السلام عليكم ورحمة الله اخواتى

احب ان انقل لكم تجربتى مع مركز جنين واللى هو مركز دكتور حسام زكى قبل ما نتيجة تحليلى تظهر حتى اكون ايجابية ولا تؤثر على النتيجة بشكل سلبى

والله كل كلمة سوف ارويها هى ما حدثت بالفعل لأنى مع مرجعاتى للملف وجدت بنات كثيييير ناويين يعملوا العمليه هناك

اولا انا اخترت مركز جنين بعد ما قتلت نفسى بحث على النت ووجدت انه مركز ذو سمعة متميزة وله نتائج هائلة ربنا يكرمنى زيهم اللهم امين

ذهبت انا وزوجى والحقيقة ان زوجى يعانى من بعض المشاكل فى الحيوانات المنوية وكتب له الدكتور دواء اسمه mfsو شكر فيه كثيرا

والحقيقة انى وجدت ان الدكتور بيكتب هذا الدواء لجميع الأزواج اللى بيروحوله ... ما فيش واحدة اتعرفت عليها فى المركز الا لما قالت لى ان زوجها بياخد الدواء ده حتى وان كان سليم مائة بالمئة

وطبعا هذه النقطة عليها علامة استفهام كبيرة خصوصا ان الدواء لا يباع الا فى صيدلية المركز وثمنه 485 جنيه

ووجدت نظاميين للدفع فى المركز نظام مميز باسم ellite ونظام العادى بتاع الناس الغلابة

النظام المميز له استراحة انتظار منعزلة عن الأستراحة الأخرى والدكتور حسام بنفسه هو اللى بيتابع كل شئ من الألف للياء لأعضاء هذا النظام طبعا مع العلم بأنه ضعف الثمن فى كل شئ حتى فى سعر العملية والتحاليل والسونار وكل شئ ضعف الثمن

ولأنى احمل الجنسية المصرية لأن بابا مصرى ووالدتى لبنانية تعاملت مع المركز على انى مصرية لأن الجنسيات الأخرى بيبقى لهم اسعار مختلفة

المهم اول مقابلى مع الدكتور حسام بصراحة كانت مميزة وهو قادر على ان يقنعك بأى شئ وانه علامة فى مجالة وهذه حقيقة على فكرة

ولكنه لم يطلب منى اى تحاليل وقالى كله تمام

بعد كدة كنت اجلس مع صديقة لى تعمل فى مختبر تحاليل للدم ... واقترحت عليا اعمل شوية تحاليل فى المعمل تبعها وكان الدكتور لما يطلبها منها استقبال الجسم للأجسام المضادة وقلت اعملها ومش حخسر حاجة واهو اطمن

وبالفعل طلعت ايجابية .... طبعا هذه كانت نقطة صغف عند الدكتور لأنى لو لم اعمل التحاليل ما كان سيعرف

وذهبت له بالتحاليل فلم اجد الدكتور حسام وقابلت الدكتور هانى فطلب منى هو تحاليل اخرى كلفتى 930 جنية وقالى دى تحاليل التجلط

عملتها وكان وقت ميعاد العمليه انتظرت الدخول للدكتور لمدة 6 ساعات متواصلة وكانت النهاية انى قلبلت دكتور حسام لمدة 10 دقايق فقط ودى كانت اخر مرة اشوف دكتور حسام فيها ..... تخيلوا ..... مركز دكتور حسام ذكى لم اراه و مرة فى متابعة التبويض ولا مرة والله العظيم رغم انى عملت متابعة تبويض لمدة اسبوعين يعنى رحت هناك اكثر من مرة وكل مرة اقول حقابل الدكتور حسام الاقى الدكتور هانى المساعد بتاعه

وأسال على الدكتور حسام يقولى لى اصله فى العمليات وزملائى اللى فى الأيليت يقلبهم الدكتور حسام ويشرف على متابعة التبويض عندهم

وقبل عملية الشفط فى اخر متابعة للتبويض صممت انى اقابل دكتور حسام وكنت فى المركز من الساعة 10 تخيلوا المنسقة قالت لى تعاليلى الساعة 6 مساء يكون فضى.... طبعا فضلت ان ادخل لهانى بدلا من الأنتظار الطويييييييل للدكتور حسام

عملية المنظار لا ادرى مين اللى عملها لى .... لكن عملية الشفط لما سألت قالولى الدكتور هانى لأن دكتور حسام لسه مجاش طبعا كانت صدمة بالنسبة لى

وفى النهاية قابلت الدكتور حسام .... فى عملية الترجيع لم يتكلم مع ولا كلمة واشتغل علطول

انا كنت فاكرة انى حيورينى الأجنة زى ما سمعت انه بيورى الأجنةعلى المونيتور وسألت هو انا مش حشوف الأجنة البنت قالت لى لأ رغم انى على علم تماما انه بيعمل كده فعلا

طبعا وهو بيرجع لى الأجنة كان نفسى اسأل كام بويضة اتخصبت ورجع لى كام جنين بس مدانيش فرصة الفرصة الوحيدة اللى اخدتها لما راح يجيب الأجنة سألت البنت الممرضة وهى اللى سألته

هى عايزة تعرف يا دكتور رجعت لها كام جنين قام قالها 3 ولم يوجه لى اى كلام وسابنى ومشى ... يعنى لو لم تسأله الممرضة مكنتش حتى عرفت هو رجع لى كام جنين

ادى تجربتى مع مركز جنين والدكتور حسام الذى لم اقابله منذ بدء العملية سوى 3 مرات حتى عملية الشفط لم يعملهالى

دفعت 20 الف و218 جنيه بالظبط فى هذه العملية ولو حدث حمل سيكون الفضل بعد الله سبحانه وتعالى للدكتور هانى وليس للدكتور حسام ابدا ابدا

غير بقى تجارب الستات اللى اتعرفت عليهم هناك من المركز طبعا مع الأنتظار الطويل والممل لازم تتكلمى مع حد

اتعرفت على واحدة كانت حامل فى تؤام ولم يكمل الحمل قى الشهر السابع لأنه رفض انه يعملها عملية ربط

وسيدة من الأسكندرية حامل ولديها نزيف دم شديد والدكتور رافض يقابلها لأنه مشغول وطلب من المنسقات انهم يقعدوا معاها

بالأجماع الناس كلها بتقول انهم فى المركز لا يهتموا بالحوامل ومتابعة الحوامل وانهم بيهتموا بالعمليات

حتى العمليات انا بقول من تجربتى الشخصية انهم مش بيهتموا لأنى انا دافعة 20 الف جنية حتى يتابعنى حسام ذكى بنفسه مش المساعد بتاعه

وللأمانة مع طول الأنتظار يا ما سمعت زغاريط وناس حملت وايضا فى ناس نتيجتها فشلت ولعياذ بالله

معلش طولت عليكم بس حبيبت احكى لكم عن تجربتى

وفى الأخر الحمل ده بأيد ربنا سبحانه وتعالى مش بأيد الدكتور حسام او هانى

السلام عليكم
أختي فيه بعض الناس اللي تنجح في حياتهاوتشتهر تحس نفسها أنها أصبحت شخصيات كبار وتتغر بحالها والعياذ بالله ونحن عندنا مثل في تونس يقولٍ ًًً اللي سماك غناك ًٍ اي من كثرالناس ما يمدحون الشخص حتى يتمادى ويصبح غير ملتزم ولا يعطي قيمة لناس وكأنه يتمزى أو يصدق عليهم لله في سبيل الله ولا يعرف المريض كم يعاني حتى يسمع كلمة تطمنه
أختي الرزق بيد الله وحده فهو يضع سره في أضعف مخلوقاته وإن لم تكن على يد حسام باشا لكانت على يد دكتور مبتدئ
اللهم يا فتاح يا رزاق أرزق أختي بالذرية الصالحة وثبت حملها وفرح قلبها وزوجها يا حي يا قيوم

جزاكى الله اخت neyoula

وربنا يتقبل منك الدعاء اللهم امييييين

وبالفعل كلامك كله صح وانا لو كنت قريت تجربة مثل تجربتى هذه على اى المنتيديات على النت وانا بعمل سيرش عن المراكز كنت فكرت مائة مرة قبل الذهاب اليه

لأن زى ما تفضلتى وقلتى الواحدة بتبقى نفسها تتطمن والمركز كله قائم على سمعة الدكتور حسام

ياالله نفسى اطلع حامل يارب بكرمك وفضللك يا رزاق يا ذو القوة المتين

لا حول ولا قوته الا بالله يا حبيبتي المراكز ديه انا بسميها دكاتره التجاره اهم حاجه عندهم يلمو فلوس وخلاص الاول كويسين ويشتهرو وبعد كده عوضك علي الله

وان شاء الله ربنا يرزقك بالحمل بس عليكي بالاستغفار والدعاء

جزيت خيرا لنقلك تجربتك بالتفصيل جعلها الله في ميزان حسناتك.

جزاك الله خير

ربنا يكرمك يارب و يثبت اجنتك و تكونى حامل يارب يا كريم و تبشرينا إن شاء الله

السلام عليكم ورحمة الله وبركاته

اولا يا اختى ربنا يكرمك يااارب ويثبت أجنتك ويفرحك بالحمل يااااارب يااارب انه على كل شىء قدير

و كلامك ومعاناتك دى ميحسش بيها الا اللى جربها فعلا....

انا فى تجربتى الاولى فى الحقن المجهرى تعاملت مع طبيب مشهور فى اسكندريه يعتبر هو رقم 1 فى اجراء هذه العمليه هناك

طبعا التكاليف اقل بكتير من تكاليف مركز جنين لأن هو يعتبر الاغلى اذافه الى الزيادات اللى بيطلبها زى دوا الزوج وعملية المنظار وتحاليل التجلط

يعنى انا عمليتى اتكلفت 12 الف جنيه.....لكن كانت نفس المعاناه من انتظار طويل يصل لخمس وست ساعات

ودا نتيجه ان الدكتور مشهور والمركز سمعته طيبه فابلتالى الزحام الشديد والانتظار امر غالبا بيكون عند معظم الدكاتره

الفرق الوحيد انى اللى كان بيتابعنى من اول مقابله لحد وقت الارجاع هو الدكتور بنفسه لان معندوش مساعد....( وسمعت بعدها انه جاب مساعد معرفش دا حقيقى ولا لأ)

لكن نفس الحكايه مفيش كلام..كل شىء باختصار يوم الارجاع لا شفت الاجنه و معرفتش عددهم الا لما سألت الممرضه وهى سألته زيك بالظبط

فمعلش ياأختى دى ضريبة انهم مشهورين و الكل بيروح عندهم و انا اللى كنت مصممه انى اروح عنده

و الحمد لله على كل شىء وقتها العمليه منجحتش وطبعا لما روحت بعدها عشان اعرف اى سبب يريحنى مكنش عنده اسباب و كان بيتفق معايا انى اعيدها الشهر الجاى

ولما قررت اعيد العمليه كنت محتاره ومش حابه انى اعيدها عنده رغم نتايجه ونسبة النجاح الكبيره اللى بنسمعها وبنقراها

والحمد لله انه ربنا وفقنى لطبيب فى بلدى رفضت اروحله فى المره الاولى عشان سمعة الطبيب المشهور...لكن بردو مركزه فى اسكندريه و طبعا كنت مرتاحه جدا من الانتظار الطويل وكل شىء تحت اشراف الدكتور ولما بحتاج اسأل فى حاجه بطلبه وبيرد عليا فى اى وقت حتى الان وانا متابعه معاه حملى

اكيد الدكتور الكبير مأخدش سمعته من الفاضى لكن والله احنا فى ظروفنا دى و العمليه دى بالذات الواحد محتاج الراحه النفسيه والاهتمام وان حد يسمعله ويفهمه اكتر من اى حاجه و فى النهايه كله بأمر الله مش بس بمهارة الطبيب او سمعته

واسفه انى طولت عليكى

ربنا يكرمك يارب بالحمل السليم الثابت

ويعوض تعبك خير

انا عملت الحقن عند مركز الدكتور ابو الغار
وربنا رزقني بابنتي في المره التانيه
عقبالك يارب
حاسه بكل كلمه قلتييها
بس لما تسمعي كلمة حامل باذن الله
كل شيئ هيهون
ربنا معاكي

السلام عليكم اختى ربى كريم

ما تتصوريش انا قد ايه حسيت بكل كلمة كتبتيها ...............وده لانى ببساطة عشت كل الكلام اللى كتبتيه ومريت به وبالتالى كنت حاسة انى انا اللى كاتبة الكلام ده من واقع التجربة الطويلة اللى عشتها واللى استمرت حوالى خمس سنوات فى رحلة البحث عن حلم الانجاب والامومة.........................

انا كمان كتبت تجربتى قبل كده فى مركزى ابو الغار وجنين وهانزلك هنا الرابط بتاع مركز جنين علشان تقريه ...........
الحقيقة انا كنت عارفة ان مركز جنين زى ما له مميزات له مساوىء وكان اكتر المشاكل اللى بتواجهنى هناك هى الانتظار الطويل الممل تمام زى ما وصفتى واللى كان ممكن يستمر بالخمس والست ساعات وكمان كنت بخاف اوى ادخل لدكتور هانى لانى عارفة ان مستواه اقل من د-حسام بكتير وكنت بستنى علشان ادخل لدكتور حسام ولكن انا ايام محاولتى الاخيرة هناك من سنة ونصف تقريبا ماكنش لسه عمل النظام الايليت وكان كله نظام واحد وكان هو غالبا اللى بيعمل بنفسه كل حاجة ...........يعنى انا تقريبا ما دخلتش لدكتور هانى غير 3 او 4 مرات اثناء متابعة التبويض فقط اما المنظار وسحب البويضات ونقل الاجنة كله كان عن طريق د-حسام ............

انا طبعا استفدت من التجارب الفاشلة اللى عملتها عند ابوالغار او عند جنين نفسه المرة الاولى وحاولت انى ما اكررش الاخطاء يعنى مثلا عملت كل تحاليل التجلط المطلوبة وكمان تابعت مع دكتور مخصوص لامراض الدم علشان يحدد لى بالضبط جرعة ادوية السيولة اللى المفروض اخدها طوال الحمل ولم اكتفى براى دكتور حسام فقط وكمان عملت عملية الربط فى مركز جنين واخيرا لما خلصت الشهر التالت وعملت الربط تركت مركز جنين تماما وتابعت الحمل مع اقرب دكتور لمحل سكنى واخترت دكتور هادى وشاطر وعيادته مش زحمة علشان حالتى كانت لا تسمح بالانتظار الطويل وطبعا بعد ما اتعقدت من كتر الانتظار فى مركز جنين .........لانى افتكر انى اخر مرة رحت فيها مركز جنين بعد عملية الربط انتظرت حوالى ست ساعات علشان ادخل لدكتور حسام لدرجة انى روحت ضهرى متكسر من كتر الالم وخاصة ان حالة حملى كانت حرجة بس طبعا لا حياة لمن تنادى وهناك محدش بيرحم......................
ويومها حلفت انى ما هروح له تانى وفعلا ربنا وفقنى فى الدكتور اللى تابعت معاه باقى شهور الحمل والحمد لله.....................

المهم اللى عايزة اقولهولك ان كل مركز فيه عيوب وفيه مزايا وانا من واقع تجربتى فى الموضوع ده خمس سنوات اقدر اقولك ان مركز جنين رغم كل المشاكل دى يعتبر احسن الوحشين ................

انتى توكلتى على الله وعملتى اللى عليكى واخترتى المركز اللى نسبة نجاحه عالية وما بقى لك الا الدعاء واسال اللى سبحانه وتعالى ان نسمع احلى خبر منك يوم التحليل ان شاء الله..............

ده رابط تجربتى الاولى بمركز جنين ولم يكتب الله لها النجاح..........

http://www.lakii.com/vb/showthread.php?t=357402


ولكن ابشرك بان تجربتى الثانية والحمد لله نجحت ورزقت منها بتوائمى الثلاثة الله يباركلى فيهم ويرزقك مثلهم يا رب..............