اول مره انزل موضوع بالقسم وياريت يكون خفيف ( كثري منها هذي كبسه تعرفين شنو يعني كبسه) ولذيذ
حسب ما أنا و أمي وعيلتي نسويها
لو تلقين مثل هذا البصل تطلع ألذ نسميه بصل حساوي نسبة الى منطقة الأحساء
دجاجه منظفه ومغسوله (انا احب اطبخها بدون جلد)
رز بسمتي طويل الحبه مغسول ومنقوع
تقلي البصل بالزيت لحتى يتحمر شوي انتبهي لايحترق
هذا شكله بعد ماستوى ( وانا اصور لكم احترق معي شوي معليش بتصير في احسن العائلات )
ضيفي الطماطم المفرومه والمعجون والبهار والليمون المجفف
قلبيهم على النار لحتى يتسبك زين
خليه على نار متوسطه الى خفيفه لحتى ينضج وهذا شكله
طبعا لاتنسين اضافة الملح في هذي المرحله
بعد ماينضج الدجاج زين ارفعيه في قدر ثاني او صينية فرن (حتى تقدري تسخنيه اذا استوى الرز)
شوفو شكله كيف مستوي ولذيذ
اذا بتحبي ارفعي من المرق شوي (الحموس عيالي يحبون يرشون بها الرز )
بالقدر نفسه بعد مارفعتي الدجاج زيدي مويه ( نسميه مروق)
انتبهي لايكون كثير يادوب يغطي الرز ويرتفع عنه 2 سانتي تقريبا ( دخلنا على الرياضيات )
خلي المروق يغلي ثم اضيفي الرز بعد تصفيته من ماء النقع (شفتي كيف الرز يبان يعني لايكون الماي مرتفع كثير عن الرز وحده زمان قالت لي اذا بدى يغلي لازم تشوفين الرز كذا المروق يكون مضبوط)
اتركيه على نار متوسطه لحتى ينشف شوي والرز يشرب من المروق
الحين خليه على نار هاديه جدا (شعاعه)
واتركيه تقريبا نص ساعه يتسبك عدل وينشف
وهذي صوره ثانيه (بدون فلاش)
تقدم مع سلطه خضرا او بصل اخضر
ماكان موجود عندي بصل اخضر جبت لكم صوره من العم جوجل
مشيت الحال مع بصل احمر وطماطم وبقدونس
اذا بتحبي ضيفي على سلطة البصل فلفل حر
وهذا احلى صحن كبسه لحبيباتي بنات لك الحلوين
وهذي شكل سفرتنا الخليجيه التقليديه
كبسه ورطب وسلطه خضرا وكاس لبن بدون الملاعق احنا ندق بالخمس ناكل بايدنا يعني ( للأمانه مو من تصويري هذي من العم جوجل)
*وصفة متميزة*الكبسه السعوديه على اصولها
رد مع الاستدلال
مدونتي مطبخ ام مرمر و ليلو
الروابط المفضلة