بنات لك العزيزات

كل سنة و انتم طيبين رمضان قرب يخلص و العيد قرب يهل

انا عندى سؤال لبنات القاهرة

هلى ولدتى قيصرى و حملتى بعدها بفترة صغيرة و ولدتى طبيعى؟

من فضلكم اللى مرت بالتجربة دى تدينى بيانات الدكتور اللى ولدها طبيعى بعد القيصرى

انا ولدت قيصرى مرة لكن البيبى اتوفى و اضطريت احمل بعدها بسرعة بالظبط حملت بعد الولادة ب 7 شهور
و كل ما اسال دكتور يقولى لازم قيصرى مع ان الولادة التنية هتكون بعد سنة و 3 شهور من الولادة القيصرية

و انا مش عايزة افوت الفرصة لانى لو ولدت دلوقتى قيصرى تانى خلاص هولد قيصرى طول عمرى

ارجوكم ادعولى ربنا يوفقنى فى دكتور شاطر يحاول يولدنى طبيعى و ربنا يرزقنى المرة دى ببيبى سليم و معافى
و اشوف البيبى بخير يارب

السلام عليكم
ربنا يارب يقومك بالسلامه
بس نصيحه فعلا انتتى لازم قيصرى لان الرحم موش هيستحمل
الطلق ابدا لان الفتره بسيطه اوى
فمفيش دكتور هيرضه يولدك طبيعى
وعلى فكره المسأله دى مفيهاش شطاره دكتور هى توفيق من الله
وربنا يقومك بالسلامه وترزقك ولاده سهله يارب

ميرسى يا سلسبيل
ميرسى عالنصيحة و الرد
و يارب تحجى السنة دى يارب

وماله القيصري ؟؟

على فكره كتير جدا من الى حواليه ولدوا قيصري وبيشكروا جدا في القيصري

مش عارفه ليه ديما مرعوبين منه كده مع ان الى شفتهم وربي شاهد كانوا بيمشوا من الليله نفسها لحد الحمام مثلا او يتحركوا حركات بسيطه

كمان يعني هو الطبيعي الى هينط لوحده مهو برضه بيعذب امه لحد ما راسه تخرج

ما تعربيش نفسك ومش عشان مره واحده بس ربنا مقدرش للطفل انه يعيش يبقي المشكله في القيصري

اتوكلى على الله وادعي ديما بإنها تكون ساعه سهله وبسيطه وثقي يقيناً ان ربنا عمره ما هيرد دعوتك خاصة انك وسبق واتعرضتي لحدث مش سهل ورغم كده الحمد له راضيه عن قدر ربنا وقضاؤه

عزيزتى زوجة محمد
ميرسى عالمرور و الرد
حبيبتى انا مش معترضة على القيصرى و عارفة ان وفاة ابنى مش بسبب القيصرى
و الحمدلله على كل حال انا بعد القيصرية الاولى كانت صحتى كويسة و مشيت من المستشفى فى نفس اليوم
لكن الفكرة بس انى بسمع ان القيصرية عدد محدود من الولادات يعنى 3 او 4 بس و فى مرة منهم راحت بدون بيبى و انا و زوجى كان نفسنا فى 3 اطفال طبعا فرصة منهم راحت مع ابنى الله يرحمة
و لازم يكون فى فترة كافية بين الحمل و الاخر حتى لا تزيد مضاعفات القيصرية يعنى ممكن بعد القيصرية التانية يحصل التصاقات
خاصة ان الحمل بعد الولادة بفترة صغيرة
و غير كدة دى اخر فرصة ليا للطبيعى و خايفة فرص القيصرية تنقص اكتر من كدة لا قدر الله
و مع كدة انا مش معترضة عالقيصرى
بس حبيت اسال و اعمل اللى عليا و اللى فية الخير يقدمة ربنا
اهم حاجة عندى اشوف البنوتة اللى جاية و احضنها

ربنا يقومك بالسلامة انت و البيبى و يفرح قلبك

رينا حبيبتى انا متاكدة انك هتقتنعى برئيى لانى اتحطيت فى نفس الحيرة بس عايزة اقولك ان الدكتور ساعتها قالى متحطيش نفسك فى مشكلة لقدر الله ومتعرضيش نفسك للخطر ابدا ولية ان شاء الله تولدى قيصرى احسن لك وللبيبى وللرحم لان خطر عليكى حبيبتى ومش مسالت شطارة دكتور واتكلى على الله المهم انك تقومى بالسلامة وربنا يعوضك خير وعلى العموم سبيها على الله وان شاء الله يعمل اللى فية الصالح
وطمنينى عليكى وعلى فكرة انتى وحشانى اوى وملك ويوسف بيبوسوكى

ان شاء الله الله يعوضك خير ياب وباسهل الولادات

كتبت بواسطة lolo habeby

رينا حبيبتى انا متاكدة انك هتقتنعى برئيى لانى اتحطيت فى نفس الحيرة بس عايزة اقولك ان الدكتور ساعتها قالى متحطيش نفسك فى مشكلة لقدر الله ومتعرضيش نفسك للخطر ابدا ولية ان شاء الله تولدى قيصرى احسن لك وللبيبى وللرحم لان خطر عليكى حبيبتى ومش مسالت شطارة دكتور واتكلى على الله المهم انك تقومى بالسلامة وربنا يعوضك خير وعلى العموم سبيها على الله وان شاء الله يعمل اللى فية الصالح
وطمنينى عليكى وعلى فكرة انتى وحشانى اوى وملك ويوسف بيبوسوكى

لولو حبيبة قلبى
بجد وحشانى خالص بوسيلى ملك و يوسف بوسة كبييييييرة خالص لحد ما اشوفهم
و انا عارفة انى وحشة
بس صدقينى غصب عنى اخويا كان اجازة فى مصر و الاجازة جريت قوام
و كنت ما بصدق اروح اقعد معاه و من كام يوم بس الدنيا اتعكت عندى
رحت للدكتور اللى كان مولدنى المرة اللى فاتت وقع قلبى و قالى المياة تعتبر قليلة بردة
و كتبلى على اسبرين اطفال و حقن كورتيزون
بس اعصابى باظت و رحت عملت دوبلر بس الحمدلله كلة تمام مافيش مياة قليلة و لا حاجة
بس الحيرة بقى دكتور يقول ولد و دكتور يقول بنت و كل واحد يشاور على العضو و ياكد كلامة
و انا مش فاهمة مين فيهم الصح و قلقت اكتر لا ربما يكون فى حاجة و ماحدش عايز يقولى بردة
بس انا سيباها على الله
بالنسبة لموضوع الولادة فعلا كل الدكاترة قالولى ان القيصرية احسن للبيبى و ليا
بس انت عارفة ثقتى فى الدكاترة بقت 0 %
سلمى لى على سلمى و ياريت لما تفطرو مع بعض تعدو عليا انا مستنية من اول رمضان
تسلم ايدك على الرد و المرور يا حبيبة قلبى و ربنا يطمن قلبك

كتبت بواسطة أم حاتم جداويه

ان شاء الله الله يعوضك خير ياب وباسهل الولادات

تسلم ايدك يا ام حاتم و تسلمى عالدعوة الحلوة

بصى يا حبيبتى بامانه طبيعى ولا قيصرى مش حتفرق اللى الدكتور يشوفه احسن هوا ادرى بيه المهم ان النونو يجيللك بخير وسلامه ويقر عينك انت وزوجك ان شاء الله ويقومك بلسلامه وسيبى موضوع الحمل والولاده اللى جايه لوقتها ربنا يكملك على خير وتقومى بالسلامه ان شاء الله