تعمل كده لوحدها
**بتكلم معاها على طول وهي تحاول تقول أي كلام بتقلدني إنها بتتكلم زيي وبتشاور بإيدها وتعمل حركات غريبه وأقولها كلمات سهله تقدر تقولها مع التكرار
الحمدلله علمتها كلمة قطه وهي لما تشوف قطه فعلا بتقول وأحضرتلها صور قطط من النت وعرفت إنها قطه
طبعا بتقول ماما وبابا وتيته بس من غير ما توجه الكلام لحد
علمتها كلمه يلا لما أقولها يلا يا نور تعالي نروح نعمل كذا تقول ييا
بتقول كلمة أنا ولما أقول مين حبيب ماما تقول أنا مين حيستحمى تقول أنا مين بيحب نور تقول أنا
**نحضر المكعبات ونلعب مع بعض وبعد الإنتهاء من اللعب تساعدنى في وضع اللعب فى الصندوق
**أملأ البانيو ماء وأحطلها رغوه في الماء وبعض من ألعابها ونلعب مع بعض وهى مبسوطه لأنها بتحب الماء
**أفتحلها أغاني أطفال أو كرتون وأحضر أنا الغدا
**نتغدى وننام شويه
**إشتريت لها قصص قصيره وفيها صور أحكيلها حكايات مع إنها مش فاهمه بس الصور بتلفت نظرها واقولها على أسماء الحيوانات الموجوده
وطبعا هى تقلدنى وتشاور زيى على الصور وتتكلم أي كلام مش مفهوم يعنى بتحكيلى أنا كمان القصه
**أقطعلها فواكه وأعملها عصير أو أأكلها اى شئ بتحبه طبعا إكتشفت إنها أوقات تاكل باليمين وأوقات بالشمال وبقيت أركز معاها إنها تاكل باليمين دايما والحمدلله حسيت انها احسن وبتستجيب
واليوم مسكت الأكل بالشمال قلتلها كلي باليمين رجعت الأكل تانى لإيدها اليمين
لاحظت ان كتر تكرار الكلام مع الطفل بيجعله يفهم ويعرف ما تقصده الأم يعنى بلاش تقولو ده صغير مش فاهم لاء مع الوقت والتكرار بيفهمو معنى الكلام حتى لو كانو لسه متكلموش
**من وقت ما بدأت الدوره وأنا أكتب إجابات المحاضرات في ورقه خارجيه ثم انقلها هي تشوفني تكون عايزه ورقه وقلم زيي بدأت أعطيها قلم وورقه وأخليها تكتب طبعا هى بتشخبط فى الورقه وعلى إيدها مش مهم المهم أنها الحمدلله بتمسك القلم باليمين
**نلعب أنا وهي نجري ورا بعض وأستخبى منها وأظهر نفسى فجأه يعني أي لعب المهم إني أبسطها لأنها بتفرح كتير لما بتلعب
وبالليل لما ييجي والدها بيلعب هو كمان معاها وبتكون مبسوطه
**أحضرلها العشا وبحاول أخليها تعتمد على نفسها في الاكل وطبعا بساعدها لأنى لو تركتها مش حتاكل
**وأخيرا وهو المهم إني بشجعها على كل عمل بتقوم فيه ودايما أقولها برافو نور وبصقف لها وهي كمان تصقف لنفسها وتقول هيييييييييييييه
وده كان برنامجنا اليومي كل يوم وفي نهاية الأسبوع نخرج أنا ووالدها وهي طبعا ونتركها تلعب وتجري فى المول ولما تشوف أطفال تضحك وتتكلم كلام غريب يعنى بتعرفهم بنفسها
طبعا ممكن يحصل تغيير فى اليوم وأفكار تظهر جديده ونغير في يومنا او يوم ممكن تحذف منه بعض الخطط بسبب أي ظروف طارئه
لكن عموما دى الفكره العامه للجدول
وطبعا يكرر كل أسبوع مع إضافات
والحمدلله نور مع إنها وحيده إلا إنى مش حاسه إنها زهقانه او متضايقه في البيت دايما هى بتسلي نفسها وأنا كمان بسليها الحمدلله يارب
يارب يكون عجبكم ويكون في أفكار تناسب الأطفال اللي في سنها
وأشكركم جميعا
طبعا إذا حدثت أي فكره جديده سوف أقوم بكتابتها
[/CENTER]
****الــبرنامج الصيــــــــفي لأحلى نـــــور**** # موضوع صيفي ساخن #
كتبت بواسطة azmiralda000
الروابط المفضلة