كيفكم حبيباتى

الحقيقة الحمام من الأكلات المحببة عندنا فى مصر

و
الروعة أن يكون محشى بالفريك

ولكنى عندى مشكلة

هو أنى لو عملت الحمام لا يمكن آكل منه

آكل منه لو حد غيرى عمله .. ايه السبب الله اعلم

فبالتالى .. انا النهاردة هاعمل الحمام .. وعليكم بالهنا والعافية

نبدأ على بركة الله

الحمام المحشى بالفريك

نجهز الحمام بغسله جيداً ..
انا بيجيلى متنضف وجاهز يادوب اغسله كويس ويبقى جاهز للحشو

ونجهز الفريك (نغسله وننقعه فى ماء لمدة نصف ساعة)
والفريك أو الفريكة هي حبوب القمح الخضراء (القمح الأخضر) قبل جفافها تحصد سنابلها وهي خضراء وتعرض للحرارة عن طريق حرقها، ثم تجرش لتكون مثل البرغل

فى حلة متوسطة نضع ملعقتين سمن .. سامعين سمن .. ماشى يا امانى

ثم نضع الفريك ونقلب لنحمره

وبعد التقليب حوالى 5 دقائق نضيف الماء الساخن ..
الماء يغطى الفريك فقط يعنى مش كتير

واضح فى الصورة دى انه الماء مش كتير

ونضع الملح والفلفل الاسود

وحوالى دقيقتين او 3 هانلاقى الفريك شرب كل الماء بتاعه

نخليه على جنب لغاية ما يبرد

الفريك كدة استوى نصف سواء او اقل .. لأنه هايكمل سوا فى داخل الحمام

وبعد ما يبرد الفريك نبدأ نحشى الحمام

وبعد كدة نجيب ابرة وخيط ..
عاوزين مساعدة من قسم الاشغال اليدوية
انا بعقم الابرة بانى احرقها على النار وبعدين امسحها بمنديل نظيف ..

ونبدأ نخيط فتحة الحمام .. وبخيط الرقبة كمان علشان مايكونش فيه اى منفذ الفريك يخرج منه

وبكدة الحمام جاهز للسلق

فى حلة كبيرة نغلى الماء .. وأول ما يغلى انزل فيه الحمام

ولو لقيت أى ريم ظهر على وش الماء اشيله وبعدين احط بصلة وملح وفلفل اسود وورق لورا والتوابل اللى احبها

وهاياخد تقريباً نصف ساعة ويستوى

وبعدها أطلعه واصفيه من الشوربة

وأخيراً أحمره فى السمن البلدى ها .. السمن البلدى ماشى يا ناس يا بتوع الرجيم أو زبدة ومعاها ملعقة زيت علشان مش تتحرق

بس طبعاً السمن البلدى بيدى طعم الحمام الأصلى ..

واقلبه فى السمن لغاية ما ياخد اللون الذهبى الجميل

ولا تنسى قبل التقديم تشيلى الخيط

ونقدمه لأحب الناس ..

فلكم أهدى

النتيجة .. وأتمنى تعجبكم

وهنا شوفوا الفريك مستوى وجميل

راااااااااااايحة امزمز على رووواقة

روووعه بالمسن او بدونه طالع الحمام بشهي
الف صحه وهنا علي قلب الاكله

لالالالالالالالا مش معقول انا اول واحده ارد
فعلا تسلم ايدك يا احلى بيرو بجد حلوا برغم انى ماليش فى بس انا هنا صعب اجد حمام فبديلة بعمل سمان وبحشية برغل وعصاج ومعه زبيب بجد اللى اكله شكروا فى كتير المرفق 112367
بس على فكره زوجى بيحبه فممكن طبق له

ايه حكاية الحمام اللي طالعلنه اليومين دول
شكله رائع ماشاءالله
عمري ماعملته ولا اكلته مولانني مااحبه بس لانه غير متداول عندنا
بس بعد عمايلك انتي وميسو لازم اجربة
تسلم الايادي حبيبتي
والف عافية يارب

يا صفايح الزبده السايحه ههههههههههه ,, تسلم الأيادي يا قمر

أنا شميت ريحه الحمام من عندي هنا وكنت باسمع عن موضوع البرغل

لكن عمري ما جربته دايما باعمله بالرز وأتبله ملح وفلفل كتييييييييييير وأحشيه وأسلقه وأدهنه زيت وأشويه في الفرن

سامعيني يا بتوع السمنه البلدي ,, باشويه في الفرن

ألحق أجري بسرعه

يا حمامك يا بيرو
ايه الجمال ده كله
بجد رووعه ومن ايد خبيره اكيد
الصراحه انا نفسي ادوق السمنه البلدي بتاع مصر و الزبده الفلاحي
من كتر ما بسمع عنهم و كمان بشوف الدعايات فيالتلفزيون
وموضوع الحمام عمل دعايه كبيره للسمنه ههههههههههههههههههه

احنا عنا طبعا سمن بلدي وزبده بس مش عارفه شاعره انه بتوعكم طعمهم غير



نرجع للحمام
الصراحه نفسي بحته افصفصها





لوزه الحمام راائع واكيد تلاقيه فيالمولات او عند اي محل دواجن انتي هاتي حمامتين وجربيهم
ما بفرق عن الدجاج لكن له نكهة مميزةوجميله جدا

يالهوي يا مستهوي
هو دا التعذيييييب اللي على أصوله
شكله طالع تووووحفة
وخصوصي الحمامة اللي متحمرة اوي دي
لسه كنت في البلد مع زوجي
وطبخت بسمن بلدي
إيه الجمال ده
قال زيت درة قال
بالهنا والشفا يا قمر

تاني مره ابعتيلي المقادير كلها وانا بعملها وعلى النص هههههههههههههه على شان توكلي منها
الف صحه على اكل ما شاء الله بشهووووووووووووووووووووووووووو تسلم يدك