*وصفة مصورة* مكرونتى بالبشاميل... الكل... يوسع محدش بيعملها زيى
اخواتى
بقالى كتير مدخلتش ظروفى معلش
المهم دى طريقتى للمكرونة بالبشاميل
واتحدى
طعمها خرافة بشهادة كل اللى داقها
المهم
اولا..المكرونة........(650 جم مكرونة) بسلق المكرونة الاقلام عادى بس 3/4 سليق
وصفيها واغسليها
ثانيا..اللحمة........(حوالى نص كيلو الا شوية مبحطش النص كيلو كله) قطعى البصلة ناعم وحطى عليها زيت قليل لان اللحمة المفرومة بتبقى فيها دهون ولما تشوح حطى اللحمة المفرومة ووطى النار ثم بعد شوية حطى الفلفل الالوان المقطع( فلفلتين) والجزر المبشور (جزرة متوسطة)والطماطم المقطعة رفيع (حوالى ثمرتين طماطم)
وحطى التوابل (ملح وفلفل وكمون وزنجبيل وبهارات ورشة قرفة) وقلبى وسبيها
وقرب ما تستوى حطى المشروم المقطع وقلبى وسبيها شوية صغيرين واقفلى النار
ثالثا..البشاميل...........حطى السمن حوالى 3 ملاعق وعليها الدقيق حوالى 6 ملاعق وقلبى ولما يتغير لون الدقيق حطى كيلو لبن وقلبى ولازم يكون بالمضرب السلك وحطى ملح وفلفل ولما يتقل البشاميل اقفلى النار
التطبيق
حطى المكرونة فى طبق وحطى عليها تلت كمية البشاميل وقلبى هاتى صينية مستطيلة وحطى نص كمية المكرونة ثم ضعى اللحمة وعليها شوية جبنة موتزاريللا ثم ضعى النص التانى من المكرونة ثم ضعى باقى البشاميل ثم اكسرى بيضة وقلبيها وحطيها على وش الصينية ودخليها الفرن ولما الوش يتحمر طلعيها
ملحوظة لا تقطعيها فور خروجها من الفرن عشان متتهريش
وبالف هنا
رد مع الاستدلال
كتبت بواسطة amal55
الروابط المفضلة