السلام عليكم حبيباتى فى الله

أنا بنتى عندها سبع شهور ونصف ماشاء الله وبترضع صناعى

طبعا انا عارفة ومتأكدة ان الرضاعة الطبيعى مفيش أحسن منها وان لبن الأم رزق من عند ربنا وأكيد أكيد فيه كل الفائدة للرضيع

طيب واللى لبنها مكنش بينزل ولا بيزيد أو اللى حصلها ظروف واضطرت ترضع صناعى تبقى أجرمت ؟؟

بصراحة انا لما بقول لحد انى برضع صناعى بيبصو لبنتى بشفقة وكأنى أجرمت فى حقها ...

أكيد أكيد مفيش أم تكره انها ترضع بنتها او ابنها رضاعة طبيعية .. ومفيش أم ممرتش بأوقات عصيبة بعد الولادة فى محاولات عدة لترضع ابنها رضاعة طبيعية وانا أكيد من الأمهات دى ..

دخلت وقرأت مواضيع عن الرضاعة الطبيعى وشربت المشروبات اللى بتدر اللبن وكنت برضع بنتى بالساعات من غير شبع ..

الله أعلم الغلط كان فين .. بس لبنى مكنش بينزل غير ضغيف جدا .. وكنت بعصر وبعمل كل اللى أقدر عليه ومع ذلك بنتى كانت بتصرخ لما أحطها على صدرى ولما كانت بتاخد صدرى بالساعة كانت تقوم ولا كأنها رضعت حاجة عياط عياط وصريخ .. وكمان كانت مولودة وزنها قليل وخست أكتر وكان عندها الصفرا والصفرا كانت بتزيد وكنت خايفة على سرتها من كتر العياط .. المهم ربنا مقدرش انها ترضع طبيعى واضطريت اديلها صناعى

ومن ساعتها كل ما حد يعرف ان بنتى بترضع صناعى يوبخنى ويشفق على بنتى ويشتم فى الصناعى ويخوفنى على بنتى وانها مش هتبقى كويسة زى اللى بيرضع طبيعى

للعلم انا اولاد اخواتى منهم اللى رضع صناعى ومنهم اللى رضع طبيعى وساعات اللى رضع منهم طبيعى كانوا بيعيوا اكتر وكانت مناعتهم اقل

انا مش بشكر فى الصناعى ولا بشجعله لأن الطبيعى أكيد أكيد أفضل بس بردو بقول ان المرض والعيا بإيد ربنا ومينفعش نقول دا هيطلع صحته أحسن

غرضى من الموضوع دا ان الناس تسيب غيرها فى حالها .. مفيش مانع آه انى انصح بالرضاعة الطبيعى بس مش أأنب بقى واحسس الأم ان ابنها او بنتها حالها يرثى لها .. واقعد بقى اهرى الأم أسئلة ليه ومش ليه .. يعنى هو انا كنت أكره يعنى ارضعها طبيعى !!! انا عن نفسى اتأذيت نفسيا كتير من كلام الناس فى الموضوع دا ويمكن سبب انى رضعت صناعى هو قلقى بعد الولادة من ان لبنى قليل وممكن كان يزيد بس من كتر انى حاسة انى تحت المجهر ففشلت فى الرضاعة الطبيعى

معلش وجعت دماغكو معايا بس حبيت أفضفض شوية

نصيحة للأم اللى بترضع صناعى : خليكى واثقة فى ربنا وفى ان بنتك او ابنك بإذن الله ربنا حاميهم وانهم زيهم زى باقى الأطفال .. بس بردو نحاول فى الطبيعى وبجد وبجهد ولو لا قدر الله فشلنا خلاص منعلقش المشنقة لنفسنا

تعرفوا انا عييت بعد الولاد كذا مرة بحاجات كان لازم أخدلها مضادات حيوية جامدة .. وساعتها قلت سبحان الله يمكن ربنا قدر لى الرضاعة الصناعى علشان لما اعيا اعرف آخد الدوا والمضاد الحيوى لأن لو كنت برضع طبيعى ساعتها كان هيبقى ممنوع آخد الأدوية دى طبعا .. عسى أن تكرهوا شيئا وهو خير لكم

ههههههههههه ليش معصبه حياتي وش دخللك من كلام الناس كيفها الوحده تبغى ترضع طبيعي والا صناعي ما لهم دخل
اففففففففففففف ما مايملا عيون الناس الا تراب

والله يا جميل من كتر كلام الناس بجد اللى مش عاجبهم حاجة .. انا بس حبيت اتكلم علشان لو فى واحدة بتمر بالظروف دى زيى اخليها واثقة من نفسها ومتضايقش .. تسلمى على مرورك يا سكر

ربنا يفرحك ببنوتك يارب فعلا الرضاعة دي رزق من عند ربنا وكل واحدة بظروفها انا كمان مارضعتش طبيعي بس يمكن ماعملتش كل اللي عليا علشان كده ندمانة بس فعلا في امهات بيعملوا اللي عليهم وبرده لربنا مابيردش واكيد اللي ربنا كتبوا هو الخير

يااختي انا لما ولدت بنتي كان اللبن ماشاء الله كتيييييييييييييير في صدري بس حصلت ليه ظروف صحيه كان لازم اخد علاج ماينفعش اللي بترضع تاخده دخلت لبنتي لبن صناعي ووقفت الطبيعي بس كان عمرها تسع شهور
انتي سيبك من اي كلام يزعلك الناس مابتجبش لبعضها الا المرض من الكلام الفراغ
افرحي ببنتك وربنا يحميها ويحفظها

الظروف هى اللى بتحكم اكيد كل ام نفسها ترضع طبيعي
اختى فى بنتها الاولى منزلش لبنها نهائي بسبب المضادات الحيوية وكملت صناعى
ونتها التانية من اول لحظة رضعتها طبيعي كويس
والبنتين زى بعض نفس المقاومة للامراض ونفس المناعه
وربنا بيعين

انا يا ميرو لما فطمت علي دلوقتى فيه ناس بتلومنى وناس بحس انها شوية وهتشتمنى مع ان الحمل حصل من عند ربنا من غير تخطيط

هعمل ايه يعنى
وناس ومنهم حماتى تحسبها بالتكلفه الاقتصادية وتقولى اديله لبن جاموسي مخفف !!!!!!!!!!!!!!!!!!!!!!!!!!!!!!!!!!!!!!!!!!!!! ههههههههه هم يضحك وهم يبكى

المهم ايه بقى
المهم ان انا وجوزى مقنعين الفطام و بالرضاعه الصناعي وبس
وربنا يحفظ اولادنا جميعا ياارب من كل اذى

الله يهدى الناس اللى بتحشر حالها وتدخل فى حياة غيرها
مش عارفة الواحد بيشوف كلام كتير وناس بتدخل ومالهاش الا وجع الراس
فى قول بيقول
من تدخل فيما لايعنية سمع مالايرضية
طالما عملتى الاعليكى كبرى دماغك من كلام الناس
كنت عايزة ابعتلك رسالة على الخاص اطمن على بنت خالتك

حبيبتي طنشي تعيشي

حتى لو رضعت صناعي

رح تكون بصحة جيدة

المهم اهتمي بالطعمة الغنية

وان شاء الله ما يصير عليها شي

وكل شي بيد رب العالمين

مو ذنبك اذا ما رضعت بنتك

طبيعي

الله يوفقك يا غالية لاتزعلي

وتقهري حالك والله كلام الناس

ما منو فايدة

الله يحفظلك بنوتتك

حبيباتى فى الله تسلمولى ومروركم غالى عليا .. يارب يكرمكم ويباركلكم فى اولادكم ويديكم الصحة والعافية .. بحبكم فى الله

فجر حبيبتى جزاكى الله خيرا .. بالنسبة لبنت خالى هتستنى لحد ما تتم سنة جواز وبعدها تقرر هتعمل ايه ويارب يرزقها قبل السنة ويفرح قلبها وانا لسة محتفظة برقم الدكتورة تبعك وبإذن الله لو احتجت حاجة هقولك يا قمر دعواااااااتك ليها .. مشكرة اوى اوى على اهتمامك يا سكرة .. ولو حملت هبشرك بالخبر الحلو ان شاء الله