أخواتى العزيزات .. كل عام وأنتم بألف خير


طبعا أهم الوجبات الرمضانية هى السحور .. وأهم طبق أيه ؟ طبعا فول

هو اللى بيسند البطن لغاية الفطور


والفول المصرى لايعلى عليه فى السحور


وبما أن الموضوع قديم .. كنت محتارة ..

لكن ران طبعا كعادتها أم الأفكار .. وسرقت منها فكرة الأعادة


يالة جربوا الفول ومش حتندموا الطريقة منتشرة فى عائلتنا جدااااااااااااااا


ومظبوطة على الآخر



وطبعا أى أستفسار عن الموضوع يكون هنا ....... نظرا لحظر رفع المواضيع القديمة

يعنى بلاش نعمل مشااااااااااكل

وبالهنا والشفا




فول مصرى جداااااااااااااااااااااااااا

اهلين اختي بوسي ....

انا نقطة ضعفي هي الفول ... بموت في شيء اسمه فول .. وخاصة مع الفطور ... اصلا ما آكل اي حاجة غير الفول والخبز والله بالرغم اني دائما بطبخ حجات كثيرة وخاصة لمن اكون في بيت اهلي او يكونوا اهلي عندي .. فيه عندنا فوال في الرياض ما تتصوري الزحمة عند قد ايش في رمضان ... تصوري 10 جرات فول مصفوفة في المحل ولسه تنتظري شويه علشان يجي دورك .. انا نفسي تجربي الفوال هذا ...

على فكرة في فوال مشهور بالمرة في القاهرة اسمه (( الجحش )) عمرك سمعتي فيه ؟ ... انا دائما لما اسافر للقاهرة لازم اشتري فول من عنده ... نفسي تعلميني طريقة تصليح الفول اللي بيعمله لو كنتي تعرفيها ... هي طريقة مشابهة جدا للفول المكاوي ... فول مهروس مش حب يعني ... الفوال هذا خطير جدا وهو معلم فول بصحيح.

أهلا أختى الحبيبة .. أولا كل عام وأنت بخير


ثانيا عرفتيه أزاى ده ؟؟؟؟؟؟؟؟ وبتسألينى أعرفه ( هههههههه ) بموت فى الفول بتاعه


ولازم نتسحر فى رمضان عنده أكتر من مرة .. أما نقضى رمضان فى مصر ..

قلبتى المواجع


لكن الفول عنده أنواع .. أنت تقصدى أنهى واحد ؟


مع العلم أن التدميس واحد لكن التحضير هو اللى مختلف ..

فى أنتظارك

دردشة تقصدى أن الفول يكون دايب .. مهروس صح ؟ هو ده اللى أنت بتحبيه ؟

يعنى مش تحسى بقشرة الفول .. وغليظ شوية صح ؟

عليك نور ...... هو ده الفول اللي انا عيزاه

اعملي جميل فيني وخبريني كيف تتعمل نوعية الفول هذي ...

بالنسبة للقشرة لا ما بحس فيها لأنها تكون شوية طبعا وغير ملحوظة .

بموت في الفول هذا .... الله يخليك ابحثي لي كيف يتعمل

غالى والطلب رخيص ....

شوفى هو نفس طريقة الفول اللى أنا كتباها تماما بس الفرق أنك بتحبى الماء

اللى فى الفول كتيره وسميكه زيى .. أنا ببدل بدل ما أحط 2 معلقة كبيرة فول مدشوش

و2 معلقة كبيرة عدس أصفر .. بخلى فول مدشوش نصف كوب .. والعدس ربع كوب

أما الفول نفسه بيكون كوب .. وبعد كده بتحطى معلقة صغيرة بيكنبودر.. وحبة طماطم

ومعلقة صلصة ..


و تراعى عند سواءه أنك تخليه مستوى جدااااا علشان يسهل هرسه

وتراعى لغاية ماتطفى عليه أن الماء يكون كتير مش ناشف منه

وساعة التحضير .. بتهرسيه شوية بالشوكة ..

وبالهنا والشفاء ..وطريقة السوا بالتفصيل فى الرابط .. واللهى ياريتك جانبى كنت بعتلك

شوية الفول بيتدمس على النار


وعلى فكرة هو الجحش بيقدمه بطريقتين .. بالزيت الحار .. وده جناااااااان

أو بالسمن البلدى ..

ولو عايزة طريقتهم حاضرين .. وتسلمى

ملحوظة هامة جدا .. أما تشترى الفول اليابس البنى العادى .. يفضل يكون من محل لبيع المنتجات المصرية .. لأنى جربت اللى من الجمعية كان حظى فيه وحش جدااااااا

ولو أنت مجربة نوع معين أعمليه .. وقوليلى عليه بالمرة لأنى بشتريه من محلات مخصوصة

تسلمين لي يالغالية .... والله جوعتيني .... ولسه السحور بقي له وقت على بال ما يخلص

يعطيك الف عافية .. ولكن لي سؤال ... طيب الموية اللي بسلق فيها الفول ما اغيرها

وياليتك تقولي لي عن طريقة عمل الزيت الحار

اختي بوسي انا دائما بشتري الفول المصري .... عندنا في السوق ثلاث انواع من الفول ... انجليزي ... واسترالي وطبعا الفول المصري .... يعني معقولة اشتري من الاسترالي والانجليزي واترك المصري

تسلمى دردشة ..

لاء الماء مش بتغيريه .. على العكس ده بكون أحلى طعم فى الفول لأن مع الوقت تحسيه بيتقل ويكون سميك بعد ذوبان الفول المدشوش فيه .. وكمان العدس .. وهو ده عز الطلب خاصة أنك
حتحبيها جدااااااااااااا .. وعلشان كده تحافظى عليها كل ماتقل تزوديها ماء من اللى فى الغطاء المقلوب .. وفائدة أن الغطاء فيه ماء هو أن الماء الموجود فى الفول مايتبخرش ونحتفظ بيه

لأنه بيكون طعمههو اللى بيميز الفول


--------------

الزيت الحار مش عارفة طريقته لكن هو زيت بزر الكتان .. ومفيد وطعمه مميز جداااااااااااااا

بتحطى الزيت وتعصرى ليمونة وكمون وملح ولو حابة شطة ..

وتقلبيهم كويس وبعدين تحطى الفول مع كمية مناسبة من الماء بتاعه وبتكون سميكه طبها وتقلبيهم بالشوكة وتهرسيه نصف هرس ..

وفى ناس بتزيد طحينة كمان ..