السلام عليكم
...أزيكم يا بنات يارب تكونوا كلكم بخير يارب وبصحه وراحه بال....
...من يوم ما نوودي عملت الموضوع وأنا بدخل أقرأ رددكم ودعواتكم لكن ربنا وحده يعلم والله ما كنت عارفه أرد ولا أقول أيه ...
...أولا الحمد لله علي كل حال أنا الحمد لله والله يا بنات ربنا راضيني أوي بنصيبي ومقلتش غير الحمد لله وأنا أليه راجعون وربنا يخلف علينا أن شاء الله..
...ثانيا عاوزه أقولكم حقيقي شكرا علي وقفتكم جنبي ودعواتكم ليا والله أرتحت كتير لما قريتها ومتعرفوش خففت عني أد أيه فأيام أصعب وأقسي ما تكون...
ربنا يجازيكم كل خير ياارب ويعافيكم من كل أبتلاء ...
...عارفه عاوزين تطمنوا عليا وتعرفوا اللي حصل وأنا والله من كام يوم كل يوم أدخل وأقول هرد بس غصب عني مكنتش بقدر..كنت كل ما بقرأ الردود بفضل أعيط ومبعرفش أكتب أي حاجه..
...مش عارفه أكتب أيه بس ياااااااارب ياااااااااارب يعافيكم بجد من موقف زي اللي مريت بيه وما يكتبه علي حد أبدااااا..من أسبوعين بالظبط وزي فجر أنهارده ولدت بعد 10 أيام قضيتها فالمستشفي..البدايه أني كنت متابعه فمركز جنين اللي عملت فيه الحقن وفالشهر التالت بدأت متابعه هنا مع دكتور وسبت المركز علشان السفر وكده لكن كنت بتابع معاهم بالتليفون لأن كمان الدكتور قاللي بلاش تيجي علشان المشيمه نازله ومش كويس السفر ليا...
تابعت مع دكتوري من نص التالت تقريبا...وكانت الأمور مستقره جدا الحمد لله وكل شئ طبيعي..فالشهر الخامس فنصه تقريبا بدأ ينزل عليا دم الدكتور قاللي ده من نزول المشيمه ومتقلقيش وكده سألته عن الحركه وشغل البيت وكده قاللي عادي بس متجهديش نفسك...فيوم نزل عليا قطعه دم كبيره شويه أترعبت وكلمت الدكتور قاللي متقلقيش وتعالي أشوفك صحيت تاني يوم لقيتني سخنه وبترعش وتعبانه جدا خدت بعضي ونزلت للدكتور وعملت سونار وكان كل شئ تمام وأداني خافض للحراره وأعشاب علشان البرد كان شكلها نزله برد لكن مكنش أي أعراض للبرد خالص...بعدها ب10 أيام تقريبا زادت الحراره تاني ومكنتش بتنزل بسهوله كلمت الدكتور أداني خافض للحراره وقاللي نشوف الحراره هتوصل 39 ولا هتنزل ممكن يكون ألتهابات فالكلي مثلا ...قلقت من كلامه خصوصا أن كان بقالي فتره بينزل عليا أفرازات كتير زي الميه وكل ما اسأله يقوللي عادي أقولله حسه ببلل ربنا يعافيكم يقوللي برضه عادي ..طبعا دي طلعت مي وأنا مكنتش أعرف...
خدت بعضي ورحت لدكتوره وقلت هبقي علي راحتي معاها ونشوف الأفرازات والسخونيه دي أيه...
أول ما رحت قالتلي الأفرازات دي ميه من الجنين والميه قليله حواليه تقريبا 1.5سم أنما الجنين التاني كويس جدا ومفيش أي حاجه...حولتني علي المستشفي 3 أيام تحت الملاحظه كان الوضع مستقر بأستثناء نزول الميه ...
روحت البيت يوم واحد جالي فيه مغص خفيف أتصلت بالدكتوره أدتني حبوب توقف المغص وفعلا راح ..تاني يوم الصبح اتكرر المغص خدت الحبوب وحقنه مسكنه وبقيت كويسه..اليوم اللي بعده أتكرر نفس المغص فنفس المعاد بس زاد بقي جدااااا أتصلت بالدكتوره مردتش صحيت جوزي وطلبنا المستشفي ونزلت جري والمغص زايد جدا فالمستشفي قالولي طلق خفيف وعملولي قياس لنبض الجنين وحطوني عالمونيتور وقالوا كل حاجه تمام وحولوني عالمستشفي اللي كنت فيها الأول وفضلت تقريبا 4 أيام بيجيلي مغص شديد جداااا فنفس المعاد كل يوم ساعه الفجر تقريبا وبعد التحاليل قالولي ده مغص كلوي لأن عندك صديد والنسبه عاليه وفضلت تحت الملاحظه تقريبا أسبوع وبدأت أحس بتقل مع المغص ده غير الحراره بدأت تزيد تاني ..أستمريت علي المحاليل وخافض للحراره وكميه أدويه فظيعه ...لحد فيوم جت الدكتوره وعملتلي سونار وقالتلي الميه نشفت حوالين الجنين وراسها نازله فالحوض "كانت بنوته" وعملتلي فحص وقالتلي الرحم مفتوح ..كلامها نزل عليا أقسم بالله حسيت فعلا مش تشبيه أني أتكسرت ميت حته ..أنا فضلت فحاله ذهول رغم أنه شئ كان وارد ..بس لما لما يبقي حقيقه خلاص بيبقي حاجه تانيه خالص...قالتلي ممكن نحافظ عالبيبي التاني بس المهم أنتي ولو الوضع ساء هضطر أولدك طبعا أنا عماله أسمع وحسه الكلام زي الرصاص ..سامعه أه بس مش مستوعبه ..مش فاهمه ومش حسه أكتر من زي ما اكون ضايعه ..
عدت عليا ليله ما يعلم بيها الا ربنا فضلت أدعي ربنا يثبتني ويرضيني وما يصيبني فيهم بسوء و اليوم ده مننمتش خالص من كتر التفكير ...تاني يوم المغرب بدأت الحراره تزيد أدوني المحاليل والأدويه لكن منزلتش خالص لحد 12 بليل بالعكس كانت بتزيد وكنت بترعش جداااااااا..جت الدكتوره وقالت أوقف المحاليل والعلاج وبرشام المغص والانقباضات وساعتها عرفت أن خلاص ...
...بقولها وقفتي البرشام ليه يا دكتوره سكتت بجد مكنتش عارفه تقولي أيه...
قالتلي أنتي كده فخطر ومينفعش أستني أكتر من كده...
..تعرفوا كل اللي فات كان كوم والكام ساعه دول كوم تاني...حسيت أن الدنيا وقفت ...أن في حاجه غرييييييبه غريييبه أوي ....حسيت أني بتهد وبتكسر ..لكن وحياه ربنا ما أعترضت لثانيه واحده وأول حاجه قلتها اللهم أجرني في مصيبتي وأخلفني خيرا منها وأنا لله وأنا أليه راجعون....ربنا كان مثبتني لكن أحساسي باللي حواليا وبجوزي لما شفته كسرني بجد ...كانوا خايفين عليا وكنت صعبانه عليهم ...كان مموتني أحساسهم أن محدش عارف ولا قادر يواسيني بكلمه ولا يعملي حاجه..ماهو أصل مفيش كلام يتقال ...واللي كان رااعبني بجد أني أفضل يوم قبلها عارفه أن بنتي خلاص بتروح حسه بحركتها بتقل جوايا ونبضها عمال يقل وأنا مش بأيدي حاجه ..ودلوقتي مضطرين ينزلوها وينزلوا الجنين التاني وهو الحمد لله سليم وكويس ..بس علشان أنا أبقي كويسه ...تعرفوا الدكتوره بقت تقوللي أنتي مستحمله فوق طاقتك جدا ..لكن والله العظيم لو كان بأيدي كنت مستعده أستحمل كده لحد ما ييجو بالسلامه ..كنت كل ما أتعب أقول معلش فداهم علي سلامتهم كل ده...لكن قدر الله وما شاء فعل...
...علقولي محاليل وطلق صناعي وبدأ الطلق ..تعرفوا فالأول خفت شويه من الوجع لأن أكتر من10 أيام فالمستشفي كل يوم ولادات طبيعي بسمع الأصوات والصريخ بيجيلي رعب...وقلت لو ينفع يولدوني قيصري ..وبعدين لما بدأ الطلق نسيت ..نسيت الطلق والوجع ومكنتش مركزه غير فحركه البيبيهات وأنا عارفه أنها دقايق بالكتير ساعات ومعنتش هحس بيهم ..كنت متعلقه بيهم ومش متخيله أنهم هيسيبوني ومش هحس بيهم تاني ولا هستناهم...
..الحمد لله الطلق مطولش معايا بفضل ربنا عليا وكان الدكتور المتابع بيقول علي الصبح لكن الفجر أذن وهما منزلني من علي السرير وخدني العمليات...والله يا بنات بحمد ربنا علي الثبات اللي كان مديهولي كل الوقت ده ..أنا حتي معيطش ..حتي الطلق بقيت قافله بقي من خوفي علي ماما وجوزي لما يسمعوني لأن بجد كانوا صعبانين عليا وأتبهدلوا معايا جداااااا ...
...خدوني العمليات وفضلت أدعي ربنا يخلف علينا ويصبرنا...كنت بردانه وبترعش جداااااااا من السخونيه لدرجه كنت هقع أكتر من مره من عالسرير ومع الطلق بدأ نفسي يضيق جداااا...نزلت البنوته الأول وكنا لحد أخر سونار بيقولوا غالبا ولد..أنا بقيت أقولهم بنت أنا شفتها فالحلم بنت ...تعرفوا أن أغرب أحساس حصلي فحياتي حسيته فيها وهي بتنزل ...بعدها بشويه نزل البيبي التاني لكن كان نفسي بدأ يروح خالص وراسي حسيتها ناااااااااار ورعشه فظيعه ...التنفس الصناعي مكنش نافع خالص وحصل نزف زايد..الدكتوره طلبت نقل دم بسرعه وطلبت الأسعاف ينقلني العنايه فمستشفي تانيه....أدوني بنج لكن مجبش نتيجه من أرتفاع الحراره كانت 42والضغط 170علي50 الدكتور حسيته متوتر والدكتوره شرحه ويدوب عيني غمضت دقايق وفقت جه الأسعاف وأتنقلت العنايه قضيت يوم ونص ورجعت تاني المستشفي يوم وروحت....
...كنت هتجنن وأرجع البيت ..لكن سبحان الله أكتئاب فظيع من ساعه ما دخلت البيت ...وعلي قد ما كنت ماسكه نفسي أنهرت...أول يومين دول ياااااااارب يااااااااارب ما تكتبهم علي حد ... حاجه فوق الأحتمال كنت هتجنن من التفكير أقوم أمشي تعبانه بس مفيش حد..كنت أجي أنام يتحركوا ويرفسوا ودلوقتي مش لقياهم حتي المنبه يرن علي مواعيد الدوا خلاص لاعاد دوا ولا فيتامين ولا غيره..
كل حاجه بتحصل بتفكرني أنهم مش موجودين ...قلبي أتوجع عليهم أويييييييييييييييي أوي ووحشوني أويييييييييييييييييييييييييييييييييييييي أوييييييييييييييييييييييي والله...3سنين ونص وبعدين نعمل الحقن وسفر وبهدله بس الحمد لله ربنا أكرمنا بيهم..كنت هتجنن وأنا بستناهم كنت فرحانه بيهم أوي خلاص حياتي اتظبطت عليهم من قبل ما ييجوا كان كل كلامنا أنا وجوزي هنجيبلهم كذا ونعملهم كذا...لكن الحمد لله أكيد ربنا شايلنا حاجه أحسن وأكيد ده خير بس أحنا مش هنفهم دلوقتي...وأن شاء الله زي ما ربنا رزقنا بيهم هيرزقنا تاني ...
بس أدعولي أمانه أدعولي لو دعوه واحده من قلبكم ربنا يعوضنا عن قريب وما يطول علينا الأنتظار لا أحنا ولا كل اللي بيتمني ومستني زينا ويصبرنا أحنا وكل اللي فقد أبن ...
...عارفه طولت عليكم أوي بس مش قادره أقول الكلام ده قدام حد وجوزي ربنا يجازيه كل خير ياررب مستحمل معايا كتير ومينفعش أقول الكلام ده ليه ..أنا لما بدأت أكتب متخيلتش أني هكتب كل ده ..بس ربنا يخفف عني لأن والله يا بنات ما بيعدي عليا يوم من غير عييط وبحاول أداري علي قد ما أقدر...والحمد لله الحمد لله مليون مره علي قضاء ربنا وأنه عافانا وفضلنا بالأبتلاء ده لأنه كان ممكن يكون حاجه أصعب من كده...
ومتحرمش منكم ومن دعواتكم ووقفتكم جنبي يارب..وخصوصا نوودي وعصفورايه وجني23وأم أنوس وزوجه ماهر والشيماء ...
جزاكم الله كل خير وربنا يرزقكم الجنه يااااااااااااااارب ويعافيكم من كل شر...
ومتنسونيش يا بنات من دعواتكم ...دعوه واحده من صادقه من القلب ولكم بالمثل أن شاء الله....
الروابط المفضلة