مساكم الله بالخير اخواتي الحبوبات والله ييسر لي ولكل الكروشات

انا دخلت التاسع من اسبوع تقريبا وبدأت ساعه الصفر بالاقتراب
قلت لازم بسرعه ارتب اموري واجهزها وانا باقي فيني شوية حيل وقبل ما تفاجأني الولادة
وطبعا انا فريت في المنتديات ولقيت كل واحده لها طريقة وكلام وما صرت ادري وش اختار ووش المفيد من غيره
عشان كذا حطيت هالموضوع عشان تساعدوني بس ياليت من اللي جربت الشي وجاب معها نتيجه وياليت بالتفصيل
يعني طريقة الاعداد ومقدار المكونات ووقت الاستخدام

طبعا انا ابغى طريقه تمرة النفاس اللي ينحط معها الرشاد ولو سويتها اللحين هل اقدر اسوي كمية كبيرة واحفظها في الفريزر ولا لازم تكون طازجه
وكمان مكونات شاي الاعشاب ومقاديرها وهل اخليه يغلي مره ولا شوي بس
واخيرا طريقه اللهوم ( السفوف ) وما هي مكوناته وكمان هو هل اقدر اسوي منه كميه واحفظه ولا كيف

وهذي الاشياء هل استخدمها من بدايه النفاس ولا متى
واللي عندها نصايح مفيده عن تجربه ياليت ما تبخل علينا بها

استناكم ولكم مني كل الحب

تمرة النفاس تعجنينها بسمنه وشوي رشاد اقل من ملعقة الشاي انتبهي تكثرينه لانه ينشفك
تبدين فيها من اول النفاس الى اخره العشرين الاخيره كثري كمية الرشاد حطي ملعقه صغيره كامله
زوجة اخوي تحط معها قشر قهوه مطحون شوي وتحط فلفل اسود وتحط شوي كمون وتاخذها الصبح فطور
وقبل الفطور تطحنين حلبه كوب وتحطين فنجان عويدي قرنفل وفنجان فلفل اسود وفنجان حبه سوداء وتخلطينهم مع كوب الحلبه المطحونه وتحطينها بعلبه وتقومين صلاة الفجر تاخذين ملعقه صغيره على كاس حليب محلى بعسل
وتنامين واذا قمتي الساعه سبعه تاخذين تمره على قهوه واحسن سويها طازجه احسن من الفريز الا اذا عندك ضروف
والساعه 9 او 10 افطري فطورك العادي اما رغيف بعسل او ساندوتشات الي تحبينه
والغداء لازم يكون مرقوق او مراصيع او كباب لحم او دجاج
والعصر تشربين شاي الاعشاب مكون من قشر قهوه كمون يانسون فوه قرفه شوي مراميه شيح وقيصوم
بعدها تاكلين شي خفيف فطاير او اي نوع ساندوتش بس اهم شي لاتجوعين
وقبل العشاء بساعه او بعد العشاء بساعه اشربي مغلي حلبه او اشربي شاي اعشاب
الحلبه ركزي عليها مغليه وسفوف مدة 14 يوم بس ووقفيها
وحطي بدالها فنجان رشاد وملعقه فلفل اسود وملعقه محلب وملعقه عويدي قرنفل وتاخذينها الصبح بدل الحلبه سف من بعد ال 20 يوم افضل
امي نفاسها 20 يوم حلبه و20 يوم رشاد
افدتك بالي اسمعه وادعي لي يوم تولدين ربي يرزقني الذريه الصالحه وتعدي عمليتنا على خير ويجبر خاطرنا

ما عندي اي معلومات عن هذه الاشياء
اظن اختلاف العادات من بلد لاخر

اللي اقدر اقولة اني ياعمري اشتريت اعشاب من حرمة بس للامانة جدا ممتازة الصراحة تنشف وتنظف وشغلها مرتب ونظيييف والاهم النتيجة جدا حلوة الحمد للة