السلام عليكم ازيكم ياامهات يارب تكونو انتو واطفالكم بالف خير
ارجووووووووووووووكم اللى عندها خبره فى موضوع النوم
انا ابنى عنده 6 شهور ونص بينام بالليل معانا عادى والحمد لله بس بيصحى كل ساعه من غير مبالغه واحيانا كل نص والله علشان يرضع مع انه طول اليوم مش شرط يرضع او ياكل كل ساعه لكن معرفش ايه اللى بيحصله بالليل قلت اخليه ياكل قبل ماينام كويس مفيش فايده اولا مش بيرضى ياكل اوى بيعذبنى علشان ياكل لانه بيبقى عايز يرضع قبل النوم وبردو بعد ماباكله بيصحى بعدها بساعه تقريبا مش جوع قلت يمكن بتبقى عطش اشربه ميه مفيش فايده عايز يرضع ومش بيرضع كتير بقين وينام بس انا تعبت موووووووووووت مش عارفه انام ابدا صحيان كل ربع ساعه ونص ساعه وساعه ده صعب
ارجووووووكم افيدونى بسرعه

انا الدكتورة قالتلى ان الطفل في السن ده مش مفروض يرضع بالليل و ينام ع الاقل 6 ساعات متواصلة بالليل فابنك بيقوم مش جوع و لكن مجرد احساس بالامان و اكيد هو متوعد ينام على الرضاعة المهم انت حطى جنبك ميه و كل ما يصحى اديله ميه اكيد هيعيط كذا يوم بس في الاخر هيتعود انا بعمل مع بنتى كده و خلاص اتعودت و يمكن كمان انت مش بتديله التتينة فلو قدرتى اديهالة هو هيغلبك اكيد على ما ياخدها بس هيريحك كتيييييييييييييييييييييييييير المهم انك متستجيبيش لانك ترضعيه بالليل و بدل الرضاعة اديله ميه بس الموضوع محتاج صبر

جزاكى الله خيرا على ردك هاجرب اصبر على الميه لكن التيتينه باباه من صغره مش موافق بيها علشان الدكتور خوفنا منها خدها وهو عنده اسبوعين وارتبط بيها جامد وفطمته منها وهو شهر ونص لكن هاجرب الميه لانى فعلا حاسه انه مش بيبقى جعان

ياالله
نفسي المشكله العويصه اللي انا فيها
نفس حالة ابنك بالظبط عندي
ونفسي انااااااااااااااااااااااااااااااااااااام
وكنت لسه هكتب الموضوع ده انبارح
نفسي اناااااااااااااااااام

رحوبه شكرا لمرورك يارب يفيدونى ويفدوكى انا اول ليله اهو وهاجرب اقلل عدد الرضعات واستحمل شويه وربنا يسهل ادعووولى وادعو لعمر ربنا يهديه

حبيبتي enno
والله نفس مشكلتي بس أنا أولادي اكبر من ولدك هم تؤام وعمرهم سنة وثلاثة شهور بس هي نفس الحركة بس بيتاوبوا علي هههه يعني ارضع الأول وانيمه الثاني يصح وهكذا والله بحس نفسي ما نمتش 2 علي بعض وانا بدوام الصباح علي الشغل يعني حالة صعبة وتعب شديد ربنا يعين الكل يارب
وبخت جنبي مية بس ما يرضوا يشربوها بس بدهم يرضعوا وانا منتظرة يتموا سنة ونصف وحأفطمهم وانشاء الله بعد الفطامة نرتاح شوية بس المشكلة حتبقي تعب شديد عشان يطفموا ربنا يعين يارب .
ودائما حاولي تشبعيه قبل ما ينام وتشربيه لبن وبعدين اعملي موضوع الموية دا ووريني ايش النتيجة معاكي عشان نستفيد من التجربة

ربنا يسهل عليكي ويعينك يارب ويطرح فيه البركة

والله يا أختي من تجربتي في أولادي الاتنين أنا ما نمت كويس الا لما صار عمر ابني التاني سنة ونص تقريباً .. يعني المشكلة مشكلة وقت مش أكتر والولد لما ينفطم تقريباً 90% من مشكلة النوم بتنحل .. يعني الله يعينك ويصبرك لحد ما ابنك يكمل سنة على الأقل وتفطميه وبعدها رح تشوفي انه لحاله رح يصير ينام ولا يسأل

بصى يا ستى

كلنا بنعانى من نفس المشكلة العوييييييييصة دى و ما باصدق اروح عند بيت اهلى عشان اسيب ابنى مع حد و اناااااااااااااااااااااام
ان برضو الدكتورة نصحتنى انى ااكل ابنى كويس قبل ما ينام و لو صحى بالليل اسيبه ما ارضعوش و هو هاينام تانى
انا جربت الحكاية دى امبارح
فى الاول قعد يعيط و شوية و سكت و بعدها بخمس دقايق عيط تانى و شوية و سكت و فى خلال الوقت ده بيعضعض فى الغطا بتاعه
كل ده و انا طبعا صاحية و باتابع
كرر الحكاية دى كذا مرة
كل ده و انا صاحية ههههههههههههههه
فى الآخر قعد يعيط كتير و يصرخ لحد ما خفت الجيران يطلعوا يخبطوا علينا و يقولولنا نيمو ابنكو حرام عليكو
يعنى هو اللى كسب الجولة و رضع
المهم اعتقد مع الوقت و المحاولة الحكاية دى هاتنفع
بس انصحك انك تشوفيلك اوضة تانية تنامى فيها طول ما انتى بتجربى و تكون بعيد جوزك عشان ما ينتهيش الامر بطردكو انتو الاتنين يعنى بكرامتك احسن

الحمد لله انى مش لوحدى
شوفى انا هاقوللك الكلام المفروض يتعمل بس انا فشلت للاسف فى تطبيقه
فعلا الطفل فى عمر 6 اشهر او اكثر غير محتاج للرضاعه اثناء الليل اطلاقا خلاص بيكون كون مخزون غذائى يكفيه طول الليل
وبالتالى اللى بيحصل هو مجرد عاده اتعود عليها فى الاشهر السابقه وفعلا بتعطيه احساس بالامان لو صحى ومش عارف يرجع ينام تانى

المفروض بقى انه لما يصحى من النوم ويبدا يبكى تعملى انك مش سامعه اى حاجه وتسيبه وهو هيرجع ينام لوحده
وممكن فى اول ليله يكون البكاء لفتره اطول بعدها بيقل لغايه ميتعود يرجع ينام لوحده من غير مساعدتك

طبعا انا حاولت اطبق وفشلت وفى كل ليله حبيبتى اللى مطلعه عينى بتكسب واشيلها وارضعها لغايه متنام تانى وفعلا بلا مبالغه بعض الليالى بيحصل كل ساعه او اقل ربنا يهديهم ياررب
انا هاحاول اجرب تانى ان شاء الله وانتى كمان وان شاء الله ربنا يهديهم ويناموا طول الليل ياررب اللهم اميين

يا حبايب قلبى انا كتبت موضوع زى ده بالضبط من حوالى 5 شهور كانت بنتى عندها 7 شهور بتعمل زى ابنك بالضبط . ومع الأسف و الألم انها ماااااااااااااااااازااااااااااااااااالت على نفس الحال بدون مبالغة
الا فى حالات نادرة شوية بنكون مثلا فى سفر واو زيارة طويلة وبتكون اتبهدلت ومرهقة شوية طول النهار فبتنام شوية كويس بمعنى انى ممكن أرضعها كل ساعتين أو ساعتين ونص وده أقصى أحلامى
وحاولت مرة أعمل زى ما الأخوات قالوا بس هى مرة واحدة ومكررتهاش من إللى عملته فيا واتأسفتلها ومكررتهاش تانى هههههه
معدش عندى أمل بعد توفيق الله طبعا إلا فى الفطام ومستنية أما يكون عندها سنة ونص على الأقل علشان ضميرى ميأنبنيش