السلام عليكم ورحمة الله وبركاتة

اخواتى الحبيبات ورفيقات درب الحمل

النهاردة جة اليوم اللى احكى فية قصة ولادتى واشارككم فرحتى والحمد لله

طبعا اللى يعرفونى عارفين ان انا الجنين عندى كان مقعدى وان الكل ان بينصحنى بالولادة القيصرية لأن الراس فى البكرية طالما عديت الاسبوع الاول من التاسع يبقى صعب انها تلف وتنزل تانى
لأن الجنين بيكون اخد الحجم اللى هينزل بية للدنيا

لكن سبحان الله ...

ربنا اكرمنى بولادة طبيعية

ابتدت تفاصيلها مع الساعات الاولى ليوم السبت 28/8 .....

ابتدت اوجاع زى اللى بتجينى كل يوم من حوالى نص الشهر التامن ... " الطلق البارد او تساهيل الولادة " ودة كان الساعة 1 بليل يوم الجمعة ....
ماما قالتلى تعالى خلاص نروح للدكتورة وتولدك قيصرى ....
انتى خلاص فاضل لك يومين فى التاسع .. وكدة كدة هتولدى قيصرى يبقى لية الانتظار

وانا من جوايا اقول لأ .... ربنا مش هيخيب ظنى ... ربنا سميع مجيب الدعاء ... وانا بدعى ربنا فى كل صلاة يرزقنى بولادة طبيعية
انا هستنى لآخر يوم فى التاسع ...وكان فى اليوم دة جوزى لسا جاى على اساس انى هولد بإذن الله الاحد " انا قاعدة عن ماما "

المهم دخلت نمت على الساعة 3 الفجر والاوجاع خفيفة
وصحيت على الساعة 5 وربع ومعايا اوجاع اول مرة احس بيها
غير الوجع اللى بيجينى كل يوم
حسيت بأسفل بطنى مشدود جدا والم رهيب فية وضهرى كمان
قمت ادخل الحمام " اعزكم الله " لقيتنى مش قادرة حتى اعمل حمام
والوجع بقى بيروح وبييجى كل 5 دقايق ...
من كتر الوجع زوجى صحى على اوجاعى ...
ولقيتنى مرة واحدة الوجع بيروح وبييجى كل دقيقة او اتنين تقريبا ... ولقيت نفسى عايزة ارجع وجسمى كلة بقى عرقان جدا وبيترعش لدرجة انى مش قادرة اقف ولا حتى قادرة اقعد
اتصلت بالدكتورة اللى انا متابعة معاها على الساعة 6.30 لكن جوزها هو اللى رد عليا " دكتور بردة " وقاللى طالما مفيش اى بوادر للولادة ( علامة الولادة ) دم او ماء يبقى خليكى
وتعالى العيادة على الساعة 10
طبعا الوجع كل دة مستمر
وبيزيد
نمت على جمبى علشان لو دى ولادة فعلا الطلق يزيد ...

وفجأة ....
لقيت كيس الماء انفجر والمياة كلها نزلت مرة واحدة
طبعا ساعتها اتصلت بالدكتورة على طول
وكانت الصدمة
لقيتها بتزعق معايا وبتقولى انتى ازاى تستنى لما المية تنزل ... انتى مش عارفة ان الجنين مقعدى يعنى انتى استحالة تولدى طبيعى وانتى بكرية
قلتلها مش وقتة المهم ان اعمل اية دلوقتى

تخيلوا .............
قالت لى انا مليش دعوة يا مدام انا مقدرش اولدك وانتى بالوضع دة ... روحى اى مستشفى .... وقفلت فى وشى السكة

طبعا الخوف تملكنى وفى ثانية ماما كانت مجهزة الحاجة وبابا وجوزى نزلنا الساعة 7 الصبح ندور على مستشفى
ولو اقولكم والله اسماء المستشفيات كلها اتمحت من الذاكرة ....
وانا طبعا كل دة الوجع عمال يزيد
المهم الحمد لله ربنا هدانا " لمستشفى الدلتا التخصصى "
وعما وصلت لهناك كنت خلاص فى المرحلة التانية من الولادة وابتديت احس بقوة دفع لا ارادية وانا كلى رعب وعمالة ادعى ... يااااااارب ... رد لى بنتى سليمة معافاة يارب من كل سوء
يا منجى نجنى ... يا مخلص خلصنى ... يا قادر على كل شيء ارزقنى ولادة سهلة ....
اول ما وصلت كشفت عليا مساعدة دكتور نسا وقالت لى الرحم فاتح 1 سم ... انتى كدة هتدخلى قيصرى على طول لأن الجنين مقعدى
وابتدت تتصل بالدكتور المتخصص
وطلعونى اوضة العمليات ... وبمجرد وصولى هناك كانت قوة الدفع بتزيد ومش قادرة اتحكم فيها ... وخلاص ابتديت احس بحاجة بتنزل منى ... كشفت عليا تانى لقت الرحم فاتح 8 سم ... والمؤخرة خلاص باينة خالص واستغربت جدا وقالتلى ازاى يفتح كل دة بسرعة انتى كدة لازم تولدى طبيعى ... وانا اصرخ واقولهم مقدرش اولد طبيعى انا بكرية الراس هتتحشر فى الحوض وبنتى هتتخنق
وكانت مع الطلق بنتى بتحاول تنزل ... والدكتورة بتحاول تدفعها تانى جوة علشان الراس متنزلش الحوض قبل ما الدكتور ييجى ... وطبعا قمة الالم ...
الدكتور جة وانا كنت خلااااااااااص تقريبا المؤخرة كلها نزلت ... ومش قادرة خلاص
ادانى حقنة بنج ومحسيتش بحاجة بعدها
اول ما فقت سألت انا ولدت الممرضة قالت لى الحمد لله ولدتى بالسلامة
وكمان ولادة طبيعية ... والبنوتة بصحة ومفيهاش اى حاجة
الحمد لله والشكر لله يارب
ربنا ارسل لى الدكتور دة يولدنى ولادة طبيعية على الرغم من ان الوضع صعب جدا انى معاة اولد طبيعى ... طول الحمل كل الدكاترة قالولى مستحيل تولدى طبيعى وانتى بكرية والجنين مقعدى
لكن ..
ارادة الله فوق كل شيء

اللهم لك الحمد كما ينبغى لجلال وجهك وعظيم سلطانك

والحمد لله انا دلوقتى ابتديت استعيد عافيتى مرة تانية ... بس طبعا الخياطة تعبانى شوية ...
لكن بمجرد النظر فى وجة حنين .. بنسى الاوجاع كلها وبحمد ربنا انة حافظ لى على بنتى وقر عينى بيها

يااااااااااااااااااارب يا حنان يا منان بحق هذة الايام المفترجة ... بحق هذا الشهر الكريم
ترزق كل محرومة من الحمل وتتم لكل حامل حملها بخير
انك سميع مجيب الدعاء

حمد لله على السلامه وسلامه حنين وعقبال ما تخويها وفعلا اراده ربنا فوق كل شىء مبروك مره تانيه

ألف ألف الحمدلله على سلامتك ياام حنين جعلها الله من مواليد السعاده يارب
والله يقومك بالسلامه وإن شاءالله كل هذا اللي حسيتي فيه تكفير ورحمة من ربي


والله يسهل علي وعلى باقي الكروشات

ماشاء الله لا قوة الا بالله
الف حمد لله على سلامتك يا سكر
والله فعلا قشعرت وانا باقرأ لاني متابعاك وعارفة قد ايه كان نفسك تولدي طبيعي
ربنا يبارك لك في حنين يارب ويحميها ويفرحك بيها وتشوفيها عروسة يااااااااااارب

الف الف مبروك والحمد لله على سلامتك وسلامة حنيين ان شا الله بتتربي بعزك وعز ابوها وبتشوفي اخواتها يارب

الله يهون علي وعلى كل حامل ويرزق كل محرومة يارب

الف الف الحمدلله على سلامتك
وكويس انو ربنا بعثلك هالدكتور
وولدتي طبيعي غلاتي

الف الف مبروك وتتربي بعزكم يارب
وحمد لله علس سلامتك

بنت ابي ماشاء الله تبارك الله الف الف مبروك يارب يكمل فرحتك بتمام شفائك الحمدلله ان ربنا اداكي اللي بتتمني وكمان رزقك بالكتكوته الجميله حنين

بنت ابي اقسم بالله العظيم ان امبارح كنت في العمره ودعيت لك طبعا معرفش انك ولدتي وقولت يارب ييسر امرك وتولدي ولاده طبيعه زي ما بتتمني
وانت عملتها من غير ما حد يعرف
المهم الف مبروك وجعلها الله من مواليد الخير عليكي وعلى المسلمين جميعا

بس عند ملاحظه ايه اللي الطبيبه بتعتك عملته ده ربنا يهديها ويسامحها مش عارفه ليه بيعملوا كده وتبان النداليه في اخر لحظه عموما ده خير لكي برضه علشان ربنا سخر لك الطبيب ده علشان تولدي طبيعي الحمد لله على كل حال

بوسه كبيره اوي لحنين بس براحه علشان متفعسهاش من قوه البوسه وطبعا الصوره في اقرب وقت اوعي تتاخر علينا

الف حمدلله على سلامتك وتتربي بعزكم يارب