بسم الله الرحمن الرحيم
على عيني و راسي أختي الكريمة , من عيني اليمين قبل عيني اليسار
جيبي لحمة هبرة ( بتقدري تحطي معها كمية صغيرة من الدهنة إذا حبيتي , حسب رغبتك ) , و افرميها متل الكفتة , و حطي معها قبل الفرم بصل , كميته على حسب ذوقك , و ملح و كمون و بهارات ( أكيد عندك بهارات طيبة بتستعمليها بالأكل ) , و في ناس بتحب تفرم معها بقدونس ( الشغلة بترجع إلك و لذوقك )
و في ناس بيحطوا البقدونس بدون البصل
و في ناس بيحطوا فقط اللحمة و الملح و البهار , و حتى بدون بقدونس , و بصل
إنت و ذوقك و رغبتك بقا
اخلطي اللحمة المفرومة جيدآ , و ضيفي صنوبر للخلطة , و بعدين كوريها , كرات صغيرة ,
حطي هالكرات بصينية مدهونة بالزيت , و ربع ساعة عالفرن , و حمريها ليتغير لونها للبني , و لا تنسي تقلبيها , و هيي بالصينية , بقلب الفرن .
جيبي بندورة طازجة ( بتقدري تعمليها فقط بصوص البندورة , و لكن بالبندورة الطازجة أطيب )
قشري البندورة , بماء ساخن , و قطعيها شقف صغيرة رقيقة , و كتري كمية البندورة . و جيبي فليفلة خضرة حلوة ( فيكي تجيبيها حدة إذا بتحبي الحد ) , قطعي الفليفلة بالعرض على شكل دوائر
هلأ : جيبي الصينية البيركس و حطيها عالغاز العادي وحطي بقعر الصينية : شوية زيت و حطي معه : ورق غار , و قرفة و هيل , و جيبي بصل مقطع جوانح , و حمريه بهالزيت ليدبل , رشي فوق البصل : شوية ملح و بهار من يلي عندك , و بتقدري تحطي توم إذا حبيتي ( نحن ما منحط التوم ) , و بس ييتدبل البصل , أضيفي دوائر الفليفلة ( مو كلها : اتركي شوي ) , و قلبيها لتدبل , و بعدين شيلي ورق الغار , و الهيل , و القرفة ( إذا كانت صحيحة ) , و حطي البندورة المقشرة, و اتركيها تغلي مع الزيت و البصل و الفليفلة لتعقد ( تتسبك ) , و الله نصيحة مني و عن تجربة , لازم هالخطوة , و بعدين حطي الكرات بتطلع الأكلة أطيب بكتير و أحسن .
( ملاحظة : إذا استعملتي صوص البندورة كمان , لازم هالخطوة يعني حطي الصوص , و اتركيه يغلي و ييتسبك مع الزيت و البصل , قبل وضع الكرات .
وهلأ : حطي كرات اللحمة فوق البندورة , و لازم تكوني تركتي شوية دوائر فليفلة , حطيهن على وجه الصينية , و وزعيهن , بشكل متناسق و حلو , فوق كرات اللحمة , بحيث تكون الكرة داخل الدائرة .
ملاحظة : مرة شفت ناس جابوا بطاطا مقلية و بيتنجان مقلي , و حطوهن على وجه الصينية بين كور اللحمة .
و لا تنسي : حطي للبندورة ملح , و رشة كمون , و رشه بهارات , و رشة كزبرة يابسة
هلأ : حطي الصينية بالفرن لتنضج
و لا تنسي تدعيلي .
هالطريقة بالصينية , و لكن فيكي تعميها بالطنجرة عالغاز . بحيث حطي الكرات , و اتركي الطنجرة عالغاز لتستوي , و لكن بالصينية : أطيب و أحسن , و أحلى , بيطلع منظرها عالسفرة , كتير حلو .
ملاحظة أخيرة : في ناس بتقلي الكرات بزيت غزير , و ناس لا بتقليها و لا بتحمرها بالفرن , بيحطوها مباشرة , و لكن إذا حمرتيها بالفرن , أطيب و أحسن .
هالأكلة : اسمها : داود باشا : إذا كانت اللحمة على شكل كرات
و اسمها : كباب هندي : إذا كانت اللحمة أصابع طولية
و اسمها : كفتة أزمير : إذا كانت اللحمة , أقراص دائرية
بتمنى يكون هالشرح الممل , و المفصل , كافي و وافي
و بتمنى , ما تدعي عليي , لإني عطيتك احتمالات كتيرة للأكلة , أرجو إنك ما تحتاري بين هالاحتمالات
اعتمدي على احساسك , و ذوقك
و مليووووووون صحة و هنا
و أي سؤال تاني : اسأليني و لا تترددي , أنا بالخدمة , و تحت أمرك
و تكرمي , و يكرموا عيونك التنتين .
الروابط المفضلة