السلام عليكم يالغاليات
مين فيكم بيعرف يعطيني طريقة عمل الداوود باشا و على الطريقة الحلبية.

أنا بعرف طريقته

و لكن الطريقة الشامية

و بكل حال , هلأ صار لازم سجل خروج

إذا حبيتي بعطكي الطريقة الشامية

و تكرم عنينك

إنتي بس رديلي خبر

و أنا بالانتظار

حياكي الله اختي لقيت لك هذه الوصفه ان شاء الله تعجبك وان شاء الله البنات لما يدخلوا بساعدوكي

http://www.lakii.com/vb/a-7/d-779611/



http://www.lakii.com/vb/a-7/a-719532/

http://www.lakii.com/vb/a-7/a-682338/



http://www.lakii.com/vb/a-7/a-640706/


http://www.lakii.com/vb/a-7/a-11707/

http://www.lakii.com/vb/a-7/a-82894/

ايثار انا بدي الطريقه ما دام فيها رد خبر يلا بسسسسسسسسرعه بركي انا كمان عملتها علي طريقه الحلبيه ان القيت روابط وضفتهم بس برضه كل شئ من تحت ايديكي بركه

تسلم ايدك امونه ماقصرتي

السلام عليكم اختي ايثار شكرا جزيلا لك وللاخوات على هذه الردود واذا مافي تعب عليكي اعطيني الطريقة الشامية مافي مشكلة واسفة عالازعاج.

لبين ماتدخل ايثار
شوفي هذه الوصات لداوود باشا
http://www.lakii.com/vb/a-7/amal250-639625/
http://www.lakii.com/vb/a-7/a-456842/
http://www.lakii.com/vb/a-7/a-640706/

بسم الله الرحمن الرحيم


على عيني و راسي أختي الكريمة , من عيني اليمين قبل عيني اليسار

جيبي لحمة هبرة ( بتقدري تحطي معها كمية صغيرة من الدهنة إذا حبيتي , حسب رغبتك ) , و افرميها متل الكفتة , و حطي معها قبل الفرم بصل , كميته على حسب ذوقك , و ملح و كمون و بهارات ( أكيد عندك بهارات طيبة بتستعمليها بالأكل ) , و في ناس بتحب تفرم معها بقدونس ( الشغلة بترجع إلك و لذوقك )

و في ناس بيحطوا البقدونس بدون البصل

و في ناس بيحطوا فقط اللحمة و الملح و البهار , و حتى بدون بقدونس , و بصل

إنت و ذوقك و رغبتك بقا

اخلطي اللحمة المفرومة جيدآ , و ضيفي صنوبر للخلطة , و بعدين كوريها , كرات صغيرة ,

حطي هالكرات بصينية مدهونة بالزيت , و ربع ساعة عالفرن , و حمريها ليتغير لونها للبني , و لا تنسي تقلبيها , و هيي بالصينية , بقلب الفرن .

جيبي بندورة طازجة ( بتقدري تعمليها فقط بصوص البندورة , و لكن بالبندورة الطازجة أطيب )

قشري البندورة , بماء ساخن , و قطعيها شقف صغيرة رقيقة , و كتري كمية البندورة . و جيبي فليفلة خضرة حلوة ( فيكي تجيبيها حدة إذا بتحبي الحد ) , قطعي الفليفلة بالعرض على شكل دوائر


هلأ : جيبي الصينية البيركس و حطيها عالغاز العادي وحطي بقعر الصينية : شوية زيت و حطي معه : ورق غار , و قرفة و هيل , و جيبي بصل مقطع جوانح , و حمريه بهالزيت ليدبل , رشي فوق البصل : شوية ملح و بهار من يلي عندك , و بتقدري تحطي توم إذا حبيتي ( نحن ما منحط التوم ) , و بس ييتدبل البصل , أضيفي دوائر الفليفلة ( مو كلها : اتركي شوي ) , و قلبيها لتدبل , و بعدين شيلي ورق الغار , و الهيل , و القرفة ( إذا كانت صحيحة ) , و حطي البندورة المقشرة, و اتركيها تغلي مع الزيت و البصل و الفليفلة لتعقد ( تتسبك ) , و الله نصيحة مني و عن تجربة , لازم هالخطوة , و بعدين حطي الكرات بتطلع الأكلة أطيب بكتير و أحسن .
( ملاحظة : إذا استعملتي صوص البندورة كمان , لازم هالخطوة يعني حطي الصوص , و اتركيه يغلي و ييتسبك مع الزيت و البصل , قبل وضع الكرات .

وهلأ : حطي كرات اللحمة فوق البندورة , و لازم تكوني تركتي شوية دوائر فليفلة , حطيهن على وجه الصينية , و وزعيهن , بشكل متناسق و حلو , فوق كرات اللحمة , بحيث تكون الكرة داخل الدائرة .

ملاحظة : مرة شفت ناس جابوا بطاطا مقلية و بيتنجان مقلي , و حطوهن على وجه الصينية بين كور اللحمة .

و لا تنسي : حطي للبندورة ملح , و رشة كمون , و رشه بهارات , و رشة كزبرة يابسة

هلأ : حطي الصينية بالفرن لتنضج

و لا تنسي تدعيلي .

هالطريقة بالصينية , و لكن فيكي تعميها بالطنجرة عالغاز . بحيث حطي الكرات , و اتركي الطنجرة عالغاز لتستوي , و لكن بالصينية : أطيب و أحسن , و أحلى , بيطلع منظرها عالسفرة , كتير حلو .

ملاحظة أخيرة : في ناس بتقلي الكرات بزيت غزير , و ناس لا بتقليها و لا بتحمرها بالفرن , بيحطوها مباشرة , و لكن إذا حمرتيها بالفرن , أطيب و أحسن .


هالأكلة : اسمها : داود باشا : إذا كانت اللحمة على شكل كرات
و اسمها : كباب هندي : إذا كانت اللحمة أصابع طولية
و اسمها : كفتة أزمير : إذا كانت اللحمة , أقراص دائرية

بتمنى يكون هالشرح الممل , و المفصل , كافي و وافي

و بتمنى , ما تدعي عليي , لإني عطيتك احتمالات كتيرة للأكلة , أرجو إنك ما تحتاري بين هالاحتمالات

اعتمدي على احساسك , و ذوقك

و مليووووووون صحة و هنا

و أي سؤال تاني : اسأليني و لا تترددي , أنا بالخدمة , و تحت أمرك


و تكرمي , و يكرموا عيونك التنتين .

السلام عليكم اختي العزيزة ايثار اشكرك جدا على هذه الاكلة اللي باين كتير طيبة وراح اجربها انشاء الله وبالمناسبة احب اخبرك باني احب الاكل السوري والبهار المستخدمة فيه لان كتير بيشبه الاكل اللي تعملنيا امي بالبيت لان امي سورية من محافظة حلب وتحية لك ولاهل الشام واهل سوريا جميعا . وشكرا لكز