*طبق متميز*السمك المشوى ... السمك المقلى كل وبرقلى..... من مطبخ حبيبة واكيد بالصور..
اخواتى الاعزاء اطل عليكم من جديد
والنهارده جايبه لكم السمك
وطبعا السمك وجبه غنيه ومفيده جدا خصوصا الفتره القادمه لقرب دخول الامتحانات
لازم بقى نغذى اطفالنا وابنائنا عشان يحلو فى الامتحان كويس
ورغم ان ابنى مهند لسه فى كى جى تو بس برضو دى شهاده ياناااااااس هههه
يلا بقى ندخل المطبخ
ادى السمك سمك بلطى وسمك بورى هقلى البلطى وهشوى البورى
ودى بقى الحشوه ثوم وفلفل وجنزبيل فرمتهم كلهم وضفت لمون وخل بكثره وبهارات مشكله خصوصا الكركم رائع رائع فى ازاله اى زفاره وملح وكمون
بالخلطه دى حشيت السمك البلطى وحطيته فى التلاجه
نيجى بقى للسمك البورى وحشوته
نخرط بصله كبيره بالسكين مش بالكبه
وبشويه زيت صغننين قوى نشوحها على النار
وتقليبه واحده ونظيف قطع فلفل رومى مقطعه
ونضيف بهارتنا من كمون وكركم وكزبره ناشفه وملح
بعدها نضيف معلقتين كبار من خليط التوم
نرفع بقى الخليط كله من على النار ونقلبه ونحشى السمك البورى
بعدها نغطى السمك بالرده معلش الرده هنا فى المملكه شكلها خشن قوى بس يلا بيمشى الحال
وانا قفلت السمك كمان بخله الاسنان عشان احتفظ بالحشو
ونشوى بقى السمك باننا نحط صاجه على النار ولما تسخن نحط السمك ونرصه كده
ونقلبه لما يتشوى للجهه الاخرى
اللمون بقى اللى عصرناه فى اكله السمك من الاول للأخر منرميش القشر نهائى عشان نعمل فيه المايه المتبله اللى هنغطس فيها السمك المشوى
نجيب صنيه نقصقص قشر اللمون كله ونحط تتبيله التوم اللى حشينا بيها اللبلطى وقطعت كمان طماطمايه وبصله كده تقطيع عشوائى واى بواقى عندك فى التلاجه قطعيها وحطيها خخخخخخخخخ امزح انا اوعو تعملو كده
المهم ونزود كوب مايه وخل كتير ونتبل المقدار ده كويس قوى بالملح والكمون
وبعد السمك ما يتشوى نطلعه نحطه فى المايه دى وننشله بسرعه ونحط على طول السمك فى الورق الفويل عشان المقدار كله يكون سخن
وده شكله النهائى
وطبعا السمك البلطى نعفره بشويه دقيق ونقليه فى الزيت كالعاده
ودى السفره كلها
يارب يكون الاكل عجبكم ولو عجابكم ليه طلب واحد واحد بس
ادعولى اقدر انزل اجازه السنه دى لبلدى عشان اشوف امى لان هناك ما يمنعنى من ذالك ادعولى ربنا يزيل الموانع دى واشوف امى على خير معلش طولت عليكو
رد مع الاستدلال
[
الروابط المفضلة