*طبق متميز*ستيك بوافر من كارمن لعيون تورتاية بالكريز ...... يم يم
صباح الخيرات كلها على عيون بنوتات منتدى لك
وأخص بالصباح حبيبتى تورتاية بالكريز
والجميله تورتايه طلبت منى طريقة الستيك بوافر وانا كنت مأجلاها لسببين :
أولا انى اكتشفت بعد ماخلصت الطبخه وصورتها انى كنت باستعمل حلل وطاسات امى العتيقه
يعنى شكلها مش ولابد فى التصوير .... فقلت أأجل نزول الموضوع اما اعمل بوافر تانى
وثانيا انى برضه اكتشفت ان كان فيه كام خطوه ماصورتهاش
لكن بما ان العزيزه على قلبى تورتايه طلبت منى الطريقه ماكانش قدامى غير انى البى واقول لها سامحينى على الصور اللى مش ولابد
نبتدى:
الأول بالنسبه للبوافر لازم يتوفر لحم ستيك اللى بيكون سميك شويه وحواليه دهن
اللى هو زى ده
ونتبل ناحيه بالدقيق والناحيه التانيه بالمسترده بس مش كتير زى مانا عملت
ونشوح برضه فى طاسه قطعه قطعه زى البيكاتا لكن نبتدى الأول بالناحيه اللى عليها الدقيق وبعدين نقلب على الناحيه اللى عليها المسترده
وبعد مانخلص القطع كلها نرجعها كلها فى الطاسه ونزودها ميه
ونسيبها لحد ماتقرب اوى تستوى نروح ناشلينها من الصوص وواخدين الصوص ضاربينه فى الخلاط مع ملعقه قشطة او كريمه ونرجع اللحمه تانى فى الطاسه ونصب عليها الصوص
ونسيب الصوص يتسبك ويتخن واللحمه تكمل سواها وبعدين نروح ضايفين حبوب فلفل أسود كامله مش مطحونه
وغالبا مش حاتحتاجى ولا ملح ولا فلفل لأن المسترده بتملح كويس وكمان حبوب الفلفل حاتعمل شغل تمام
والف هنا وشفا على عيونك ياقمرايه ياتورتايه .... ويارب اكون وضحت الصوره واى استفسار انا تحت امرك
رد مع الاستدلال
... صباح الفل ....
[
كتبت بواسطة maisoon
الروابط المفضلة