السلام عليكم ورحمة الله وبركاته
بنات كل مرة اسوي المجبوس مايظبط معاي ليييييييييشششش ؟؟ مع اني احط في كل شي ومن افضل الانواع
شوفوا طريقتي
احمر البصل لين مايصير لونه ذهبي عشان يطلع لونه حلو وبعدين اضيف الدجاج واقلبه واحط الكركم والثوم المدقوق مع الزنجبيل وخليط من الاعشاب (( كسبرة مع شبت مع نعناع )) واقلبهم ثم احط ملعقة صغيرة بهارات عربية وهيل وعود قرفة ولومي اسود وملعقتين صلصة وحبتين طماطم طازجة واقلبهم لين مايتسبكوا وبعين اضيف المي واخليه يغلي ثم احط العيش
طبعا المقادير الي ذكرتها حسب الاشخاص الي موجودين
وحدة من الاهل بحرينية وماشاء الله المجبوس مالها روعة وفيه نكهة غريبة مب فاهمتها واستحي اطلب الطريقة
وانا مجبوسي يطلع مب حلو احس انه طعم الثوم طاغي مع اني مااحط وااايد في الطعم بس الشكل يشهي
ويييييييييييييينكم بنات ساعدوني انا في ورطة

15 وحدة قرت الموضوع ولا وحدة عنها الجواب

طريقتكِ حبيبتي صح بس عزيزتي الأول تحمري البصل ثم تضيفي الثوم وتقلبيه قليلا ثم أضيفي الليمون الأسود الجاف المقطع والمنزوع منه اللب وقلبيه مع الصل إلى أن يلين ثم أضيفي الدجاج ورسي عليه قليل من الفلفل الأسود وقلبيه شويه وبعدين أضيفي البهارات التي ذكرتيها وقلبي الدجاج حتى تطلع رائحة البهارات وأحمر الدجاج وبعد ذلك أضيفي الكزبره الخضراء والشبنث وقلبيه قليلا ثم أضيفي الصلصه والطماطم وقلبيه مره واحد ثم أضيفي الماء لغلي الدجاج وبعد ماينضج الدجاج أضيفي الأرز وعلى أن يكون الماء أرفع من الأرز مقدار أنج وبعد مايغلي الماء غطي القدر وضعيه فوق صفيحه على نار هادئه إلى ينشف الماء
وأحيانا عزيزتي نرفع الدجاج ونحمره قليلا في الفرن

إن شاءالله أكون قد أفدتكِ وأي سؤال حاضره لكِ

مشكووووورة حبيبتي حنان (( البحرين ))
هل الليمون الاسود كامل يغير النكهة ؟؟؟
طيب ليش المجبوس الس تسويه الحرمة طعمه غير ....لاني يوم اسوي الصالونة تطلع نفسها الا المجبوس لانه اكلتي المفضلة
يا الله يمكن فيه شي ثاني !!!؟؟؟؟؟؟؟؟؟
اهئ اهئ ساعدوني

طيب جربي تفرمين مع البصل فلفل بارد وحاولي ماتطولين في قليهم يعني لاتخلينهم يشقرون كثير وبعدها حطي الدجاج وقلبيهم ولازم تغطين القدر ولا تفتحينه لا قبل وضع الدجاج ولا بعده حتى ماتتبخر النكهه يعني لاتفتحين الغطا إلا للتقليب فقط وبعد مايكتسب نكهة البصل والفلفل بدقيقتين تقريبا حطي البهار لكن حذاري تتركين البهار مع الدجاج كثير على النار يعني أهم شي تحطين الماي قبل ينشف ماء الدجاج مع البهار لأني كنت أغفل عن النقطه هذي كثير والنتيجه ماترضيني ولا تنسين بعد ماتكبسين وبعد مايرشف ماءه وقبل يستوي تصبين ملعقتين زيت ع الوجه ، وبالتوفيق ان شاء الله

ان شاء الله بجرب نصائحك
تتوقعين يصير نعصر ليمونة قبل ما نطفي الفرن ؟؟؟؟!!!! عشان يكون حامض شوي

وييييييييييييييينكم بنات ....

شوفي حبيبتي اهم شي في المجبوس البهارات ...

اول شي النعناع انا ماحطه لان ريحته قوية فالمجبوس وابتعدي عنه

طريقتي ...

اول شي اقلي البصل واخليه يتحمر وعقب اضيف فصين ثوم مدقوقين وعلى طول اضيف
كم عود دارسين وكم حبة قرنفل يمكن 3 حبات وحبتين هيل واهم شي اضيف ورق الكاري
يعطيه نكهة روووووووعة ورق الكاري الطازج مو ورق الغار الناشف اللي ماله ريحة

وحاولي الثوم ما يتحمر وايد وجهزي اغراضج قبل الطبخ احسن
وعقب احط فلفل حار كم حبة واضيف طماطة وحدة مقطعة
وتكونين مجهزة البهارات المطحونة ..
ملعقة صغيرة كركم ,, وملعقة اكل بزار بحريني ويفضل تسوينه فالبيت
وملعقة صغيرة لومي اسود ,, وملعقة صغيرة سنوت ( كمون ) يفضل تسوينه فالبيت لان ريحته تكون روووعة
وعصرتين من اليمون شي خفيف يعني للعلم انا ماحط لومي اسود صحيح اكتفي بالمطحون
واحط صبغة صفراء بودرة تقريبا نص ملعقة صغيرة تعطيه لون حلو ..

انا ماضيف صلصة طماط الا احيانا اذا حبيت اغير بس اكتفي بالصبغة ..
واحط شوي كزبرة ( حشيش ) في ناس يحطون شبت انا ماحط ..

هالكمية لدجاجة صغيرة ..

وبس يطبخ شوي ويستوي الدجاج وعقب احط العيش

السر فالبهارات ..