اختى ليونس اعتذر عن التاخير على الرد وانا تحت امرك يا حبيبتى هاقول لك دلوقتى البشاميل بتاعى بس من غير مقادير كله بالنظر وان شا ءالله يطلع مظبوط معاكى
- دقيق
- لبن
- شوربة او مرقة ( ودى اهم حاجة فى الباشاميل بتدى له طعم طبيعى - يكون عندك مثلا مرقة كنتى سلقتى فيها لحم او دجاج دى مهمة جدا تشليها علشان نستخدمها)
انا عن نفسى مش بطبخ اى اكل بمرق جاهز زى ماجى وغيره لانها بيكون فيها مواد حافظة وبلاوى تانية مش عايزة اقول عليها وفى نفس الوقت بيكون الاكل طعم جدا وخفيف جدا جدا ومن غير حتى سمن ولا زيت لانها فيها دهن حيوانى وفى نفس الوقت صحية جدا انا اللى عملاها بايدى وواثقة من نضافتها)
- ملح وفلفل اسود وكارى وبهارات
المقادير دى بتعمل كيس مكرونة 1/2 كيلو
اولا : تجيبى حلة عميقة تكون استانلس (علشان الالومنيوم بيلصق فيه الاكل ومع المضرب السلك تحسى انه بيتجرح)
* ملعقة كبيرة سمن وتحطيها تسيح وتسخن شوية وبعدين تجيبى تقريبا 2 ملعقة كبيرة دقيق على نار متوسطة وتفضلى تقلبى الدقيق فى السمن ( تحمرية ) بس تفضلى تقلبى لحد ما يكون لونه اصفر غامق بس مش اكتر من كده ( وهو دا السر تحمير الدقيق مستحيل يطلع ريحته لكن وضع الدقيق نى فى اللبن بيكون اكيد له ريحه لذلك الدقيق مش بنستخدمه الا فى المخبوزات اللى بتدخل الفرن لانه له ريحه) اما الخطوة دى بتخليه ييستوى وما تحسيش بوجوده فى الاكل.
** بعد لما بيصبح لونه اصفر غامق شويه بسيطه تجيبى تقريبا كوب او كوب ونصف لبن ( ومن اول هنا هاتشيلى المعلقة اللى بتقلبى بيها وتستخدمى مضرب السلك اليدوى علشان الخليط يكون متجانس ومفيش فية قطع زى الكاسترد كده) ثم تضيفى اللبن ومن هنا تبدأى تضربى جامد جدا بالمضرب السلك علشان مايكونش فيه قطع ابدا يكون سايح زى الكاسترد كده
*** هاتلاقيه لسه ثقيل وجامد ابداى اضافة الشوربة وتقلبى بالمضرب حتى تحصلى على قوام املس ناعم ومتماسك وتستمرى فى التقليب واضافة الشوربة وهو على النار حتى تحصلى على القوام اللى تحبية وخلى بالك انه كل شوية على النار قوامه بيتقل ويستوى - انا بحبه يكون خفيف علشان يدخل بين المكرونة ويكون طعمه يجنن
**** وماتنسيش تضيفى الملح والفلفل وشوية كارى صغيرين وبهارات ودوقي وانتى بتعملى وخلى بالك علشان واتخلصيهوش قبل ما تعملى المكرونة
ملحوظة
انا بسلق المكرونه فى شوية شوربة علشان يكون طعمها يجنن وقبل ما بحطها فى الصينية بقلبها بشوية باشاميل صغيرين علشان يكون كله طعمه من بعضة ما يكونش كل حاجة لوحدها
احنا كنا زمان فى بيت امى بنتخانق مع بعضنا علشان ناكل الباشاميل الباقى من صينية المكرونة
ان شاء الله انا هاعمل مكرونة بعد العيد وها اصور لك كل الخطوات وان شاء الله تعملية ويعحبك جدا انا متاكده ان شاء الله .
لو تلاحظى ان مافيش لا بيض ولا جبنة ولا غيرة عايزة تضيفى الحاجات دى ممكن بس انتى هاتلاقى طعمه يجنن من غير اى حاجة
وبالهنا والشفا
وياريت تقولى لى على النتيجة لما تعملية وانشاء الله مش ها اتاخر عليكى فى الصور
الروابط المفضلة