السلام عليكم

النهارده بقى جايبلكم طبق خفيف و لذيذ جدا و سهل خالص كل دول مع بعض تخيلو

الطبق اسمه ورقة اللحم

و كان زمان بيتعمل بورقة اللحمة اللى بتيجى من عند الجزار
كانت بتبقى ورقة بنى كدا و كان بيتسوى فيها اللحم

المهم تعالوا نشوف هنعملها النهارده ازاى
و الشكر موصول للاخت سرطانة بمنتدى اخر حيث انها هى اللى فكرتنى بيها
ماما كانت بتعملها زمان

شكرا لها

المقادير كيلو بطاطس مقطعة شرايح
نص كيلو لحمة اى نوع نحبه انا عن نفسى عملت موزة كانت بتدوب دوب فى الفم
بصلتين مقطعين جوانح
خمس فصوص توم مقطعين شرايح بردو
حزمة كسبرة ولو صغننة حطوا اتنين زى منا عملت بردو نخرطها رفيع
حبتين فلفل رومى شرايح
ملح و فلفل و بهارات والتوابل اللىتحبيها
انا حطيت سماق و زعتر و حبهان و شطة و زنجبيل
كمان ضيفت خمس اعواد كرفس مقطع ناعم

شوية زيت

ورق فويل وورق زبدة لو مفيش ورق زبدة ممكن ورقتين اسكتش رسم من الكبير

الطريقة
بنقطع كل الخضروات مع بعض
و بنقطع اللحم صغير
و بنلفه و نقلبه فى التوابل كويس جدا

و بعدين
نجيب صنية نفرد فيها ورق الفويل واحدة بالطول وواحدة بالعرض و طبعا الوش المشع بيكون لجوه عشان تكثيف الحرارة اثناء الطهى

كمان بنجيب ورق الزبدة و نبله شويه
او نجيب ورق الاسكتش الرسم و ندهنه سمن
و نحطه على ورق الفويل و نحط عليه الخضروات باللحم بتاعتنا
ونرشها بشوية زيت قبل ما نقفل عليها
و نقفل كويس
و نحط الصنيه فى فرن حامى على درجة حرارة 200 تقريبا لمدة ساعة الى ساعة وربع
انا حطيتها على ارض الفرن حوالى نص ساعة و بعد كدا رفعتها على الرف الاوسط لغاية تمام التسوية

و قبل ما نخرجها بعشر دقايق كدا بنفك الفويل و نفتح الشوايه عشان تحمر شويه

تقدم بجانب الارز
و السلطات

طعمها يا جماعة فى منتهى الجمال و خفيفة بشكل مش ممكن

وادى الصور و اعذرونى كنت بصور وانا مستعجلة عشان كان الاذان بيؤذن




دى كنا اكلنا نصها خلاويص






دى كانت لسه طالعه من الفرن

الموضوع من عمايل ايديا و بكاميرتى ومن مطبخى

يسلموا الايادي

ذكرتيني فيها من سنين ما عملتها

مأكول الهنا
ورمضان مبارك

الله يسلمك اختى الكريمة و انا كمان كنت ناسياها خالص
بس جزاها الله خيرا الاخت سرطانه
فكرتنى بيها
وحقيقي اكلة تجنن و جديدة بنفس الوقت و سهلة اوى
اتمنى تجربوها و بالهنا ان شاء الله

مممم ما شاء الله حبيبتي شكله بشهي

كل عام و انتي بخير

اهلا بك اختى الكريمة ام فىء
الاكلة دى لذيذة جدا مش هتبطلى تعمليها من حلاوتها بجد
و مش بتاخد وقت فى التجهيز و الفرن بقوم بالواجب كله
اتمنى تجربيها وتعجبك ان شاء الله
وكل عام وانتم بخير

الله يعطيكى الف عافية يارب
وتسلم الايادى الجميلة
والف هنا وعافية على قلوبكم

الله يعافيكى و يرضيكى اختى الكريمة امولة اهلا بك دوما

الله اللله بتجنن بجد

تسلم ايديك على اللحمه الرائعه بقى لو عملتي صنف لحمه تاني
شاركيني حبيبتي بموضوعي الذقلوب ولحوم في الشهر الكريم موضوع مثبت
يا الغاليه مي مودي

طبق تحفه

مشكورة

اهلا بيكى اختى دندونه منورانى و شكرا لدعوتك بالمشاركة بموضوعك وانا شاركت بيه بالفعل وحطيت الرابط
اهلا بيكى دايما

ماشاء الله
وصفة سهلة وطيبة
تسلم الايادي يا قمر
ننتظر مشاركة جديدة بوصفة من وصفاتك الحلوة