مرحبا أختي ..
انا بقولج عن تجربتي .. وحبيت اكتبها في موضوع جديد عشان الكل يقرأ ..
أنا في ولادتي الاولى ( على فكرة الأولى والثانية كلهم فالثامن ) كنت يالسه افطر ويا امي وبمجرد ماكحيت(سعلت) حسيت شي دافي ينزل ولما وقفت لقيت الماي ينزل بس سبحان الله ما حسيت بأي وجع وشالوني عالمستشفى وبعد كشف الدكتورة قالت ولادة هذا كان الساعه 8 المساء .. وفي غرفة ماقبل الولادة كان يزيد عليه الوجع بس سبحان الله مع انها اول تجربه بس ربي فديت وجهه خفف عليه بحيث كنت مع كل طلقه استغفر واسبح واحمدالله واكبر وامشي فالغرفة بس عشان اتحكم فالوجع .. إلين ما صارت الساعة 3 نص الليل قام الوجع يزيد وانا ازيد فالأستغفار والدعاء .. إلين ما صارت الساعه تقريبا 7ونص الصبح قلت للممرضة ابا اروح (الله يعزج الحمام) فقالت لازم اكشف وبمجرد ماكشفت قالت لي ماشاءالله هاي ولادة والبيب بيظهر وفرحت وعلى طول على غرفة الولادة والله بس حطوني عالسرير ونيمتني على جنب فالأول وقالت ادفعي بس خفيف وعقب حطتني على ظهري وقالت خذي نفس عميق وادفعي مرة وحدة والله على طول نزل وما حسيت بجهد ولا الم وكان ولد والحمدلله ..
اما في ولادتي الثانية فجاني وجع (عفوا) بعد جماعي مع زوجي وكان الفجر .. ومسكت نفسي مع ان الألم يروح ويرجع وقلت مستحيل اني بولد فالثامن مرة ثانية بس زوجي اصر انروح المستشفى لأن الحبل السري كان ملفوف على رقبة بنتي والدكتورة قالت هذا عادي بس في حال جاء وجع لازم اروح المستشفى .. ورحت وبالفعل بعد الكشف قالوا النفس مفتوحه 3سم وهاي ولادة .. بس كانت عكس ولادتي الاولى والله وجع ، المهم كنت امشي فالغرفة واسوي نفس طقوس ولادتي الأولى بس كنت ادعي عشان الحبل السري مايشد عليها وهيه نازله .. وكل ما يزيد الوجع اقول يالله هانت إلين ما وقف تماما !!!!!!!
احترت وقلت شو صار قالولي عادي احيانا الحمل بالبنات يكون متعب بهالطريقة .. وفضلت يومين بس 4سم على امل تفتح النفس اكثر والوجع كان خفيف بس كانت لحظات ممله لأني ماعرف بولد ولا لأ .. وآخر مرة كشفت الدكتورة قلت لها صارلي فترة على 4سم وأنا تعبت وكنت امشي فالممرات وبدون فايدة ، إلين ما كشفت عليه وقالت لي لسه 4سم بس بعد الكشف حسيت الوجع يزيد وكلمت اختي وقلت لها اللي حصل فسألتني لما الدكتورة حطت يديها حسيتي وجع فقلت لها هيه فقالت لي يعني الدكتورة سوت لج توسيع للرحم عشان يفتح وسألت الدكتورة وقالت كلامها صح .. ومافي إلا ساعة ولا ساعتين ويزيد الوجع وعرفت ان اللحظة حانت وكشفوا وعرفوا ان النفس رجعت تفتح وعلى طول عالولادة بس هذا الشي اللي ما حبيته (((((( الطلق الصناعي )))) لأنه عكس الطبيعي .. الطبيعي مايتعبج ومايخليج تبذلين جهد وما يآخذ من طاقتج وعلى فترات تتقارب بقرب نزول الجنين .. بس الصناعي اتحسين كانج يالسه تركضين وتبين توقفين للراحه وما تقدرين وكل شوي يزيدون الجرعه والأصعب انهم كانوا يسوون لي توسيع للرحم كل شوي إلين ما وصلت 9سم وعلى فكرة هذا كله والماي مانزل؟!!!!!
فلما وصلت 9سم قالت لي الممرضة تبين تتخلصين من الطلق الصناعي وتولدي بسرعة قلت اكيد قالت خليني افتح لج الكيس قلت توكلي على الله .. وعلى فكرة انا عندي الربو يعني صدق هلكت .. ومن فتحت الكيس مافي شوي ومع عدة دفعات إلا ونزلت بنتي بس حسيت روحي طلعت ، بس صدق الطلق الصناعي عذاب مع ان الحين 80% من المستشفيات يعطون اللي بتولد طلق ليش ماعرف .. انا احس انه يضيع كل طاقه تكون الأم مخزنتنها عشان تدفع وتولد بسهوله ..
هاي كانت تجاربي وإن شاء الله ولادتي هالمرة تكون مثل الأولى والله يسهل عالجميع ..
الروابط المفضلة