بسم الله الرحمن الرحيم
السلام عليكم ورحمة الله وبركاته
اليوم رح اقدم لكم اكلة كتير زاكية
متل ما عملنا لبينة الزهرة
اليوم عملنا لبنية الفول الاخضر
بس اللي بميزها هو اللبنن المخيض
هذا اللبن اللي طعمه حامض كتير وبشربو شرب مش عارفة شو بسمو في المناطق التانية بس احنا بنحكي عنه لبن اب..............مش 7up
بسم الله نبدأ
نحضر اللبن اب او المخيض او الشنينة....
نحطه بالطنجر لحتى يغلي.........ولاحظو هاي الزبدة اللي على الوجه.........ههه انا فكرتها اشي غريب اول مرة شلتها وبدي اكبها بعدين استغشيت بالموضوع ضربت تلفون لحماتي العزيزة اللزيزة وسالتها هادي الرغوة اكبها ولا شو اعمل فيها
بتقولي اوعيييييييييي هاي اللبن كله وسر الطعمه فيها وفعلا رجعتها على الطنجره وحركته منيح لحتى يختلط كويس
وبعدين ضفت كاسة رز....والعيار المزبوط كل لترين لبن الهم اوقية رز غير منقوع
ومن ثم الفول الاخضر ......بنقلي شوية بقاع الطنجرة على جنب وبعدين بنضيفة هون
وبنتركهم يغلو شوية شوية مع التحريك المستمر خوف لا يلزق بقاع الطنجرة
هون قربت الطبخة تستوي وتجمد وتصير متل الرز بحليب
نحضر القدحة شوية تومة وكزبرة ناشفة
نقدحها ونحركها لحتى تختلط بكل الطبخة
ونسكبها بالصحون
وحسبت حساب جاراتي الله يرضى عليهم
عند التقديم شوية زيت زيتون اكيد
وصحن شطة خضرة ومكابيس
والف صحة وهنا
ومطرح ما يسري يمري على قلوبكو
وكل سنة وفلسطين بخير وسلامة
تحياتي واحتراماتي
الماسة
ام سهام واسيل
الروابط المفضلة