مرحبا
الحمد لله...لازلت على قيد الحياة،،، تفضلن ان كنتن راغبات في معرفة ماحدث يوم ولادتي...
عدت وكلي شوق والعود أحمد...
كم رغبت في الحديث معكن أكثر من أي شخص ...لكن البيبي لم يكن يترك لي فسحة من الوقت.
بتاريخ 28/6/2007 استيقظت الساعة 6:00 صباحاً على ألم في البطن...قارنته مع ماوصفته لي صديقاتي والطبيب وتلخبطت، فهذه أول ولادة ولا أدري ما هو الطلق...لم أوقظ زوجي وتسمرت في الفراش...أضرب أخماس بأسداس...ما عرفت كيف مر الوقت وصارت الساعة تقريباً 12 الظهر، وكنت أقنعت زوجي انه يروح لشغله واني طبيعية ما فيي شي...ولما راح ما لحق يوصل إلا أنا متصله أبكي من الوجع وصرت أقوم وأقعد ولا عارفة شو أعمل...لما وصل انجن...لأنه حسبلي المدة بين الطلقة والثانية كانت دقيقتين وأنا متنحة وخايفة ومابدي أروح للمستشفى...انهبلت، وعلى ما تحممت وتخليت عن عندي وجبنا الفريق اللي رح نصحبه للمستشفى (ماما وحماتي) كنت أستويت من الوجع...بس قدامهم ولا كأنه شي بوجعني، ومع أزمة السير تأخرنا أكتر...لما وصلت المستشفى أول نيرس التقيتها كانت متوحشة كرهتني الحمل والولادة...وكان التاريخ رح يسجل حالة هرب من الولادة رهيبة...لولا زوجي بدأ يهديني ووصى الأطباء علي على ما وصل دكتوري...لما فحصني حكى التوسع 6 سم، بعدها بلحظة نزل مية الراس وكانت خضراء!!! ونبضه تعب والجهاز بدأ يعطي انذار...على طول قرروا عملية لأنه وضع الجنين كان في خطر...الدقايق اللي قبل العملية مرت كأنها ساعات...والوجع هدني...واللحظات اللي حضروا فيها للعملية كأنها أيام ...لما صحيت كنت أفتح عيوني بصعوبة وسألت زوجي عشر مرات: أنا خلصت؟؟؟ ما كنت مصدقة وكنت خايفة يشحطوني ويولدوني كمان مرة...
الغريب ما سألت عن البيبي ولا طلبت أشوفه!!!!!!!
لما قررولي العملية حمدت ربنا كتير لأني بدي أخلص من الآلام، وكمان كنت سامعة وحدة بتصرخ لحظة خروج راس جنينها فكنت ميتة من الرعب...بس بعدما مرت الأيام تعقدت من اليوم اللي عملت فيه العملية ...منظر مكانها ما بروح الا بالتدريج، وأول مرة شفت فيها مكان العملية انهرت من البكاء...
ماكنت أشبه اللي ولدوا بنفسيتي...كانت نفسيتي محطمة...كلما كنت بدي أقوم أو أقعد أحس قاع بطني تمزع، وضليت شهر بالفراش...وصابني اكتئاب بصعوبة وبعد وقت طويل تخلصت منه...
والأدهى_ بس ما تستغربوا_ كان شعوري تجاه البيبي غريب: كنت أحن عليه بس أخاف منه وأكره وقت صحوته لأنها الرضاعة عزبتني موت...
وأخدت وقت طويل لا حسيت اني عن جد بحبه...
واللي تعبني أكتر انهم منعوني أتحمم أول فترة، وكالعادة طنشتهم واتحممت...مكان العملية التهب!!!
نفسيتي صارت بالحضيض...واللي كانوا يزوروني الله يسامحهم كانوا يطولوا، ما كنت أرتاح...ولا كانوا يراعوا انه البيبي بده وقت...واللي جايبة معها أطفال ...واللي كانت تنسى حالها عندي...أشياء خلت نفسيتي لا أحسد عليها...
اللي قهرني انه كان عندي فرصة أولد طبيعي بس تأخيري بالروحة للمستشفى خرب الدنيا!
ووزن البيبي كان 2.5 كيلو، وبصحة وعافية الحمد لله...
هلأ الحمد لله الوضع صار أحسن ورجعت لدوامي...
أكيد الحكي ملخبط ونسيت كتير أشياء لأني بكتب من المكتب...بس ان شاء الله إلي رجعة...
الروابط المفضلة