السلام عليكم ورحمة الله وبركاته
كيف حال أمهات المستقبل؟
حبيت اخبركم شو صار معي مبارح
كان عندي موعد مع الطبيبة،،
بدات الطبيبة تفحص الجنين والحمدلله ماشاء الله كل شئ طبيعي وسليم..
وموعد ولادتي ان شاء الله يوم 19-7-2007
يعني باقي 4 ايام ان شاء الله وأدخل الشهر الثامن
قبل شهرين خبرتني الطبيبة اني حامل ببنوتة،،
والحمدلله فرحت من قلبي لانه اول مولود لي ان شاء الله ومابتفرق اذا بنت أو ولد..
وشوووو كيرلي ماصدقت خبر!!
جهزت جهاز البنوتة كامل من الألف الى الياء...
كله زهري x زهري وكشكش وفساتين من كافة الأشكال والألوان
ورتبت كل الأغراض والملابس بخزانة البيبي
والحمدلله،،
مبارح ياحزركم شو صار!!
لما كانت الطبيبة عم تفحص،،،
لقت شئ غريب بين رجلين البيبي!!!!
وشووووووووووووو ياحزركم طلع!!!!!
طلع البيبي ولــد مش بنــت!!!!!!!!!!!!
طبعا لو تشوفوا الصدمة والمفاجاة وردت فعلي!!
الحمدلله يارب لا اعتراض بالعكس انا مش فارقة معي ولد أو بنت
المهم يجي سليم وكامل ومشافى ومعافى
بس جهاز البيبي اللي تجهز لبنت شو اعمل فيه
يلا خيرها بغيرها بضل لاخته المستقبلية ان شاء الله
وهيك تحولت تالين الى فارس
نصيحتي يابنات،،،
**أول نصيحة**
كان طالع على ظهري بقع بنية اللون،،
وصارت تزيد من بداية الشهر السادس
مش كتير اهتميت للموضوع لانه افتكرته كلف الحمل!!
ومبارح بسأل الطبيبة ولما فحصتني طلعت البقع عبارة عن فطريات مش كلف
وحكتلي لازم يتعالج فورا لانه عادة بالحمل بنتشر بالجسم..
كتبت لي مرهم وبدأت العلاج من مبارح..
يعني انتبهوا لأي شئ غريب بتحسوا فيه راجعوا الطبيبة فوراً..
**ثاني نصيحة**
أكيد الجميع بعاني من الإمساك!!
وللأسف بعاني من الإمساك (أعزكم الله) من قبل الحمل
ومع الحمل طبعا زاد كتير!
آخر فترة حسيت انه بدأ يسبب لي بواسير!!
اسشترت الطبيبة ايضا وكتبت لي مليّن 3 ملاعق ورا بعض يوميا،،
يعني يا بنات اي وحدة بتعاني من الإمساك تعالجه فورأ قبل الولادة لانه كتيييير بصعب الولادة وبسبب بواسير لا سمح الله،،
**وثالث نصيحة**
قبل ما تجهزوا ملابس البيبي تاكدوا من الجنس تماما أو ممكن انه تجيبوا ألوان ملابس وموديلات تلبق لولد أو بنت،،،
وان شاء الله ربنا يرزق الجميع الذرية الصالحة
وتقوم جميع الحوامل بالسلامة
الروابط المفضلة