مكرونة مبكبكة بالخضراوات لشتاء دافئ
المكرونة المكبكة من الاكلات الشعبية المحبوبة فى ليبيا وتعتبر اكلة بسيطة وسريعة
وخفيفة يعنى متع كلوا خخخخخ وسهلة تنعمل فى الرحلات فى البر والظريف ان الرجال يطبخوها
احلى من النساء وانى نحب مبكبكة زوجى لما يطبخها حتى الاولاد يقولوا بابا يطبخ فيها احلى منك خخخخخخ
وتنعمل فى كل الاشكال اللى يحب الخضراوات يحط خضراوات واللى مايحبش
خلاص تمشى من غيرهم وتنعمل بكل انواع اللحوم خروف اودجاج اوبقر اواللحم المقدد وهذا احلاهم
وتقدرى تطبخيها وقت الغذاء او العشاء وخاصة فى ليالى الشتاء الباردة والماطرة زى جونا اليوم
وخلانى نطبخ مكبكة يلا تعالوا نبدا مع بعض
المقادير
انواع الخضروات اللى تحبى --قطع من اللحم متوسطة الحجم انا استعملت لحم خروف
ملح --2م ك طماطم معجون --فلفل احمر بودرة --ابزار هو الكركم --فلفل اسود --
نص بصلة مفرومة --عود بصل اخضر مفروم --2فص ثوم مفروم --5 م ك زيت
الطريقة
ناخذ طنجرة متوسطة ونضع بها الزيت ونضعها على النار ثم نضيف البصل ونتركه يذبل
ثم نضيف الثوم واللحم ونحرك الكل حتى يتغير لون اللحم شوى
نضيف الطماطم المعجون ونحرك ثم نضيف باقى البهارات حسب الكمية اللى تحبى
ونضيف لهم الماء حتى يتغطى اللحم ونتركهم حتى يغلوا شوية
ونضيف لهم الماء الى تلاتة ارباع الطنجرة ونغطى عليهم ونتركهم ليغلوا
لما اللحم يصل نص استوى نضيف كل الخضراوات ماعدا الفلفل الاخضر
والكبكة تحتاج كمية سائل كل مانقصت مع الغلو نضيف لها
لما الخضراوات تستوى نضيف لهم اى نوع من المكرونة اللى تحبى
كيس المكرونة متع 500 جرام ونضيف معهم الفلفل الاخضر الحار والرومى
ونحرك كل المكونات واول ماتغلى نخفض عليها النار ونتركها لتنضج
واذا احتاجت ماء اضيفى لها شوى
بعد ان تنضج المكرونة نصبها فى صحن كبير او ما يعرف فى ليبيا بالقصعة
لان المبكبكة تبى الجلسة العربية والاكل فى صحن واحد مع العائلة
وتاكلوها سخنة مع الليمون وفى اللى يحبها مع الخبز زى اولادى
ومحلاها لمة العيلة على قصعة المبكبكة وهى سخونة والمطر يصب
وصحتين وعافية على قلوبكم تفظلوا
هادو المكونات
هنى الزيت والبصل
هنى اضفت اللحم والثوم
اضفت الطماطم المعجون
هنا اللحم نص استوى اضفت الخضراوات
هنا مقدار الماء
نوع المكرونة اللى اخترته
هنا اضفت المكرونة والفلفل
على نار هادئة
كل المكونات
شكل القصعة وطبعا فى اشكال مختلفة وزمااان كنا نستخدم قصعة العود
وهنا المبكبكة بعد ان استوت وجاهزة للهجوم عليها
واخرى قريبة
وهادى قصعة المبكبكة مع الليمون والخبز
وهادى اثار الهجوم والدليل يد ابنى واللى اصر يده تبان فى الصورة
وان شاء الله تعجبكم
رد مع الاستدلال
كتبت بواسطة ام سنا 2003
الروابط المفضلة