السلام عليكم ورحمة الله وبركاته
دكتورة شروق بارك الله فيكي وجعل مجهوداتك واهتمامك لوجه الله ده في ميزان حسناتك
أرجوكي يادكتورة استحمليني لان فعلا مشكلتي مخليني محبطة بدرجة ربنا وحده العالم بيها
انا ابني دلوقتي عنده 3 شهور ونص، الموضوع بدا اني لما ولدت ابني هو نزل في نص التامن ووزنه كان 2600، وللاسف من اول يوم كنت بحاول ارضعه ماكانش بينام نهاااائي يعني 10 دقائق بالكتيير ويصحى والكلام ده استمر لمدة 5 ايام لحد ماروحنا كشفنا عليه وكنت مرضعاه علطول قبل مادخل للدكتور ومع ذلك قاللي بطنه فاضية مع ان كان عندي لبن كتيير كان بيغرق ملابسي والسرير بس الدكتور قاللي اكيد لبني خفيف زي الماء لايسمن ولا يغني من جوع، وساعتها قال ان نسبة الصفرة عالية ولازم يدخل الحضانة وفعلا اتحجز 3 ليالي كان بيرضع فيهم مرتين مباشر مني وماكنتش اعرف اهمية اني اشفطله لبني بدل الصناعي فاسبتهم يفتحوله لبن صناعي لباقي اليوم
لما ابني خرج حاولت ارضعه تاني بس كان برضه نفس الوضع الاول لحد مافي مرة بدا يعيط ويشد الحلمة جامد ويعيط امي قالتلي لازم صناعي واول ماجهزنا الرضعة التهم الببرونة على مرة واحدة
بعدها الدكتور كتبلي كورس مكثف قرص بلازيل قبل الاكل 3 مرات في اليوم و هيربانا كبسولتين 3 مرات في اليوم وسيكام مدر اللبن مرتين واشرب حلبة ولبن
حاولت على قد ماقدر وبرضه كان يرضع مني وياخد نفس الرضعة كاملة صناعي واشتريت 3 شفاطات واخرهم avent اليدوي وكنت باوصل ل 120 مل في اليوم كله مرة واحدة يعني ماقدرش اعملهم تاني وبصراحة من احباطي ماكنتش بارضعه كتير يعني 3 او 4 مرات في اليوم لان كده كده كنت لازم اعمله رضعة صناعي كاملة
دلوقتي للاسف اللبن يادوب نقط ومعتمدةاعتماد كلي على الصناعي وهوه خلاص رافض يرضع عندي تماما وبحاول دلوقتي اعصر النقط الموجودة واديهاله
بس في ناحية ودي اصلا ماكانش بيعرف يرضع منها قوي دلوقتي النقط بتنزل منها تقييييلة وصفراء ماعرفش لانه بقاله فترة مابرضعش منه ولا ده ممكن يكون حاجة عندي في صدري مأثرة عليه
انا اسفة فعلا على الاطالة يادكتورة بس كان لازم ادي حضرتك وصف مفصل لاني الى الان مش عارفة هيا مشكلتي ايه انه ماكانش عارف يرضع ولا فعلا لبني خفيف ولا قليل وهل فيه امل اعالجها
جزاك الله كل خير
الروابط المفضلة