شعار₪طبق متميز₪ كان يا ما كان.....كان في ملفوفتين..*****
السلام عليكم و رحمة الله و بركاته:
قال الراوي يا سادة يا كرام..صلوا على خير الأنام...(هي أنا مو أبو عادل الحكواتي..)المهم من شي أسبوع جبلي جوزي ملفوفتين ، بس شو منظر مجعلكين و ملزق الورق ببعضو شي عجبة ، ارتعبتو حطيتهن بالبراد و كل ما بدي شي منو افتحوا بسرعة آخد يلي بدي اياه و اهرب بسرعة منهن
. بعدين قلت لحالي و بعدين لايمتى يعني قاعدين و مبلطين بهالبراد بخاف إجي نهار لاقي البراد كلو ملفوف صغير ..وللي
..لازم لحق حالي و اتصرف . فتت على المطبخ و استعنت بالله ..شمرت عن ساعديي ..جبت سكينة المطبخ..طنجرة حطيت فيها ماء و حطيتها تسخن...طلعت اللحمة الناعمة من الفريزر...نقعت كاستين رز قصير...و جبت الملفوفتين من البرادو هنن موعرفانين شو القصة
، بس شافوا السكين ارتعبوا و صاروا يتوسلوا إني اتركهن بحالهن و أنا أرفض
، قلت بسم الله و بلشت شي بالسكين و شي بالمي السخنةو شوي كان كلشي خالص و الملفوفتين صاروا بهالشكل
ما صورت كيف كانوا خوفا" على ذوي القلوب الضعيفة و مشان ما يحطوا الموضوع بعد الساعة 12..(لا تصدقوا بس أنا نسيت صور)..هلأ شو عملنا خلطنا الرز و اللحمة مع الملح و الفلفل و البهارات و شوية كمون وشوية زيت و هيك صارت الحشوة جاهزة
و بعدين قعدت لف و كلها نص ساعة و كانوا مستسلمين و قاعدين بقلب الطنجرة لا من تمهن و لا من كمهن..
حطيت فخارة المحاشي فوقهن و حطيت عليهن ماء و ملح.. غطيتهن و بس غليوا خففت النار على الآخر و تركتهن ثلاث أرباع الساعة.
أثناء ذلك دقيت أربع فصوص توم و عصرت الليمون و حمض الحصرم و لما صار الوقت أضفت الحامض و خليتهن يغلوا 10 دقائق و كان كلشي خالصصصص..
حطيتهن بطبق التقديم و أكلناهن و ما خلينالكن شي
تفضلوا شوفوا
طبعا" المرقة تبعهن كتيير طيبة فنقدمها معه، طيب احزروا شو عملت بالملفوف يلي طلع من هون و من هون..الأضلاع حطيتهن بالمخلل..الباقي..شوي عملت فيهن سلطة..الباقي رح اعمل فيهن ....بس رغود لا تقولي بعد كم يوم بس يرتاح راسي من الملفوف منعمل الأكلة و منخبر عنها***
ان شاءالله يكون عجبكن شغلي مع ألف صحة و هنا لكل الحبايب******
بدكن الصراحة...انا ظلمتهن للملفوفتين لأنهن طلعوا كتيير طيبين مو متل ما كان مبين عليهن. خلص مرة تانية ما رح اعمل فيهن شي...
رد مع الاستدلال
كتبت بواسطة حنان(البحرين)
الروابط المفضلة