نصيحتى الغالية لكل من تعانى من امساك ولكل الحوامل الجدد

**queen2020** · 13-10-2007, 12:36 PM

ازيكم يا حبايبى ؟ انا جاية انهرضة ومبسوطة جدا الحمد لله لانى خلصت من ازمتى فى العشر ايام الى فاتو مع الامساك والبواسير

بس بعد ما اتبهدلت يا جماعة بجد واضايقت جدا لدرجة انى اكتئبت وبدات اكره الحمل فعلا -بس انا لقيت الحل وهو نخالة القمح (الردة ) وهلاقوها ياجماعة فى اى مخبز تتاخد معلقتين او 3 على كوب زبادى وتتقلب وتتاخد يوميا والامساك هيروح ان شاء الله ومش تلاقيه تانى -انا اصلا عندى قاولون من قبل الحمل وطبعا بيسبب امساك وكمان عندى بواسير فا كنت باعانى معاناه شديدة

بس واحدة نصحتنى بالنخالة وجرتها ولقيتها علاج ممتاز لان القاولون مالوش علاج محدد بس بعد كدة سافرت لزوجى فى الامارات وخلصت النخالة اللى كنت جايباها معايا وما عرفتش اجيبها منين وبالصدفة حصل الحمل فى نفس الوقت وبدا الامساك اللعين والبواسير واشتكيت للطبيبة ووصفتلى ملين عبارة عن محلول سكرى تقيل طبعا ماعملش نتيجة معايا -لحد ما البنات فى المنتدى قالولى انى هلاقى النخالة عند اى مخبز وجبتها فعلا ومن تانى يوم الامساك فك الحمد لله - فحبيت انصحكم بالنخالة يوميا علشان تخلصو من مشكلة الامساك ونصيحتى كل حامل فى الشهر الاول تخلى بالها وتبدا تستخدم النخالة لان من الشهر التانى هيبدا معاها الامساك والامساك خطر جدا على البيبى لان (الحزق فى الحمام)لاخراج الفضلات (سوررى ) ممكن جدا يجهض الجنين دا كلام الدكتورة نفسها فا بنصحكم بالنخالة من البداية وهى علاج طبيعى ومالوش اى ضرر نهائى وبنصح بيها اى حد بيعانى من القاولون العصبى -ودعواتكم ليا بحمل وولادة سهلة

**yehia2007** · 13-10-2007, 12:41 PM

الف سلامه عليكى وربنا يتمملك حملك على خير وتقومى بالسلامه
وشكرا على النصيحه وجزاكى الله كل خير

**منارة الحياة** · 13-10-2007, 12:43 PM

الله يجزيكي كل خير على النصيحة يا كوين

**queen2020** · 13-10-2007, 02:30 PM

وياجماعة كمان فى فوار طبيعى اسمه FYBOGEL عبارة عن الياف طبيعية ممتاز جدا يؤخد كل يوم كيس من الفوار ويذاب فى كوب ماء فاتر وهو بطعم البرتقال يعنى طعمه جميل وموجود فى كل مكان ومفعوله سريع وممتاز ومفيش ضرر منه على الحمل لانه الياف طبيعية -اظن بعد كدة محدش يشكى تانى من الامساك