المنسف الفلسطيني من مطبخي على طريقتي مشاركة بموضوع احلى الاطباق للمرأة العاملة
السلام عليكم ورحمة الله وبركاته
كيفكم يا ستات ويا معدلات
اليوم حابة اورجيكم طريقتي بعمل المنسف
احنا عنا بمنطقة نابلس بنحكيله فتيت او لبنية
وطبعا كل منطقة الها طريقتها بالطبيخ وبالاكل
واحنا عنا ما بنستخدم اللبن الجميد ابدا بنستخدم اللبن الرايب
طعمه بالنسبة الي اطيب بكتير
طبعا بتقدر الست اللي بتشتغل تسلق اللحمة بالليل
انا بقلي اللحمة عالخفيف بسمنة وبمجرد ما يتغير لونها
بشيلها وبحطها بالطنجرة وبنفس الزيت اللي قليت فيه
بقلي البصلة ومعاها الهال والقرفة عيدان بس
لاني ما بدي المرقة يتغير لونها لانها لبن
وبضغطها انا بستخدم طنجرة الضغط لكل الطبخات
اسرع واحسن واللحمة بتكون دايبة دوب
وبضغطها نص ساعة او ساعة الا تلت ان كترت
وبعدين بس تستوي اللحمة بشيلها وبصفي المرقة
من البصل والبهارات وبرجع بحط المرقة على النار ومعها اللبن
احنا عنا بنستخدم اللبن النعاج طبعا هو دسم بس طعمه لا يوصف
بحط اللبن بالخلاط ومعاه بياض بيضة
وبجط ابريق لبن (ابريق المولينكس) اله ابريقين مرقة لحمة
بس ازا كان لبن رايب عادي حطي ابريق لبن لكل ابريق مرقة
وبنضل انحرك لحد ما يغلي وما تغطي ابدا لانه بفرفط
ولما يبلش يغلى بنخليه يغلى 10 دقايق
ولما تطفي على اللبن ارجعي وحطي اللحمة منشان اضل طرية
وتتشرب نكهة اللبن
احنا بنفت للمنسف خبز عربي حاولي تفتي الخبز قبل بيوم
وحطي بكيس وخلي بالتلاجة من تحت
ولما تيجي تطبخي طوليه وحطي من اللبن المطبوخ عليه
مش كله بس بمجرد يطرى الخبز
وبعدين حطيه بسدر التقديم وفوقيه الرز المفلفل
وافرمي بقدونس وحطي عليه ومكسرات وبعدين اللحمة
بتمنى طبقي يعجبكم وينال رضاكم
اتركم مع الصور
وهاي صورة الطبق النهائي
[CENTER]بنات نسيت احكيلكم اني بحط معلقة ماجي باودر على اللبن بتعطي نكهة رهيبة
وهاي صورة تانيه لمنسفي كنت عاملته من فترة
الحقيقة انا كنت كاتبة كلام كتير عشان ست البيت اللي بتشتغل بس مرتين
انحذف معي الموضوع ويروح كل تعبي عالفاضي بتمنى موضوعي يعجبكم حتى لو ما كان مرتب
وان شاء الله تكون طبختي سهلة الكم وخصوصا للمأة العاملة لانه معروف انه الرجال بحبو اللحم والهبر
ومش معقول يكون كل اكلها صواني وحواضر
رد مع الاستدلال
الروابط المفضلة