السلام عليكن يا جميلات
النهارده عملت عزومه لزوجة خالى بمناسبة عودتها من العمره وطبعا خالى كان موجود برضه وقلت اوريكم انا عملت ايه ..... مستعدين ؟
خدوا صور العزومه الأول وبعدين نفصص واحده واحده
ادى اول لقطه

وادى التانيه

والتالته


اول حاجه عملتها كان طاجن الخضار بالباشاميل وطريقته سهله اوى:
المقادير :
كيس خضار مجمد
سمن
مكعب ماجى
ملح وفلفل
صلصة باشاميل
الطريقه :
زى مانتوا شايفين حطيت الكيس فى شوية ميه علشان يستوى على النار

وبعدين حطيت السمنه ومكعب الماجى

وبعدين ادى الباشاميل

وادى الشكل النهائى بعد ماستوى وهو مشرف على السفره


تانى حاجه عملتها كانت الكانيلونى وطبعا طريقته ماليه المنتدى فى قسم المعجنات بس انا زودت حركه صغننه : بعد ماسويته رحت قاسمه كل صباع على اتنين بالورب وطلع منظره حلو فى التقديم

شوفتوا حركة النخل اللى عملتها فى وسط الطبق ؟
وتالت حاجه كانت الكبده الإسكندرانى وطريقتها كالآتى :
المقادير:
500 جم كبده بقرى
2 بصله وسط
4 فصوص ثوم كبير
2 فلفله رومى وسط
سمن
ملح وفلفل
عصير حوالى 4 ليمونات
الطريقه :
يقطع البصل شرائح والفلفل الرومى والثوم
يخلط الكل مع شرائح الكبده ويملح جيدا ويضاف عصير الليمون
وانا تركتها ليله كامله فى الثلاجه وبعدين يوم العزومه قلبتها على النار مع شوية سمن وبالهنا


رابعا الكفته البانيه والبطاطس الكروكيت وطريقتهم سهله اوى واعتقد انتم خبيرات اكتر منى بس لو حد محتاج الطريقه يبعتلى احطهاله من عينى


خامسا كانوا كام صباع محشى ورق عنب على الماشى لزوم المزه


سادسا كان رز كبسه وزوقته من فوق بالجزر المبشور واللوز المحمر وحوالين القالب بالعنب البناتى ( حركات بأه )


سابعا كان طبق السلاطه المفتخر وعباره عن :
طماطم مكعبات
خيار حلقات
فلفل رومى شرائح
جزر مبشور
بطاطس مسلوقه مكعبات
كوسه مقليه شرائح
فاصوليا حمراء مسلوقه
خس مقطع
ذره صفراء مسلوقه
والصوص عباره عن صلصه فرنسيه زيت وخل وليمون وكمون وملح وفلفل ) ورشيته على الوش قبل التقديم على طول


ثامنا كان شوربه حاقولكم عليها
مقاديرها:
شعريه جافه
بصل مفروم
جزر مكعبات صغير
كوسه مكعبات صغير
مشروم مقطع
دقيق وسمن ولبن
ملح وفلفل
مكعب ماجى وماء
الطريقه:
يقلب البصل قليلا حتى يصفر
تضاف الشعريه حتى تحمر
يضاف الجزر
تقلب قليلا ثم يضاف الماجى والماء
تضاف الكوسه والمشروم
تترك حتى تنضج
وفى هذا الأثناء نحضر مزيج الدقيق والسمن على النار ويقلبوا حتى يمتزجوا ثم يضاف اللبنويقلب الكل جيدا ثم يضاف على الشوربه ويضبط الملح والفلفل وبالهنا


كده العزومه خلصت وانا خلصت...... حلوة ؟

الله يعطيكى العافيه على هالعزومه وعقبال عندك العمره

تسلم ايدك عالعزومه الجميله
وعقبال ماترجعى من العمره يا قمر

ماشاء الله عليك عزومة حلوة كتير
وصحتين وعافية

السلام عليكم
ما شاااااااااااااء الله عزومة حلوة وأكل ما شاء الله يفتح النفس بس معلش أنا عايزة طريقة الحاجات ديه الكفته البانيه والبطاطس الكروكيت و الكانيلونى

الله يعطيكى العافيه على هالعزومه الحلوة..وصحتين وعافية

يسلم دياتك يا رب عقبال عندك وعندنا وعند كل مشتهي يا رب

سفرة روعة والاحلى لمساتك الخاصة ال يبتضفي للطبق نكهته الي بتميز ست البيت المعدلة
بارك الله فيكي حبيبتي وننتظر المزيد من ابداعاتك الحلوة

اخواتى العزيزات تسلمولى على ردودكم الحلوه وتشجيعكم اللى يفتح النفس
أما بالنسبه لطريقة الكفته البانيه والبطاطس الكروكيت والكانيلونى للأخت amanas_88 فهى كالآتى:
أولا الكفته البانيه :
المقادير :
500 جم لحم مفروم
2 بصله وسط
1 بيضه
رشة نعناع ناشف ومفروم ناعم جدا
ملح وفلفل
دقيق وبيض وبقسماط للتغطيه
الطريقه :
تخلط المقادير جميعها ثم تصبع حسب الحجم المطلوب وتوضع فى الدقيق ثم البيض ثم البقسماط وتحمر

ثانيا البطاطس الكروكيت :
المقادير حسب النظر :
بطاطس مسلوقه
لبن
ملح وفلفل
لحمه مفرومه معصجه ومملحه
دقيق وبيض وبقسماط للتغطيه
الطريقه :
تهرس البطاطس جيدا ويضاف اليها قليل من اللبن والملح والفلفل وتعجن وتترك جيدا حتى تتماسك ويسهل تشكيلها دون ان تلتصق باليد
يشكل قرص من خليط البطاطس ويوضع فى منتصفه قليل من العصاج ثم تلم الأطراف حول العصاج وتغلق جيدا وتشكل كشكل الكفته
توضع اصابع الكروكيت فى الدقيق ثم البيض والبقسماط وتحمر

ثالثا الكانيلونى:
المقادير :
4 بيضات
1 كوب دقيق
1 و 1/3 كوب حليب
2 ملعقه كبيره زيت
ملح وفلفل
والحشوه :
لحم مفروم معصج وطماطم مقطع صغير وفلفل رومى مقطع صغير
الطريقه :
يخلط المقادير كلها بمضرب البيض جيدا ماعدا الحشوه
توضع مقلاة تيفال على النار حتى تسخن ثم تدهن خفيفا بالسمن اول مره فقط
يصب مقدار من فنجان القهوه من الخليط فى المقلاه حتى تأخذ شكل قرص مستدير وتترك حتى تحمر قليلا من اسفل ثم تقلب على الجهه الأخرى حتى تحمر قليلا
تكرر العمليه حتى تنتهى الكميه كلها
تحشى بالعصاج المخلوط بالطماطم والفلفل الرومى وتلف وتوضع فى صينيه تيفال وتدهن بالصلصه المخففه بالماء ويرش جبن رومى على الوجه
تزج فى الفرن من اعلى فقط حتى تحمر وبالهنا

الله يسلم دياتك ويعطيك ألف عايفة حبيبتي

ما شاء الله كله شهي

سفرة دايمة باذن الله

يعطيكي العافية
شكلها بيشهي