السلام عليكم

بنات انا كنت اليوم معزومه عند اهل زوجي المهم عملنا اكله سمك ومأكولات بحريه تجنن بس للأسف طبعا اتحرجت اصورهلكم لاني عندهم ههههههههه بس هقولكم السفره كانت ايه

كابوريه ، جمبري مقلي ، جمبري مسلوق بقشره بالخضره والبهارات ، سمك مكرونه مقلي ، سمك بلطي مقلي ، سمك بلطي مشوي ، بوري سنجاري مشوي ، سبيط مقلي ، والسلطات طبعا ومشروبات تجنن وفاكهه ( ياريتني صورتلكم السفره )

المهم هدف موضعي حاجه غريبه اوي لقتهم عملوها انا طبعا رحت من بدري وساعدت معاهم في كل حاجه لقيت خلطه السمك او الجمبري المقلي عباره عن ثوم طبعا وملح وكمون وليمون وفلفله حمراء مهروسه عشان تدي اللون المحمر المهم بعد مانقعناهم بالخلطه علي فكره مسبنهمش كتير المهم قبل التحمير ووضعهم في الدقيق كسرنا بيضه عليهم في الخلطه وقلبناهم تاني بسرعه وخدناهم حطيناهم في الدقيق ، بس الدقيق ميكونش كتير برضه عشان قالولي مش عاوزين السمك يسود احنا عاوزينه لونه محمر بس فحطيناهم في الدقيق وحمرنا بس بجد طلع الاكل يجنن والسمك والجمبري مقرمش مش عارفه انا استغربت من موضوع البيضه ده وقولت ايه ده ازاي ( بيني وبين نفسي ) بس اتوهمت في الطعم المقرمش للجمبري بجد زي بره بالظبط بالظبط ياريت تجربوه مش معقول تحفه موت والله اكيد هو سبب القرمشه دي والطعم الرائع

علي فكره عيله زوجي متخصصين سمك اصلا واكل بحري وبيعملوه بفن جدا بس دي اول مره اكون معاهم من الصبح واعمل معاهم واساعدهم

لو حد جربها يقولنا ولو جربتو تجربوها قولولنا برضه

بالهنا والشفا

و لو اني ما اعرف الاكل المصري بس الجمبري حاباه من كثر ما اسمع بيه
ان شاء الله مأكول الهنا عليكم يا رب
بالعافيه

نجربها ونرد لك خبر ان شاء الله

مشكوره

نجرب ان شاء الله ليه لاء..

تسلمين حبيبتي..و دايما عامر..

مشكورين جدا علي ردودكم وعاوزين نجربها ان شاء الله

ام احمد الاكل المصري جميل ياريت تجربيه هيعجبك ان شاء الله جدااااااااااااااااااااااااا

في حاجه كمان عرفتها برضه بس نسيت اقولكم عليها وهي ان بعد ماحطينا السمك في الدقيق خدنا جزء من المايه بتاعه الخلطه وحطينها رشه علي السمك تاني بس السمك بس معملناش كده مع الجمبري

الي جرب يقولنا

مشكوره عزيزتي على المعلومه الجديده تسلمي يا رب وصحه وهنا