الحمد لله ولدت بالسلامه و جبت فهد يوم الثلاثاء 5-8 الساعه 10:30 تقريبا
البدايه كانت يوم الجمعه ميعاد متابعتى و كانت كل حاجه تمام و طلب منى الدكتور ارجعله يوم الاحد
رحت يوم الاحد بس كانت الميه قليله خالص فقالى اخد الحقن بتاعه الميه اللى ماشيه عليها يوم و يوم واحده بالليل و واحده الصبح و اروحله بالليل
جه الاتنين و خدت الحقن و كمان مرات خالى ولدت مع العصر و جابت بنوته ( اصل كان ميعادنا مع بعض )
وبالليل عدى عليا جوزى عند ماما ( زى ما عارفين كنت كسرت ايدى يوم الخميس اللى قبلها ) و قعدت عندها ) و رحنا للدكتور و انا بضحك و بهزر و مفيش حاجه
دخلنا للدكتور كشف نسا و بالسونار و لما قعدنا معاه على مكتبه قالى حيولدنى النهارده و انه مش حيخاطر علشان الميه متنقصش تانى و انا اصلا ميعادى 3-8 و حيعملى طلق صناعى
وفضلت ابكى وانا شيفاه بينادى على الداده علشان تجهز الاوضه اللى حقعد فيها و على الممرضه علشان تجهزنى وجوزى كلم ماما و قالها ان الدكتور حيولدنى وهى بقت تكلمنى وترجف و تقولى ازاى واعمل ايه . هدتها شويه وانا كنت اصلا مجهزه شنطه الولاده.
بعد الاوضه ما جهزت قعدت مع جوزى وانا خايفه وانا كلى بيرجف مسك ايدى وفضل يهدينى والممرضه ركبتلى الكانيولا فايدى الشمال و بعدها ماما واختى جم
وابتدى الدكتور حطلى لبوس مع محلول وكانت الساعه 12 بالليل وعلى 1:30 ابتدى مغص كل 5 دقايق وشاف الرحم لقيه مفتوح
وفضل كل ساعه يجى و يوسع وساعتها كنت بحس روحى بتروح منى وكان الالم بتاع التوسيع شديد وانا مش عارفه امسك فحاجه اليمين فى الجبس و الشمال فيها المحلول
والدكتور قال لجوزى يمشى و هو قبل الولاده حيكلمه يجى
وفضلنا انا و ماما و اختى و الالم بسيط بس المشكله فى التوسيع
و الساعه 6 الصبح حطلى فى المحلول حقنه ساعه و نص ساعه كده وابتدى الطلق وكان الطلق ورا بعض كل 3 دقايق مكنتش حتى بلحق اتنفس و كان صعب جدا الطلق الصناعى و الدكتور كل شويه يوسع وفضلت استغفر ربنا كتير و على 8:30 عملى سونار
وكنت حاسه انى حموت خلاص وكل دا وانا بكلم جوزى واقله تعالى و الدكتور يقله ما تجيش علشان مش عايزه يشوفنى فى الحاله دى.
بعد كده لقيت جوزى جه و الدكتور جه وفضل قاعد نص ساعه يوسع مع كل طلقه وانا بجد كنت بموت ومش قادره انسى دا لدلوقتى
سألت الدكتور هو فاضل قد ايه مردش عليا و فضلت اصرخ و اقله ولدنى قيصرى مش قادره و الالم شديد مفيش دقايق ولقيته بينادى على الممرضه و جابت كرسى بعجل علشان خلاص. قومونى من على السرير و الطلق شغال ومكنتش قادره اقف على رجليا
و الدكتور فضل يقول بسرعه لانه خلانى اخد كل الطلق فى اوضتى
دخلت اوضه الولاده و طلعونى على السرير كل دا و الطله مستمر و بعد 4 طلقات حسيت باول راس فهد بتطلع و بشكه بسيطه مكان التوسيع
وادانى البنج وقالى اتنفس بسرعه
بعدها على طول لقيتنى فى الاوضه و حوليا جوزى و ماما و اختى و خالتى و بنات خالتى و بيقولولى قومى شوفى فهد
بجد مكنتش مستوعبه ان خلاص و فضلت ابصله جنبى بعد ما سندوه على الجبس
بعد كده عرفت ان جوزى طول ما انا بولد كان بيبكى و يدعى ربنا
ولما الممرضه قالت ولدت هاتو هدوم البيبى مكنش مصدق ان فى انسان جديد حيطلع
بس بجد الطلق الصناعى دا مؤلم جدا
الروابط المفضلة