حبيباتي صبايا منتدى لك العزيزات ...
اليوم حبيت تشاركوني احدى العزائم اللي قدرت اصورها خصيصا الكم عشان تشاركوني الوصفات وتعم الفائدة على الجميع ...واتمنى من الله انه الصور تعجبكم والوصفات كمان وراح اعرف من الردود اللي اكيد ما راح تبخلوا علي فيها ههههههههههههه
ما بدي اطول عليكم وبسم الله نبدا
وهاي السفرة كاملة
وهاي كمان من الجهة التانية
السفرة عبارة عن :
ورق العنب مع الكوسى
صينية دجاج مع البطاطا والبصل
فتة الباذنجان مع اللبن
شوربة ماجي
رز مفلفل مع الشعيرية
كبة شامية مقلية
مخللات وزيتون اسود
فلفل يوناني مكبوس ومحشي
وهسة بدي اشرحلكم عن صينية الدجاج والبطاطا
انا الصراحة عملت تتبيلة للدجاج كانت رووووعة
التتبيلة كانت عبارة عن بندورة رزر واحد وفليفلة خضراء
وبقدونس وزيت زيتون وملعقة مايونيز مع 2 ملعقة لبن وصويا الصوص ملعقة كبيرة
وزنجبيل فريش .. خلطتهم كلهم على المكسر
وهاي صورة التتبيلة
الصوة مو واضحة كتير بس هسه بتشوفوها على الدجاج
اللي نظفته وشرحته شوي عشان التتبيلة تدخل
وهاي الصينية بعد تقطيع البطاطا والبصل شرائح وانا كنت ناقعة الدجاج بالتتبيلة
وبعدين بتلفيها بالقصدير وبتحطيها بالفرن
وهسة ورق العنب والكوسا
بالنسبة لورق العنب
اكيد كلكم بتعرفوا كيف تلفوا الورق وعلى العموم الطريقة انشرحت بالمنتدى من الاخوات ما شاء الله عليهم ما قصروا
اما لطريقتي فانا وضعت في قاع الطنجرة شرائح البندورة هاي اول طبقة والطبقة التانية هي اللحمة والطبفة التالتة هي الكوسى المحشي
والطبقة الاخيرة هي الدوالي قصدي ورق العنب للي ما بعرف ورق الدوالي وسويتها بطنجرة الضغط مع اضافة الماجي وزيت الزيتون بمقدار فنجان والملح وشوية عصير ليمون وسلامتكم طلعت بتشهييييييييي
والرز المفلفل مع الشعيرية
انا بسوي كالتالي بحط شوية زيت بالطنجرة وبقلب الشعيرية لحد ما تتحمر شوي وبحط الرز المنقوع والمغسول فوقيهم وبقلبهم شوي مع الزيت وبعدين بحط المرقة على الرز لحد ما ترتفع عن الرز مقدار سنتمتر والرز اللي بستعمله هو رز بشبه الصنوايت واكيد بتسالوا لي مو صنوايت بس لانه ما في عنا هون بالمانيا صنوايت
هههههههههههههه
بس هينا مسلكين حالنا
والحاجة ام الاختراع
وبس يستوي الرز بقلبه بشوكة عشان ما يخرب .. وعند السكب بزينه بشوية لوز وصنوبر
فتة الباذنجان عبارة عن طبقة من الباذنجان المقطع مكعبات ومقلي
وطبقة خبز مقطع مربعات ومقلي
ويوضع فوق الباذنجان
وطبقة لحمة مفرومة مقلبة مع البصل
والطبقة الاخيرة عبارة عن لبن علبتين مع سن تومة وشوية ملح
وبخلطتهم وبسكبهم فوق الطبقات
حتى يغطوا الصحن وبزين الصحن بشوية صنوبر وبقدونس
اما الكبة يا صبايا انا بسويها نص كيلو لحمة مفرومة هبرة بدون دهن
ونص كيلو برغل اسمر خشن وبصلة بطحنهم كويس على الماكينة وبكون مجهزة اللحمة المفرومة المقلبة مع البصل والبهارات وبحشي الكبة فيها
يتبع
الروابط المفضلة