غداى اليوم باميه باللحمة وارز وشوربة الحروف
السلام عليكم ورحمة الله وبركاته
عملت اليوم بامية باللحمة وارز ابيض وشوربة الحروف
وعشان احنا اثنين بس انا وزوجى يعنى الكميه اللى هاقولهلكوا قليلة بس والله بتكفينا يومين
اولا:البامية انا جبت ربع كيلو باميه وشلت عناقيدها يعنى قمعتها وغسلتها وحطيت فى الحله ملعقتين زيت على النار وبعدين شوحت بصلايه صغيرة مع فص ثوم مفروم وحطيت الباميه عليهم دقيقتين وبعدين حطيت اللحمة المسلوقه
وبعد 3 دقائق حطيت كوب شوربه وكوب عصير طماطم مع ملعقة صلصة
ووطيت النار لحد ما استوت البامية وطبعا انا بحط الملح والفلفل على الشوربة يعنى مش بحتاج احط تانى
ثانيا:الأرز جبت كوب ارز مصرى وغسلته كويس ونقعته فى مياه وملح لمدة نصف ساعة
وبعدين جبت حله وحطيت ملعقتين زيت ولما سخن حطيت الأرز طبعا بعد ما صفيته من المياه
وقلبت لمدة دقيقتين وبعدين حطيت الشوربه عليه يعنى تكون اعلى من الأرز مسافة عقلة اصبع
ووطيت النار جدا وسبته لحد ما الشوربه اتشربت وقلبته وغطيته وسبته دقيقتين وخلاص قفلت عليه
ثالثا:جبت حله وحطيت فيها ملعقتين زيت وجبت المكرونه الحروف اللى هى زى لسان العصفور
وشوحتها لحد مابقت ذهبى وبعدين حطيت كوبايتين شوربه وعلى فكره انا حطيت 4 ملاعق مكرونه
وبس سبتها لحد ما استوت
قولولى بقى انا شاطرة وللا لأ
على فكرة انا لسه متعلمه الطبخ من سنة تقريبا لأنى كنت فى بيت بابا وماما هانم لكن دلوقتى بقى
لازم هاعمل هاعمل
وبالهنا والشفاء واللى عايز يشرفنى احنا بنتغدى الساعه 5 مستنياكوا
رد مع الاستدلال
كتبت بواسطة naddoun
[
الروابط المفضلة