السلام عليكم ورحمه الله وبركاته
اللهم لك الحمد كما ينبغي لجلال وجهك وعظيم سلطانك
اليوم اكتب لكم قصة ولادتي
اللهم لك الحمد كانت ميسرة ربي يسهلها على جميع الحوامل
موعد ولادتي كان 7 ابريل ... وكنت في موعد مع دكتورتي يوم 30 مارس قالت لي كل شي طبيعي والبيبي بخير وعطتني موعد يوم 6 ابريل للمراجعة ... سألتها يعني مابولد قبل ... قالت مو باين اكيد بشوفك بعد اسبوع .. رجعت البيت والمساء طلعت مشيت ساعة ورجعت
بعد العشا شربت شاي زعتر بالعسل وحاولت انام ماقدرت وكان زوجي يوميا قبل ما ينام يسألني شكلك الليلة بتصحيني اوديك المستشفى وانا اضحك واقوله العلم عند الله وفي هذي الليلة ما سألتني .... المهم صحيت لصلاة الفجر وجلست اقراء الاذكار وادعية تسهيل الولادة وسورة مريم ( هذا البرنامج اليومي ) ...
قعدت اناظر زوجي أبيه يسألني شفته صلى ونام ( مسكين تعبان وراه شغل ) ..... وانا بعد ما خلصت ولسة بنام حسيت بألم في بطني وظهري خذ ثواني وراح ونمت شوي ورجع الالم مرة ثانية وصار يجيني كل عشرين دقيقة اول مايروح اغفي شوي وصار الالم كل عشر دقايق وانا متحملة وبعدها صار كل خمس دقايق قلت بس وكانت الساعة 7:35 صباحا صحيت زوجي وقلت له يالله على المستشفي شلت اغراضي وركبنا السيارة .... راح الالم نهائيا ونحنا في نص الطريق قلت له نرجع البيت ماعندي الم مارضي قال نروح ونطمن وانا حاسه بالفشيله شو اقولهم ليش جايه ومافي الم .... دخلنا المستشفي وكانت الساعة 8:15 ص حطولي جهاز كشف التقلصات وكانت جدا خفيفة لدرجة اني ما احس فيها ولكن النفس كانت مفتوحة 3 سم والراس لسه عالي ... وقالت الدكتورة لازم طلق صناعي اذا ما زاد الطلق خلال ساعتين وقالتلي روحي امشي في المستشفي واطلعي الدرج واذا حسيت بالالم زاد ارجعيلي ... مشيت ساعة ورجعت قالت اريح كنت حاسة بأرهاق لاني ما كنت نايمه بالليل ... والوضع مثل ماهو .... بس يابنات الادعية وسورة مريم والزلزلة ما فارقت لساني طول الوقت .... حطولي الطلق الصناعي وبتدأ الالم وكانت الساعة 10:30 ص ونومتني على جنبي اليمين وانا اقرأ الادعية والالم يزيد وزوجي ماسك المصحف ويقرأ عند راسي ( وانا كنت طابعة سورة مريم والادعية على ورقة ) ولما صارت الساعة 11:10 قلت لهم حاسة البيبي بيطلع قالت الدكتورة ما اظني لسة قلت لها مااقدر ابغى ادفع قالتلي اكشف عليك نمت على ظهري ولما شافت الرحم مفتوح كامل قالت الطلقة الجاية ادفعي وهي ثلاث دفعات والا عبودي على صدري مثل القمر ربي يحميه والله ما ابالغ اذا قلت لكم اني لحظتها نسيت الالم نهائيا والدكتورة تطلع المشيمة وانا حاضنة ابني وابوه يأذن ويقيم الصلاة في اذنه ولله الحمد
واحلى حاجة القابلة ( مسيحية) بعد الولادة تسألني انتي كنتي تقرين كلام الله قلت لها ايوه قالت علشان كذا ولادتك كانت سهلة وسريعة ..
ادري اني طولت عليكم بس حبيت اقولكم كل التفاصيل
واهم حاجة حبيباتي القرآن والادعية وطريقة التنفس وقت الولادة ... ربي يهونها عليكم ويرزقكم ولادة سهلة
الروابط المفضلة