السلام عليكم وعدتكم اني اكتب قصتي .. واتمنى انكم ماتملون منها .. بدات القصة شهر ربيع الاول العام الماضي لما تاخرت الدورة بعد 5 اشهر زواج حللت وكانت النتيجة ايجابية فرحت انا وزوجي ومارحت للطبيبة الا ببداية الشهر الرابع لما نزل مني دم خفيف سوت سونار قالت انو المشيمة نازلة درجة بسيطة سالهازوجي عن جنس المولود قالت انو ولد وزااااااااااادت فرحتنا بس قالت لازم ترتاحين علشان ترتفع المشيمة بالشهر الخامس وبدات المعاناة وفارقت زوجي حبيبي ورحت عند اهلي والنفسية تعبااااااانة بكاء وصياح طوال الوقت .. المهم الله كريم داومت ع سورة البقرة والاستغفار وفي اسبوع رجعت المشيمة لوضعها الطبيعي وقف الدم بس ظليت عند اهلي شهر كامل علشان ارتاح ..
المهم .. باول يوم بالشهر الخامس حسيت بحركة كتكوتي انكبت مويه قليلة توقعتها افرازات خبركم بكرية وجاهلة .. رحت للاسعاف سوت سونار قالت كل شي تمام وسوت كشف داخلي اخذت مسحة وطلعت النتيجة انو انا سليمة من اي التهاب وذكرت في التقرير انو انا سليمة من ثلاث ميكروبات واخذت الورقة معي...
استمرت الموية تقريبا تنزل لمدة اسبوع ووقفت ورجعت عند زو جي علشان موعدي عند نفس الدكتورة اللي شافت المشيمة.. سالنا عنها قالو باجازة رحت لدكتورة ثانية سوت سونار قالت كل شي تمام خبرها زوجي عن المشيمة والمويه اللي كانت تنزل قالت لا لازم نسوي كشف داخلي صاااحت لازم تنويم اعطيناها ورقة التحليل واللي تقول انا سليمة من اي ميكروب صاحت قالت فيني ثلاث ميكروبات خطر علي وعلى البيبي لازم تنويم رفض زوجي قال شوفي زين التقرير يقول انو (negative) يعني سلبي مش (positive) قرات التحليل ثاني قالت صح سليمة بس لازم تنويم علشان المويه رفضت انا وزوجي وخرجنا على مسؤليتنا...... >>> وهنا بدات المعاناة الكبرى<<< رجعنا البيت تغدينا راح زوجي للعمل شوي
وانكبت الموية كلها دقيت ع زوجي واخذني لمستشفى المواساة نوموني اسبوع صياح وبكاء ووحدة قاتلة وقفت الموية وخرجت ظليت بالبيت 4ايام ع السرير يوم الخميس تحركت حركة صعبة شوي الا والموية تنكب بس هالمرة معها شوي دم مارحت للمستشفى ذاك اليوم نمت بالبيت بس والله ياخواتي كل ماتحركت حركة ع السرير الله لايوريكم الشر المويه تنكب قلبت ع جنبي اليمين تنكب اليسار تنكب ظهري تنكب عذاااااب لين صحا زوجي وداني المستشفى المواساة وقفت الموية سوت الممرضة كشف داخلي قالت ليش جاية مافيه اي مشكلة تبين تتنومين --------> الاخت بتنومني على حسابها..... تنومت ويومين ماشفت دكتورتي
ابد الى ان جاء يوم السبت الساعة8 ليل زوجي عندي بالغرفة ابي اروح للحمام نزلت من السرير الا الدم انكب ع الارض وملابسي كميااااااااااات كبييييييرة غيرت ماجتني ولا دكتورة بس الممرضة جابت ملابس والثانية تقيس الحرارة ونبضات الجنين كل ساعتين تقريبآ ... المهم صاح زوجي جيبو اي دكتورة قالت المناوبة انا طبيبة قلب وراح اشيك ع قلب النونو غيره مااعرف شي طوال هذاك الليل وانا انزف لدرجة ان الفوط جنبي اشيل واقط اللي استخدمتها بكيس جنبي مايمدي اغير بالحمام......... يااخواتي حسيت اني بمووووووت جاء الصباح ... واخيرآ .... شرفت الاخت دكتورتي قالت لازم نعطيك طلق صناعي ننزل البيبي وانا لسا بالاسبوع الثالث من الشهر الخامس رفضت نزلوني تحت سوت سونار نادت طبيب الاشعة صاح فيها فيه انفصال بسيط بالمشيمة ولافيه الا جيب واحد من المويه حول البيبي رجعوها عند دكتورتها رجعوني للغرفة محد جاني انجن زوجي طلعني بسرررررعة والدم ينزف لمستشفى المانع
وظليت عندهم ثلاث اسابيع شغلهم ممتاز بس طوال الوقت وانا اصيح وابكي من الهم اللي ذبحني معاناة لي شهرين ونص وانا نزيف ومويه وتنويم ووحدة تذبح زوجي اشوفه باليوم حوالي 5ساعات وباقي الوقت لحالي انا ودموعي صاحبت الممرضات ولاتهنيت بنومه عدلة اذا تحركت اي حركة تنكب موية ودم وكل ساعتين يجون ممرضات لقياس الحرارة ونبض البيبي وتنظيف الغرفة والاكل ووووووو المهم مانمت 4ساعات على بعض قالت الدكتورة في حالة ارتفعت حرارتك راح ننزل البيبي لانو خطر عليك... يوم جاء يوم الجمعة 8-8-2008بالليل جاني مغص قوي وبفجر السبت قاسو درجة الحرارة لقوها37,8قالو لازم ولادة رفضت لان الالم اختفى بالصباح المفاجاة ان اهلي زاروني ذاك اليوم وانبسطت السبت بالليل زاد الالم ببطني وبظهري ماقلتلهم خفت يودوني للولادة وانا ابي احافظ على الكتكوت اطول مده علشان يعيش اذا انولد بدري واستمر الالم يوم الاحد الى ان جات الساعة9 ليل حسيت بان الله ماراح يخذلني وبيفرج همي قريب الساعة12ليل ناديت الدكتورة قلت لها عن الالم كشفت لقت الرحم مفتوح 2سم نزلوني ع غرفة الولادة ويزداد الالم وطول الوقت استغفر وادعي ربي يهون علي اقرا سورة الملك والحمد لله ولدت الساعة ست صباح بس هنا كانت المفاجاة اللي ماجت على بالي ...........
جبت كتكوت مافيه اصابع سبابة سواء باليد اليمنى او اليسرى .. والاغرب سبحان الله مافيه قدم يسرى يعني ساقه توقف نموها الى النص مااكتمل القدم وطلع منها عظم حاد مسنن ماكساه لحم هو اللي يشق كيس الماء كل ماالتحم الشق رجع من جديد رجله اليمنى كانت تنزف بسبب رجله اليسرى لانه يحتك فيها غير التشوهات اللي ممكن تكون موجودة داخل الجسم وعاش بس خمس ساعات ومات عسى الله يعوضني خيرآ منه..
حبيت اقولكم انو طوال الفترة وانا بالمستشفى وانا ادش على منتدى لك بصراحة استفدت منكم كثير ومن مشاكلكم سواء المشيمة او المويه او طريقة التنفس اثناء الولادة وووو غيرها كثييير المهم انكم انستو وحدتي الله يجزاكم خير ويبارك لكم في ذريتكم ويرزقني وكل محروم بالذرية الصالحة المعافاة..آمين .. آمييين..
برضوه حبيت اذكر كذا نقطة مهمة عن تشوه كتكوتي ..
1-في اليوم اللي المفروض تجيني الدورة فيه لكن ماجتني يعني كنت حامل وانا ماادري حضرت زواج ومررت علي حارسة القصر جهاز كشف الجوال وسالتني ان كنت حامل قلت لا لاني ماكنت اعرف اتوقع انو هذا سبب التشوه فاحذروا احذروا
2-كنت مشقرة حواجبي ذاك اليوم وهذا ممكن اثر رغم ان الدكتورة تقول ماله دخل
3- كنت اغتسل بعد كل جماع بماء وديتول ممكن انو اثر على الحيوانات المنوية والبويضة
4- او ممكن انو هذي الاشياء مالها دخل كل شي من الله بس لحكمة لايعلمها الا هو سبحانه يعجز لساني عن حمده وشكره... ماخذلني لما رجوته ودعوته بان يفرج كربتي
حبيت اذكر كم نقطة عن مستشفى المواساة واهماله صحيح فخامة بالمبنى لكن انا شفت اهمال لي غير انو الممرضات عندهه ورقة يسجلون فيها درجة حرارتي كل ساعتين لكن هم حقيقة مايجوني كل ساعتين كل اربع او ست ساعات يجون .. لكن هم يسجلون انهم يشيكون علي كل ساعتين ويسجلون درجة حرارة من عندهم وهم والله يشهد انهم ماقاسو حرارتي
واتمنى انكم ماطفشتوا من قصتي الطويلة اللي تخفي بين ثناياها احداث اطول ماذكرتها علشان ماتملون واتمنى ماتبخلون علي ولو بدعوة وشكرآ لترحيبكم بي وانا في الخدمة...
الروابط المفضلة