السلام عليكم و رحمة الله وبركاته أخواتي جميعاً
عندي طرق متعددة لعمل الرز ...... على الطريقة السعودية ..... وبعض الطرق الأخرى
راح أكتب لكم أدق التفاصيل حتى لو كنتوا تعرفونها ..... للتذكير فقط
والآن إلى هذه الطبخات
الرز بمرقة الدجاج
أولاً :تحمسين لك شوي بصل في شوي زيت تقطعينه بأي شكل تريدين ان بغيتي أرباع موب مشكلة , وحتى مو ضروري تحمسينه أهم شي وجود البصل
المهم بعد ماتحمسينه تحطين الدجاجة وتصبين الموية , وتضيفين الملح و البهارات العدلة هي : [ هيل, قرفة (دراسين) , فلفل أسود, مسمار(قرنفل) ] .... وإذا عندك ورق غار حطيه يعطي طعم ممتاز وبعد فيه الكزبرة الناشفة الغير مطحونة جداً ممتازة
بعدين خلي الدجاجة على النارساعة إلا ثلث
في هالأثناء خذي مقدار الرز واغسليه ونقعيه شوي
طلعي الدجاجة و إذا بغيتي تحمرينها بتتبيلة معينة حطي في فنجال شوي زيت وشوي صلصة طماط وشوي بهارات مطحونة وصبي عليها شوي من مرقة الدجاجة وصبي هالخلطة على الدجاجة
وحطيها في صينية فرن ودخليها الفرن ... خليه على الوارم يعني لا تحمرينها الحين وبعدين إذا بغيتي تحمرينها بس شغلي الفرن من فوق
ترا موب ضروري هالخلطة يعني ممكن تحمرين الدجاجة بدون شي
أفضل وقت للتحمير قبل ما تقدمين الأكل بعشر دقايق لأن تحميرها ياخذ أقل من 10 أحياناً
خلاص ؟؟
المهم صفي مرقة الدجاج وكبيها على الرز
مقابل كل كاس رز كاس ونص ماء
طبعاً أنتِ الحين معليه على النار بحيث تشوفين الرز قاعد يغلي ,وإذا شفتي الرز تخفس بعدها قصري على النار حطيه على (low) وأنا أحيانا أحطه على الـ mid low عشان يستوي بسرعة في ربع ساعة بس على شرط ماتنسينه وهو على الميد لو لأنه يحترق
المهم فيما الرز قاعد ينطبخ .... حضري الحمسة واللي هي :
بصل مقطع صغار أو شرايح حسب الرغبة
احمسيه في شوي زيت واذا تشقر حطي عليه بهارات مطحونة وملح وزعفران لأن الزعفران يعطي نكهة للحمسة وريحة حلوة. وممكن إذا بغيتي تتميلحين شوي مثل ماأسوي ان كنت رايقة أضيف شوي كمون وشوي قرفة وبس ...بس انتبهي لا تحترق الحمسة لأنه بسرعة يتغير لونها إذا ماحركتيها حركيها باستمرار وحطيها على طول على الرز وصكي القدر عشان يتشرب الرز الطعم والريحة.
وإذا كنتي تحبين الصنوبر تراه لذيذ فقط ماعليك إلا انك تحمسينه قبل بدون زيت وإذا تشقر طلعيه في صحن وإذا خلصتي من حمسة البصل اخلطيه معه, وإذا كنتي تحبين الحبحر (الفلفل الحار) حطي بعد بس موب مقطع
ويارب يعجبكم
صدقوني ترا مايبيله شي أبد بس الكلام كثير والا هي ماتسوى
وكانك تبينه يصير
رز بخاري
فقط أضيفي على مرقة الدجاج السابقة كمون حب
وملعقة صلصة طماط كبيرة لكل كاس رز
و جزرة مبشورة منقوعة في ماء ساخن لمدة عشر دقائق و حمص عدل قولي نص كوب منقوع ثم اسلقيه لمدة نص ساعة ( كل ما سبق حطيه مع مرقة الدجاج) وبعدين طلعي الدجاجة في صينية وحمريها
وأضيفي الرز على المرق يعني لا تصفينه عشان ما يروح عليك الجزر والحمص.
طــــــــــيـــــــــــــب
إذا كنتي تطبخين
رزك باللحم
فهذي هي طريقتي اللي غالباً ماأسويها
أولا اسلقي اللحم مع البهارات والبصل مثل طريقة الدجاج بس انتبهي لا تحطين ملح إلا في آخر ربع ساعة ..... طبعاً مثل ماتعرفين مدة سلق اللحم ساعة ونص
المهم إذا صفيتي مرقة اللحم حطي عليها الرز وبنفس الطريقة اللي مع الدجاج تو
وفيما اللحم قاعد ينطبخ ..... سوي لك هالخلطة
بصل شرايح ... قولي نص بصلة
حبحر بارد جميع الألوان قولي ربع من كل لون
أخضر, أحمر, برتقالي, أصفر
نص طماطة : تقطعينها شرايح طولية
شوي ثوم مهروس
المهم احمسي البصل في شوي زيت واذا ذبل حطي الثوم وحطي عليه الحبحر وبعدين حطي الطماط والبهارات المطحونة ولومي وقرفة وفلفل أسود وشوي ملح وشوي صلصة طماط ولا تنسيــــــــن الزعفران رهيــــــب مره واخلطيهم مع اللحم وخليه على نار هادية الى وقت التقديم وقبل ماتقدمينه اخلطيه مرة ثانية وحطيه على الرز .... من جد لذيذ
طــــــــــيـــــــــــــب
إذا كنتي ناوية تصلحين
رز بدون مرقة الدجاج أو اللحم
احمسي بصل مقطع صغااااااااااااار في شوووي زيت الين يذبل
وأضيفي البهارات العدلة اللي ذكرتها سابقاً
وأضيفي الرز واحمسيهم مع بعض شوي لا تطولين
وبعدين أضيفي الموية والملح
وبس
وإذا تبين رز بالخضار حطي الخضار المشكلة واحمسيها مع البصل وأضيفي البهارات والرز والموية والملح
وبس
طــــــــــيـــــــــــــب
تبين رز الأندونيسيين
رز وموية وملح فـــــقــــــــط
وبالهناء والعافية .... وأتمنى اني ماأكون طولت عليكم ..... وأي استفسار ... أنا حاضرة ان شاء الله
الروابط المفضلة