بنات لك الحلوين الحنينين:
كام واحدة معايا لسه فى انتظار الحمل الاول ... الاول خالص يعنى لاحصل لها حمل او ولادة ولا حتى اجهاض قبل كدة
عاوزة اسالكم شوية اسئلة اعرف انا لوحدى فيها ولا كلنا فى الهم سواء
اولا: انا ساعات كدة بحس انى مش ست" بشك فى انوثتى" لان حاجات كتير من بتاعت الستات المتجوزين معرفهاش "لانها مرتبطه بالحمل والولادة طبعا"
ثانيا: بخاف قوى اتعامل مع اطفال صغيرة لانى من ناحية مش عاوزة اثير فيا احساس ناحيتهم وبتعمد الجفاء مع كل الاطفال ومن ناحية تانية بخاف يحصل للطفل حاجة وهو معايا شكلى يبقى وحش قدام اهله ويفتكرونى حسدته
ثالثا: بحسب عمرى باليوم و بالساعة وبخاف اوصل للسن اللى مش ينفع اخلف فيه ولسه معنديش اطفال... فاكرين اعلان اكفل طفل يتيم فى بيتك بتاع الست الحزينة اللى بتقول (لما اكبر مين هيراعينى مين هياخد باله مين؟... وبعدين المذيع الرخم يقول سؤال على لسان كل اللى معندهاش اطفال بسمعه دايما بيتردد فى ودنى
رابعا: بسال ربنا كتير مين هيستغفرلى بعد ما اموت و خصوصا انى والدى ووالدتى متوفيين وفى حديث بيقول ما معناه ان لما ام انسان تموت ربنا بيقوله يا بن ادم ماتت من كنت اكرمك من اجلها فاعمل شيئا اكرمك من اجله "... بسال نفسى كتير يعنى انا لا ليا ام فى الدنيا تدعيلى ولا طفل يستغفرلى وانا فى الاخرة طب يارب هدخل الجنة ازاى
خامسا: بقيت بتنح من كتر الاسئلة و التعليقات اللى بسمعها من ناس مع انى بعيدة بس والله فى ناس بتتصل بيا دولى مخصوص عشان تقولى فى حاجة ولا لسة وانا بقيت كانى حاطه قلبى فى تلاجة لا اتاثر ولا انفعل ولا احس بشئ اطلاقا وبقيت ابدا مع الناس برد الفعل العدوانى عشان احرمهم يسالونى
سادسا: دموعى مفيش اسهل منها على كل تافه وكبير
سابعا:حاسسه حياتى الاسرية مهدده يعنى ساعات بحس الطلاق واقف على باب بيتى... البيت بدون اطفال بيت هش... لما بيبقى فى اطفال لو الزوجين قطعو بعض كل الناس بتدخل وتقولهم معلش استحملو علشان خاطر ولادكم ... ساعات بقول لو لا قدر الله حصل مشكلة بينى وبين جوزى لاى سبب محدش هيكلف خاطره ويتدخل اصلا
ثامنا: مدمنة عرايس "لعبة" وخصوصا الحجم الكبير اللى يقارب حجم الطفل الطبيعى ... ساعات بفتح النت على صفحة فيها طفل مولود والمس الشاشة وببقى اسسه انى لامسة الطفل نفسه
معلش افكار كئيبة بس انتو اكيد استحملتونى وقريتوها وانا كمان عاوزة اسمع افكاركم وايه المشترك بيننا
رد مع الاستدلال
ان شا الله نفرح فيك قريب ,, ولاتنسى تدعين لي بكل خير ....
كتبت بواسطة fushia
الروابط المفضلة