حبايبي , انا البونبونة اختكم في المنتدي و يمكن كتير منكم ميعرفنيش لأني مقيمة في ملف الحقن المجهري , طبعا زي ما اشتركت في المنتدي وتابعت اخبار اخواتي و فرحتهم و احزانهم و زي م كانت التجارب في منها اللي بيديلي أمل ويفرحني لصاحبتها ومنها اللي بيزعلني جدا حبيت اشرككم انا كمان في تجربتي لعل و عسي واحدة تقراها و تديها ولو جزء بسيط من الأمل و السعادة بأمر الله .

بدأت الرحلة يا جماعة بخطوات الحقن اللي انتم عارفينها من تحضير و تنشيط و حقن تحت الجلد , المهم مش عايزة اطول عليكم , دخلت في الجد و سحب البويضات ,
انا مكنتش خايفة يومها و الحمد لله مكنتش عملية صعبة ولا حاجة و خرجت من المستشفى بنفس اليوم , بعدها بيومين كلمت الدكتورة وقالتلي الحمد لله البويضات اتلقحت و الترجيع بكره , فرحت جدا وحمدت الله و رحت تاني يوم وبرضة مكنش عندي قلق ولا حاجة , ساعة الترجيع الدكتورة قالتلي قولي بسم الله و استغفري ورجعت الأجنة وبدأت رحلة القلق الرهييييييييييييييب اطول اسبوعين في حيااااتي كل يوم بيعدي كأنة سنة و انا بين استغفار و قراءة سورة البقرة و دعاء و انا شايفة جوزي متفاءل و فرحان و ده شيء جميل لكن كان بيتعبني اكتر ,كنت خايفة لا قدر الله ميكنش فية نصيب ويتبدل تفاؤله ده حزن فبقيت ادعي ان يا الله لا تحملنا ما لا طاقة لنا به و ياارب علشان خاطر جوزي الطيب اللي كل أمله برحمتك وياارب احنا توكلنا عليك وكلنا ثقة برحمتك يا رحيم لا تخلف ظننا ولا تضيع تعبنا , الحمد لله رب العالمين .

في اليوم التاسع مساء بصراحة مقدرناش و جوزي قال نجيب اختبار و نجرب , انا رفضت خوفا من النتيجة لكن هو قاللي لو مطلعش شيء مش مشكلة احنا المفروض منحللش الا بعد اليوم ال12 اصلا .

في اليوم العاشر فجرا عملت التحليل و ركنتة جانبي انا ببصلة بطرف عيني و اكني بقولة ( منا عارفاك عمرك مفرحتني بخطين بس اهة ادينا بنجرب هههههه ) ,

المادة الوردي جريت في التحليل و عملت الخط الأول واختكم فقدت الأمل لأن مفيش حاجة تاني ظهرت وجوزي واقف علي باب الحمام منتظر ياعيني , فتحت الباب وانا بشاور علي الأختبار بيأس و بقولة ( معملش حاجة ) كان ساعتها عدي بتاع دقيقة بس و افاجىء بجوزي بيقولي في خط تاني !!! جريت على الأختبار , اه والله في خط تاني بس خفيييييف ,

خفيف خفيف احنا كنا لاقيين !!! المهم ان في حاجة انا مكنش بيطلع معايا اي حاجة لا خفيف ولا عالريحة , فرحنا والله بس قلنا منستعجلش ما يمكن من تأثير حقنة التفجير اللي بقالها اسبوعين ههههههه , قررنا بقة نهدي شوية لحد ميعاد التحليل و نحترم نفسنا وبلاش توتر ,
بس مييييييييييييييين اللي يعمل كده !! و حياتكم نفس اليوم بالليل عملت تاني اختبار و كان في خط بس اتقل من الأول و اختبار تالت فجر اليوم ال 11 و رابع مساء اليوم ال 11 وحطتهم كلهم قدامي , الحمد لله في خطين في كله بس مش الخطين اللي يسدوا عين الشمس اللي انا عايزاهم و قلنا مبدهاش بكرة نعمل تحليل الدم و رزقنا على الله .

آسفة طولت عليكم بس خلاص هانت

رحت المركز و عملت التحليل و قالولي هيظهر كمان نص ساعة و انتظرنا والممرضة بتاعة الدكتورة بتاعتي اللي عارفاني انا و جوزي كويس فضلت تروح و تيجي و تطمنا بس وانا منتظرة و بقرأ قرآن و هادية ماسكة نفسي جت الممرضة و قالتلي النتيجة ظهرت بس هتستني الدكتورة تقولك عليها

, انا بقيت في حاااال غير الحال , " طب مادام ظهرت لية مش بتقولي عليها ؟؟؟؟؟ يبقة النتيجة نيجاتيف ؟؟؟؟ يبقى اختبارات البيت غلط ؟؟؟؟؟ " اعصابي باظت و ايدي اترعشت و عينية دمعت و جوزي كمان اتدمر يا قلبي ووشة احمر من التوتر و اتحايلنا علي الممرضة , يا ست و النبي ريحي قلبنا لو مفيش حاجة و سيبينا نروح لحالنا , أبدا لما الدكتورة تيجي ( وتضحك!!!) .

سلمتها لله و انتظرت و جت الدكتورة و اول مجت لمحت الممرضة بتديها ملف في ايديها و الدكتورة هيصت و فرحت , لكن انا كنت مش فاهمة شىء و القلق بيقتلني , نادوني انا و زوجي و دخلنا واول ما قالت الدكتورة قالت مبررروووووووك يا مدام ,,,

أخييييييييرا اشهد ان لا إله إلا الله , بقت هي تتكلم و انا مش مستوعبة ووالله لحد الآن مش مستوعبة قوي , الحمد لله رب العالمين الذي من توكل عليه كسب والله هو ارحم الراحمين , الله لا يحرمكم الفرحة ياارب يا اخواتي و دعواتكم معايا يكملي علي خير و يتمم فرحتي انا و زوجي بأمره سبحانه و تعالى

ما شاء الله
تبارك الله أحسن الخالقين
اللهم صلي و سلم و بارك على أشرف الخلق سيدنا محمد عليه أشرف الصلوات و أتم التسليم
مبارك أخيتي عليك
ربي يثبته لك و يتمم لك على خير و سلامة و هداة بال
اللهم آمين

لوووووووووووووووى لووووووووووووووى مبروككككككك يا قلبى عقبال كل المنتظرات و المحرومات و ربنا يثبتلك حملك و ترزقين باحلى طفل او طفلة و يا رب توأم كمان تقرى بية عينك و عين زوجك و يدخلك الجنة

الف ألف ألف مبروووووووووووووووووووووووووووووووووووك
الله يثبت حملك و يتمملك على خير يا رب
و يرزقك الطفل السليم المعافى

الف الف مبروك فرحتلك من قلبي وحكايتك خلتني ابكي من الفرح وشجعتني اجيب تحليل انا عملت تلقيح صناعي مفروض يوم السبت مواعيد التحليل لاني قادرة اصبر ولانا عندي الشجاعة احلل ارجوكم ادعولي

الف مبروك حبيبتي الله يثبته انشالله



اختك فى اللة
حــــــــــــــــــوريا

السلام عليكم
الله يفرح قلبك ويتمم لك على خير أن شاء الله
ويرزقك طفل سليم معافا

ياااااااارب يتمم حملك و الف مبررررررررررررروك

حبيبتي بونبونه الف الف مبروووك
وربي يتمم لك على خير يااارب
وربي يثبت حملك وعقبال ما اتشوفينه بين ايدك ياارب يسهل عليك الحمل والولاده ياارب
اختك ام خاطر

ياااااااااااااااااااااااااااااااااااااااااالل ه والله عيوني تدمع واني اقر القصة ما شاء الله يارب اتم فرحتج على الف خير

اللهم ارزقها بالذرية الصالحة السليمة المعافى اللهم امين
دير بالك على حالك