كتبت بواسطة marwa81

ميرسى كتير للى عمل للموضوع رفع
الموضوع من زمان والواحد كان ناسيه مشمشه انا موجوده لو عاوزة تسالى عن اى حاجه

ايوة يا مروة انا والدتي اتصلت بالدكتور عادل عشان تحجزلي معاة تاني يوم سفري لكن السكرتيرة قالتلها انة بيولد قيصري بس؟؟؟؟؟؟؟؟ هو فعلا بيولد قيصري ؟؟
وهل لو بيولد قيصري بيستني عليكي ولا بيولد زي معظم الدكاترة في اول اسبوع من التاسع ؟؟
وهل فية رعاية كافية للبيبي لاني عرفت ان المستشفي في الدور اللي فوق العيادة هل مستشفى نضيفة ولا زي مستوصف؟؟ يعني فيها امكانيات ؟؟؟

وانا شاكرة جدا لاهتمامك وجزاكي الله خيرا

انا ولدت فى مستشفى القاهره التخصصى للجراحه والولاده وعنوانها ف ميدان الساعه مساكن كفر طهرمس فيصل ومستوى الخدمه فيها ممتاز ومع الدكتوره نجلاء ذكى الوحش وخادو 1400 قيصرى والدكتوره اسعارها كويسه 30 كشف و30 سونار وهيا دكتوره زى العسل وتحبى موت تتكلمى معاها ده انا ساعه ماولدت بقول لجوزى الحاجه الوحيده اللى مزعلانى معتش هشوف الدكتوره عسوله جدا اوى خالص موت

كتبت بواسطة heba twoins

السلام عليكم و رحمة الله و بركاته

اولا كل عام و انتم بخير بمناسبة رمضان
أنا من سنتين و اربعة شهور ولدت في مستشفى اليوناني ( جنب الايطالي) مع الدكتور احمد حسان و هوبيولد في الاتنين .
دفعت 2450
الدكتور احمد أخد 1550 (قيصري ) و هو طبيب شاطر جداااااااااا والعملية نظيفة و مش باينة اصلا في بطني الا انه عبوس الوجه هو وطبيبة السونار اللي معاه في العيادة . ولهذا السبب انا مش معاه في حملي هذا .
ومستشفى اليوناني غرفة مكيفة منفردة بسرير للمرافق اخدت 900

وفي حملي هذا مع الطبيب الماهر الانسان بشوش الوجه حسن عواد
المتابعة 800 بالسونار طوال الحمل
وسعر الولادة لا اعلم وسمعت من واحدة انه ب5000 للقيصري . والله اعلم لو اتأكدت هقول لكم و لو حد فيكم سمع عنه ( عيادته في ش جسر السويس امام مستشفى منشية البكري ) يقول لي برضه يطمني .

هبه

جزاكى الله خير يا هبة على المعلومات المفيدة
ربنا يتمم حملك على خير وتولدى بالسلامة بصراحة ماليش علم بالدكتور دة خااالص لكن انا الدكتورة نشوى اللى قلت عليها دى بردو ممتاااازة وف منشية البكري بردو شوفي المشاركة الاولى وربنا يقدرلك الخير ان شاء الله

كتبت بواسطة سكون الخريف

السلام عليكم و رحمة الله و بركاته

أنا لم أشارك في المنتدى من قبل
لكن الموضوع أفادني و وجدت إن البعض بيبحثن عن طبيبات سيدات و حبيت أدلكم على طبيبتي و أنا متابعة معها منذ سنوات و لله الحمد و مريت معها بتجارب عدة و جربت أيضا معها الولادة القيصرية.. و بصراحة أتفاءل بها جدا..

الحمد لله هي كما رايتها لا تفضل القيصري لأنها تحب أكثر أن تلد المرأة طبيعي .. من كلامها فهمت طبعا أنها ترى إنه صحي أكثر

لكن إذا اضطرت للقيصري فتجريها
ما شاء الله تبارك الله خياطتها نظيفة و صغيرة و غير واضحة ... غير إنها تهتم بأن تضع ساتر كبير في غرفة العمليات إذاا أضطرت لإجراء الولادة بدون طبيبة تخدير.. و لما تلاحظ اهتمامك بالستر بتحافظ عليه قدر المستطاع

و كانت تلقني الأدعية و تطمئني جدا و ما شاء الله تكون بشوشة في غرفة العمليات فتجعلك تهدئين

حفظها الله

اسمها نوارة محمد حشيش .. عيادتها في برج الأطباء في أول فيصل و تجري الولادات في مستشفيات بالمهندسين .. و هي دكتورة في القصر العيني

حبيت فقط أضيف طبيبة للطبيبات المتميزات
و أتمنى تكون إضافة مفيدة

جزاكن الله خير

جزاكى الله كل خير يا سكون ربنا يكرمك يارب طبعا مفيدة جدا

اتمنى من جميع البنات انهم يهتمو بموضوع طبية وليس الطبيب

كتبت بواسطة salmadodo

الاسم:

مستشفي الشروق

والعنوان:

شارع مصطفي فهمي رقم 9 -جليم- الاسكندرية

ولو الاسعار:

الجناح 1850 شامل كل الخدمات ماعدا المضادات الحيوية وجهاز قياس نبض الجنين
والدرجة الاولي 1600

مستوى الخدمات والمعاملة:

ممتازة جداً انا منتقبة والحمد لله مكنش في رجالة في غرفة العمليات وراعوا ده جدا ولبسوني النقاب وانا طالعة من العمليات لغاية الجناح

مستوى النضافة :

نظيفة جدا وبيهتموا بنظافة البيبي جدا وبيحموه تاني قبل ما يخرج من المستشفي وبينضفوا الام كويس

اسم الطبيبـ/ـة المعالج:

د/ هبة حامد دراهم

عنوان الطبيبـ/ـة:

مصطفي كامل بجوار مسجد الفتح

تقييمها له/ـا واسعار الكشف والولادة:

كويسة جدا وبتسمع كل اللي عاوزة تقوليه وتستفسري عنه وممكن تتصلي بيها في اي وقت تساليها علي اي حاجة
الكشف عندها 45 والاستشارة 15
والولادة كانت قيصري اخدت 1500 شاملة دكتور البنج

شكرا جدا ياسلمى متشكرة على الافادة

كتبت بواسطة doma

ارجو تدلونى على دكتوره في المعادى وبتولد فين

بصراحة معنديش فكرة اتمنى م البنات يدلوكى وربنا يتمملك حملك على خير يارب

كتبت بواسطة أم الذبيح

موضوع راااااائع بجد
بس عيبة الوحيد مفيش حد اشترك من الاقليم ياعنى الشرقوية الجدعان
احسن ناس او حتى الدميطية الرائعيين الكرمة
ايه يا جماعه محدش بيولد الا فى القاهرة
زعلتونى بجد يلى ارفعوا الموضوع تانى وكل وحدة تكتب ولدت فين
حتى لو فى قرية او نجع هههههه
اكيد لو مستشفى نظيف هتشكرى فيه وتسعدى واحدة بجد محتاجة معلومة


طب ادخل انا
ماشى
ولدت فى مستشفى التيسير (الزقازيق. الشرقية)
الدكتور/وائل البرمبلى
اسعار طبيعى مع طبيب تخدير ابرة الظهر1500 قيصرى 2000 من حوالى ثلاث سنوات
المستشفى جميلة ونضيفة اوى
الدكتور كان هادئ ومبتسم على طول
وان شاء الله المرة الجايه لما ربنا يرزقنى اتابع مع طبيبة
ادعولى بقأه

شكرا لاضافاتك يا ام الذبيح برااافو عليكى قرااار هايل بجد ان شاء الله تتوفقي ف دكتورة كويسة

كتبت بواسطة om mariom

انا ولدت اول مرة عند
الدكتور هاني المغربي من مركز جنين في مستشفى جابر بن حيان بالدقي وهو دكتور ممتاز جداااااااااااااااااا وكان ب 2000 من سنتين ونص.ده طبعا قيصري.
أما الولادة التانية كانت مع الدكتورة منال حلمي عبد اللطيف
وهي دكتورة فوق الممتازة واول مرة اشوف دكتورة اجمع عليها معظم الناس اللي اعرفهم اصحابي وقرايبي كلهم بيولدوا ويتابعوا عندها.
وهي بتولد في مستشفى الدكتور احمد صديق بالمنيل وهي مستشفى كويسة ومعاها مركز حضانات اطفال لو الطفل لا قدر الله احتاج حضانة وولدت عندها ب 1250 من شهرين وايضا قيصري وعيادتها في السيدة زينب - زين العابدين

حمدلله على سلامتك يا ام مريم ربنا يجعل ولادك زرية صالحة يارب

طب عنوان الدكتورة ورقم تليفونها بعد ازنك لو معاكى تضيفيهم لنا

كتبت بواسطة smsmy

موضوع حلو جدا
تسلمى ياقمر
ياريت ياجماعه اللى ولدت فى الماترنيتيه او مركز سهلا فى الاسكندريه تحكيلى على تجربتها واللى يعرف الفرق بينهم يبقى جزاها الله خيرا

جزاكى الله كل خير ياسمسمة منوورة الموضوع والله

للاسف معنديش اى علم باسكندرية بس في بنات هنا م اسكندرية ان شاء الله يفيدوكى وانا هاحاول اساللك وحدة اعرفها م اسكندرية وارد عليكى بس ياااااااااااااارب ما انساش

جزاكى الله خيرا ياشذى ياقمر
الموضوع منور بيكى ربنا يخليكى يارب
وطالما ليكى صديقه من اسكندريه يبقى جزاكى الله خيرا لو سالتيهالى عن دكتورة بنج لان دكتورتى وعدتنى المره دى انها توفرلى دكتوره فى الولادتين اللى فاتو قالتلى مافيش دكتورة بنج فى اسكندريه وجوزى قالها خلاص مش عايزها تولد ههههههههههههه هخلل البيبى جوه
قولتلها بنجينى لوكال على مسئوليليتى مارضيتش علشان قيصرى
المره دى مش عايزه اسيبلها فرصه تدبسنى فى دكتور علشان لو دى اخر لحظات العمر تبقى فى طاعة الله باذن الله

uppppppppp
للافاده

السلام عليكم ورحمة الله

بنات ارجوكم المساعدة

ياترى في حد فيكم ولد في مستشفى المروة اللى في شارع السودان قبل بولاق الدكتور مع دكتور محمد حسن


ارجوكم افيدونى لانى في التاسع وعلى وش ولادة ومحتاجة اعرف مستوى الستشفى اوى منكم

جزاكم الله خير

والله الموضوع جميل جداا وشيق للغاية انا كمان ولدت قيصرى عند د كتورة سحر زكريااا فى مستشفى بمدينة نصر والحمدلله العملية حلوة والاسعار كمان حلوة ولسة انا حامل وقربت اولد بس مشعرفة اولد فين لانى عوزة مكان قريب من بيت ماما لانى تعبة جداا المرة الى فاتت وانا مروحة من المشواار والطريق كان زحمة جداا وواقف بس برجع وققول خلينى عند الدكتورة الى نعرفو احسن من الى منعرفهوش

كتبت بواسطة سمسما

السلام عليكم ورحمة الله

بنات ارجوكم المساعدة

ياترى في حد فيكم ولد في مستشفى المروة اللى في شارع السودان قبل بولاق الدكتور مع دكتور محمد حسن


ارجوكم افيدونى لانى في التاسع وعلى وش ولادة ومحتاجة اعرف مستوى الستشفى اوى منكم

جزاكم الله خير

حبيبتي انا روحت مستشفي المروه
بس كانت ولاده مبكره في السادس
والي عملي العمليه الدكتور محمد حسن
هيا المستشفي نظيفه جدا وكويسه وفي نايب هناك للدكتور محمد مش فاكره اسمه بس هوا دكتور كويس جدا وشاطر
وكمان عندهم دكاتره اطفال محترمين ووحده عنايه مركزه للاطفال

بس انا لما روحت الكاتب عشان اعمل الربط في الحمل دا ارتحت نفسيا اكتر
المستشفي هاديه اوي والممرضات الي هناك لذاذ جدا
والدكتور محمد بيولد هناك كمان
انتي روحي شوفي الاتنين وقرري

انا عايزه اسألك علي رأيك في الدكتور محمد

كتبت بواسطة doaa hamdy

حبيبتي انا روحت مستشفي المروه
بس كانت ولاده مبكره في السادس
والي عملي العمليه الدكتور محمد حسن
هيا المستشفي نظيفه جدا وكويسه وفي نايب هناك للدكتور محمد مش فاكره اسمه بس هوا دكتور كويس جدا وشاطر
وكمان عندهم دكاتره اطفال محترمين ووحده عنايه مركزه للاطفال

بس انا لما روحت الكاتب عشان اعمل الربط في الحمل دا ارتحت نفسيا اكتر
المستشفي هاديه اوي والممرضات الي هناك لذاذ جدا
والدكتور محمد بيولد هناك كمان
انتي روحي شوفي الاتنين وقرري

انا عايزه اسألك علي رأيك في الدكتور محمد

معلش يا دعاء سؤال هي مستشفى الكاتب فيها دكتور اطفال بيشوف البيبي اول ما بيتولد ؟؟ وهل سرير البيبي معاكي في نفس الغرفة؟؟ عشان انا خايفة اوي جايلي هاجس من تبديل البيبهات

اهلا يا مشمشه انا زي ما قلتلك في الكاتب انا كنت بعمل ربط مش ولاده فمعنديش فكره
الي اعرفه انك لو ولدتي هناك البيبي بيفضل معاكي لحد وقت النوم بياخدوه عشان تعرفي تنامي كويس ويجيبهولك تاني الصبح بدري


وبيتهيألي لازم يكون في دكتور اطفال في غرفه العمليات