انتقلت منتديات لكِ النسائية إلى هذا الرابط:
منتديات لكِ النسائية
هذا المنتدى للقراءة فقط.


للبحث في شبكة لكِ النسائية:
الصفحة 1 من 5 12345 الأخيرالأخير
عرض النتائج 1 الى 10 من 44

الموضوع: قصة ولادتي بجوهرة حياتي .... ماسة

  1. #1
    تاريخ التسجيل
    Mar 2010
    الموقع
    الأصل من سورية والاقامة في السعودية
    الردود
    310
    الجنس
    امرأة

    قصة ولادتي بجوهرة حياتي .... ماسة

    السلام عليكم ورحمة الله وبركاته
    أخواتي الغاليات كيفكون . . يا رب تكونو بألف خير يا رب
    ربي يرزق كل منتظرة حمل سليم معافى . . ويتمم لكل حامل حملها ويقومها مع وليدها بالسلامة يا رب
    رح احكيلكم قصة ولادتي ومعاناتي لغاية هاللحظة الحمد لله رب العالمين ويمكن طول عليكم بشوية تفاصيل بس استحملوني
    أول شي بحب خبركم اني مقيمة بالسعودية مع زوجي واهلي بسوريا ولما قرب موعد ولادتي حسيت اني بحاجة اهلي كتير حتى يكونو جنبي بولادتي بنتي البكرية . . . لما دخلت الشهر التاسع بدأت ياجراءات فيزة الزيارة لـ ماما وبابا والحمد لله وصلو بالسلامة يوم الخميس كنت كملت 23 يوم بشهري
    طبعا انا متابعة مع دكتوري كل اسبوع وبيقلي كل شي طبيعي والبكرية بتاخد وقت لتولد والمشكلة اني من بداية التاسع بحس بمغص شبيه بالدورة لكنه ما منتظم وكل مرة بيخططلي الدكتور بطني وبيقلي هاد طلق كاذب
    وبلا طولة سيرة بعد ما وصلو اهلي بيومين . . كان يوم السبت 25/ 12 جالسة بشرب معاهم قهوة الصباح ... بقلها ل ماما تعالي ننزل للمستشفى وراجع مع الدكتور وشوف كيف صار وضعي وطبعا انا ما حاسة بأية آلام غير المغص يلي بصراحة مليت منو
    وفعلا صلينا الضهر جماعة انا وزوجي وماما ونزلنا المستشفى وقعدنا ننطر دوري حتى يشوفني دكتوري ويفحصني وجا دوري تقريبا العصر دخلنا العيادة ولما فحصني الدكتور كان فاتح الرحم 5 سم وانا طبعا ما حاسة ع شي .. حط جهاز التخطيط ع بطني وطلع معو طلق منتظم وانا يا دوب حاسة بشوية مغص ولما عملي التراساوند قلي المية بتقل كتير حول الجنين ولازم تولدي باقصى سرعة .. قلتلو يعني ايمتى قلي اليوم وانا ولا مهيأة نفسي للولادة ولا عارفة شي
    المهم عطاني تحريض كانت الساعة تقريبا 4 ونص بعد العصر وقلي يمكن لأنك بكرية ما ياخد عليكي التحريض للمسا واحتمال تولدي اخر الليل او بكرة قلتلو طيب يا دكتور انا محتاجتك انت تولدني قلي ربنا ييسر وخلص دوامو ومشي
    طبعا لبسوني ملابس الولادة ونوموني بالمستشفى ووالدتي الله يجزيها كل خير جنبي وما تركتني ولا لحظة
    وبدأت أخس بمغص قوي وراقبت الوقت بيجي كل 3 دقايق وجهاز التخطيط ع بطني
    صارت الساعة تقريبا 7 وانا الطلق بيحمى علي
    دكتوري مشي واجت الدكتورة المناوبة وصارت تفحصني كل شوي والرحم بيتوسع والممرضات بيحطولي بالمحلول أدوية . . وانا نعسانة ونفسي نام هعهعهعهه
    وماما بتقولي اصحي ما تنامي انتي ولادتك قربت وحتولدي الليلة
    صارت الساعة 8 والألم بيزيد والرحم اتوسع كمان 8 سم وبعد شوية نزلت كل المي وحسيت بشي سخن قلتلها للدكتورة نزلت المي فحصتني وكان الرحم اتوسع 10 سم
    نقلوني لغرفة المخاض ومنعو ماما من الدخول .. لكن ماما رفضت وقالتلون انها اجت من سوريا لتكون جنبي وحتدخل المخاض معي وطبعا بعد مناقشات لبسوها تياب التعقيم ودخلت وايدها بايدي وانا بموت من الألم يلي صار بيجي كل دقيقة
    كانت الساعة 9 والدكتورة المناوبة ما اتصلت بدكتوري عشان يجي يولدني دخلت لوحدها وما كانت تسأل
    وصارت تقلي خدي نفس مع كل طلقة وادفعي وانا حموت من الالم وادفع وما ينزل الراس واصرخ من الألم لحد الساعة 9 ونص قالتلي الدكتورة الراس عالي ولازم نسحبها بالشفاطة
    وانا ما فاهمة شو يعني شفاطة . . . قلتلا خلصيني حموت .. ولما حطت جهاز تخطيط القلب ع بطني كان نبض الجنين بيقل وتعب الجنين كتير
    ولأن حوضي ضيق حطت الشفاطة وشقتني كتير وصرت انزف و الساعة 10 الا ربع نزلت بنتي . . . لونها أزرق والحبل السري ملفوف لفتين ع رقبتها وما فيها صوت وانا لما شفتها قلت أكيد ميتة بعيد الشر عن قلبها
    وصرت أبكي وقولهم سمعوني صوتها قولولي انها عايشة ولحتى يسعفوها بسرعة ما حطوها ع صدري ابدا
    واخدها دكتور الاطفال وصار يسحب من فمها وانفها حتى طلع صوتها وانا غبت عن الوعي بسبب النزيف الحاد
    لما غبت عن الوعي الدكتورة ما عرفت تتصرف وقتها الله يسامحها اتصلت بدكتوري وقالنلو تعال إلحق المريضة
    اجا الدكتور وقلها ليش ما اتصلتي لحتى اجي ولدها انا ما قولتلك ولديها انا قلتلك اكشفي عليها وراقبيها
    ودخلوني غرفة العمليات بحالة اسعاف وبنجوني بنج عام حتى يلحقو يخيطوني ويوقفو النزيف
    وطبعا انا ما حاسة ع شي غير انو فتحت عيوني الساعة 1 ونص بعد نص ليل وبرتجف من البرد وبقولهم بردانة دفوني وبسأل عن أمي وبنتي والممرضات ما بيردو
    تخيلو ساعتين ونص وانا بغرفة العمليات وأهلي حيموتو من الخوف علي
    دخلت ماما لعندي بعد ساعة وطمنتني انو بنتي بحاضنة الأطفال وكل شي تمام
    لكني خسرت دم كتير ونقلولي أكياس دم وأنا برجف من بردي وبيحطولي الدفاية علي وغطوني ب3 اغطية
    وعالساعة 5 الفجر نقلوني لغرفتي وانا بسألهم عن بنتي قال ممنوع اني اشوفها لأني تعبانة
    وحطولي أكياس حديد لأن خضاب دمي نزل لل 7 . . . وانا موجوعة وماحاسة اني بهالدنيا ونمت من الأدوية لتاني يوم الضهر اجا الدكتور وفحصني ولسه بنزف لكن أقل الحمد لله وقلي انو خيطوني من جوا أكتر من 20 غرزة ومن برا في حوالي 5 غرزات وانو ربنا سترني وقدر ولطف اني نجيت انا وبنتي الحمد لله
    نيموني 3 أيام بالمستشفى وبعدين خرجت لبيتي مع بنتي ماسة وعالسرير مباشرة لأن من الألم ما بقدر قوم ولا اتحرك ولا أمشي نتيجة خسارة الدم والحديد بجسمي وصار لوني أصفر وع طول شاحبة واتأخر لاجاني حليب بصدري فاضطرت دكتورة الاطفال تعطي بنتي حليب صناعي حتى ما تضعف ولما اجاني الحليب صارت بنتي ترفض صدري وتحب الرضاعة
    وتبكي وتبكي وما تاخد صدري بالغصب لحد اليوم
    طولت عليكم بقصتي يلي ربنا قدر ولطف وسترني انا وبنتي بس قبل ما أختم كلامي بخبركم اني اليوم نزلت عالمستشفى لأن فتق جرحي والتهب الحمد لله رب العالمين على كل شيء والدكتور طهرلي الجرح ووصفلي أدوية ومتابعة كل 3 أيام عندو لحتى يروح الالتهاب ويرجع يخيطلي جرحي
    اعذروني طولت عليكم كتير بقصتي . . . بدعي الله ان ولا أخت تعاني معاناتي ويا رب ييسرلكم جميعا ولاداتكم وتقومو بالسلامة مع أطفالكم يا رب

  2. #2
    تاريخ التسجيل
    Jun 2009
    الموقع
    بريطانيا مدينة الضباب uk
    الردود
    7,474
    الجنس
    أنثى
    الحمد لله على سلامتك حبيبتي وسلامة
    الغالية ماسة الله يجعلل تعبك في
    ميزان حسناتك أمين يا رب



  3. #3
    تاريخ التسجيل
    Dec 2010
    الموقع
    بعيدة عن اعز الناس
    الردود
    946
    الجنس
    امرأة
    التكريم
    (أوسمة)
    الحمد لله على سلامتك وسلامه البنوته
    والله يخليك اياها وتشوفيها دكتورة قد الدنيا يارب

  4. #4
    تاريخ التسجيل
    Mar 2009
    الموقع
    الرياض
    الردود
    1,563
    الجنس
    امرأة
    ماشاء الله الف الف مبروووووووووووووك البنوته

    والحمدلله على سلامتك والله يهونك عليك ويشفيك
    ولا يحرمنا من ها اللحظه انا وكل مشتاقه يارب

  5. #5
    تاريخ التسجيل
    Oct 2009
    الموقع
    سوريا الله حـــــاميها
    الردود
    1,952
    الجنس
    امرأة
    حبيبة قلبي والله قصتك صعبة كتير بس الحمدلله عدت على خير
    الله يتمم شفاكي يارب ويخليلك الماسة ماسة
    وتفرحي فيها يارب

  6. #6
    تاريخ التسجيل
    Oct 2009
    الردود
    274
    الجنس
    امرأة
    ألف الحمد لله على سلامتك وسلامة بنوتك، ربنا يكتب لك أجر كل لحظة تعذبتيها ويحفظلك بنتك وتتهني بيها إن شاء الله، ومبروك من جديد.

  7. #7
    تاريخ التسجيل
    Jan 2010
    الموقع
    فى واحة الصابرين
    الردود
    2,172
    الجنس
    امرأة
    حمدا لله على سلامتك وسلامتها
    الحمد لله على كل حال
    الله يسمحها الدكتورة
    ربنا يقويكى وتكونى بصحة وعافية

  8. #8
    تاريخ التسجيل
    May 2008
    الموقع
    ليبيا
    الردود
    75
    الجنس
    أنثى

    laughhard

    الحمد لله على سلامتك وسلا مة البنت ربى يحفظهلك وفعلا قصة ولادتك صعبة ولكن مع الوقت سو ف تنسيه عندما ترين ابنتك بصحة وعافية ويارب يشفيك ويخفف عنك الالم وتقومى لابنتك وتكونى فى احسن حال

  9. #9
    تاريخ التسجيل
    Aug 2009
    الموقع
    فلسطين الحبيبه
    الردود
    3,549
    الجنس
    أنثى
    الف الحمدلله يارب على سلامتك وسلامه البنوته يارب تشوفيها احلى عروس ويارب يشافيك ويعافيك يارب

  10. #10
    تاريخ التسجيل
    Feb 2010
    الموقع
    السعودية -جدة
    الردود
    136
    الجنس
    أنثى
    الحمد على السلامة
    احتسبي الاجر فلا تعلمين ماذا أعد الله لك
    الله يشافيك ويقومك بالسلامة ويقر عينك بصلاح ماسة

مواضيع مشابهه

  1. زوجى الحبيب انت شريك حياتى ولست كل حياتى
    بواسطة hoba essam في نافذة إجتماعية
    الردود: 12
    اخر موضوع: 11-12-2012, 01:35 PM
  2. ماسة او رهف
    بواسطة ام بانه في الأمومة والطفولة
    الردود: 12
    اخر موضوع: 20-03-2011, 10:06 AM
  3. الردود: 15
    اخر موضوع: 03-04-2010, 03:41 AM
  4. قصة ولادتي بـ ديمه كان اجمل يوم في حياتي
    بواسطة om dima في الحمل والولادة و الرضاعة
    الردود: 43
    اخر موضوع: 10-10-2009, 10:34 PM

أعضاء قرؤوا هذا الموضوع: 0

There are no members to list at the moment.

الروابط المفضلة

الروابط المفضلة
لكِ | مطبخ لكِ