السلام عليكم و رحمة الله و بركاته

تحياتي للحبوبات الكروشات و من ولدت ومن تنتظر حملها الله يسهل امر الجميع ويفرح قلوبكم

عندي كذا شيء حبيت انصحكم فيها لما يشرف النونو ان شاء الله من اول يوم

1- الرضاعة الطبيعية مافي مثلها للنونو واول اسبوع في الرضاعة مؤلم جدا لانه الحلمات تكون ناشفة وتتقشر فعليك بالتجهيزو شراء كريم ملين لها لانه الطفل اول 3 ايام يرضع مادة اللبا وبعدها بامر الله يدر الحليب ولاتعطي الصغير اي شيء غيرها ابدا علشان يتعود على الرضاعة ولا ترضعي قدام احد ابدا ترى مو زين للنونو ولك حتى الام المفروض ماتطالع بالنونو وقت ترضعه بس انتبهي لانفه انه يتنفس زين.

2- عليك بالتحنيك من اول يوم لمدة ثلاث ايام متتالية والطريقة انك تاخذي تمرة لينة ( انا فضلن الخلاص لانه طري) ووضعته في فنجان وحطيت عليه موية حارة وهرسته بعدها صفيته و اغسل يدي زين ثم اسمي واضع اصبعي في التمر ثم داخل فم النونو حتى يرضع الاصبع .. لمدة 3 ايام متتالية في الصباح كل يوم تمرة وحده بس .. فائدتها عظيمة فهي ترفع سقف الفم وتريحك كثييييييير وقت الرضاعة.

3- اختاري اوقات معينة تسقين فيها النونو موية بملعقة طيلة اليوم ولاتنسي لانهم يظمون والموية تريحهم كثير.

4- عليك بتحميم البيبي كل يوم بموية دافئة لانها تريح بشرته والموية تقويه وتخليه ينام.. وجهزي ملابسه والمنشفة والبودرة والزيت جنبك قبل تخلعين ملابسه وتاكدي من ان الغرفة دافئة ومافيه هواء بارد لانه اخر شيء تبينه انه الطفل يبرد

5- بعد كل استحمام اعملي للنونو مساج بزيت جونسون كل جسمه وركزي على بطنه بخفة.

6- معروف انه الاطفال يبكون كثير اول شهر وهذا عادي جدا. اهم شيء رضعيه الين يشبع في البداية واذا مايبغى جربي تربتي على ظهره بخفة وضميه على صدرك واقرئي عليه .. اذا مانفع جربي تغيري الحفاظة .. اذا ماوقف بكاء شربيه موية .. مانفع .. دهني بطنه اكيد مغص .. وحاولي تنيميه في جو هاديء حتى يرتاح.اخر حل حمميه ترى الموية ممتازة ولو فيه حرارة تخف اما اذا حسيتي انه النونو يبكي بكاء مو عادي خذيه الطبيب يمكن ماهو قادر يتبول او شيء يؤلمه .. انا جارتي اخذت بنتها عمرها 5 شهور للمستشفى قالوا لها انه الحالب عنده مسكر من جهة المثانة والبول يرجع فيتالم ..فاذا طول البكاء لاتستهيني روحي الطواريء.

7- فيه 3 اشياء احذري كل الحذر تعطينها النونو

العسل ( فيه ناس تحطه في الرضاعة من اول شهور وتقول مايضر.. بالعكس كبد الطفل ماتتحمل هضم العسل والعسل لايعطى الا بعد مايصير عمر النونو سنة على الاقل .. اللي سلم النونو تقول الحمد لله لانه بدات تطلع ظاهرة السكر عند الاطفال فانتبهي وماعليك من كلام احد .. انا مشيت على نصيحة استشاري ووالله مافيه اهدى من ولدي الحمدلله لاصياح ولاجوع ولا شيء)

السكر ( يضر الكبار فكيف الطفل اللي جهازه الهضمي بسيط وعلى قده)

الملح ( اذا بدا ياكل في الشهر 6 لا تضعيه ابدا لانه يتعب الكلى عند الاطفال)

8- ملابس النونو اغسليها بصابون خاص يفضل المبشور واستخدمي لينور الاطفال حتى لو ملابسه جديدة نقعيها في لينور حتى تلين وتاكدي قبل شراءها انها مريحه وقت ماتفصخين له يعني الطقطق افضل من الازرار مثلا.

9- الكوفلة روعه للنونو اذا تبينه ينام افرديها ولفيه بالراحة وخلي يديه و رجليه ممدودة ومرة بعد مرة راح يعرف انه الكوفلة يعني وقت النوم

10- حاولي تنظمين الرضعات واهم شيء البيبي بعدها لازم يرتاح وتربتين على ظهره حتى يطلع الهواء وسقيه موية بين الرضعات.

11- الام الشاطرة تعود الطفل على النوم الصحيح .انا عودت فراس على نوم الليل من عمره شهر ماشاء الله عليه الحين ينام في وقته حتى لو فيه صوت وازعاج ينام فروس من 9 الليل الى 6 صباحا ويصحى مرة وحده يرضع بس.
الطريقة : عودي النونو اذا صحيتي الصباح انك تفتحي الستارة ويدخل النور وسولفي معه ونشدي له وشيلي الكوفلة خليه يتحرك طول النهار .. واذا يبي ينام نوميه عادي .. واذا جاء وقت النوم بالليل لا ..لازم تقفلي النور وكوفليه ولا تتكلمين وخلي الجو هاديء شوي شوي يتعود انه هذا وقت النوم

12- اذا تبين سرة النونو تطيح بدون خرابيط شبعيه بالرضاعة وبس انا طاحت سرته 6 يوم بس كنت احاول اشبعه بدون مااحط له اي شيء.

هذا بعض مما عندي واللي عنده جديد لايقصر وانا لو استجد شيء قلت لكم
تحياتي للجميع

يعطيك الف عافيه

جزاك الله خيرا غاليتي
بس أنا شخصيا من المؤيدين للعسل لأنه بنظري شفاء للناس ومؤمنه إن شاء الله بذلك ولكن نحن نعطيه يكميه قليله جدا من باب التبرك لا أكثر ولا أقل

جزاكي الله خيرا ام فراس ربي يحافظلك عليه من كل شر و سوء و من اعين الجن و الانس و جعله الله من حفظه كتابه امين امييين اميييين يا رب العالمين

تسلمى على النصائح الجميلة وأنا معك بخصوص العسل فهو ممنوع على الأطفال ولا يسمح به الا بعد العام الأول ... وبالنسبة للسرة فيجب الإعتناء بها جيدا بسائل معقم كالكحول مثلا حتى لا تتلوث فيجب تنظيفها عند كل تغيير للحفاضة ......

يعطيك العافيه

يعطيج العافيه على المعلومات الحلوه

مشكورة ام فراس على النصائح الحلوة وانا فعلا اعمل بيها
امي ماقصرت الله يطول في عمرها ويعطيها العافية كل يوم تحمم ولدي فيصل واخليه ينام الليل بس احب انومه على بطني علشان لو فيه غازات تطلع وتريحه لان البيبي في الشهور الاولى يتعبهم المغص
واعطيله رضعة حلبة بس خفيفة مع سكر نبات وينسون لان الحلبة تقوي بنيته والينسون تريح بطنه وها كله امي مجربته مع اخواني وماشاء الله عليهم الحين بنيتهم حلوة
بالنسبة للاولاد عند الختان في اليوم الرابع من الختان امي حطت على جرحه زيت زيتون وكل مانغير له الحفاضة نحطله زيت زيتون وماشاء الله طاب الجرح وطاحت حلقة الختان البلستيكية
بس عندي مشكلة ولدي كل مارضعته رجع الي رضعه امي تقول عادي بس انا خايفة عليه مع العليم اني ارضعه من صدري
ماادري ايش اسوي

الله يعطيك الف عافيه

مشكورة حبيبتي واله هالنصائح محتاجينها خصوصا احنا البكريات والله مفيدة ومشكورة ما قصرتي والله يعطيك الف عافية ويارب يخليلك فراس يارب