الكشري المصري
الكل بيسمع عن الكشري لكن أصل الكشري هو الكشري المصري وأنا جبت لكم طريقة عمل الكشري المصري على أصوله دي مش طريقه أنا نقلتها من أي موقع ولا من أي كتاب
الطريقه اللي كاتباها طريقة الكشري المصري اللي بنطبخه في بيتنا ودي طريقه سهله جدا وأكيد ان شاء الله هتلاقوا كل مكوناته في البيت
وبالهناء وصحتين
المقادير:
كيلو أرز _ كيلو مكرونه عاديه للصلصه _ كيلو مكرونه اسباجيتي(اللي مش عارفاها هيا عباره عن مكرونه شكل الشعريه بس طويله ومتينه)_ كيلو شعريه _ 2كيلو طماطم _ 8 مرقة دجاج _4بصلات_ملح _بهارات _ شطه حاره جدا _ عدس بجبه(يعني بقشره بيكون لونه اسود بس العدس المقشور بيكون لونه أصفر)
الطريقه:
أولا تسلقي كل حاجه في حله لوحدها
يعني
تسلقي المكرونه الأسباجيتي ومن غير ما تحطي لها أي حاجه ولا أي اضافات غير شوية ملح وانت بتسلقيها ونقطتين زيت في ماء السلق علشان متعجنش
تسلقي المكرونه التانيه وبرضه من غير اي اضافات غير شوية ملح للسلق
وبعد كده
تحمري الشعريه وتغسلي الأرز وتحطي الشعريه على الأرز وتطبخي الأرز وكده بيكون أرز بشعريه
وتذكري
كل حاجه تطبخيها في حله لوحدها
وبعد كده تعصري الطماطم في الخلاط وتقسميه نصفين
وتحضري حلتين
في كل حله
تحضري بصلتين وتبشريهم وتقسميهم اتنين حبه في حله وحبه في الحله التانيه
واضيفي نصفين الطماطم في كل حله نصف
واضيفي الملح والبهاراات في كل حله
بس في اهم حاجه
ان حله واحده بس من الإتنين حطي فيها شطه كتير لحد ما تكون مولعه نار يعني حاره جدا جدا
والحله التانيه متحطيش فيها حاجه
يعني بمعنى أصح هيكون عندك حلتين
الأولى ................فيها صلصه
التانيه.................فيها كاتشب
وبعد كده تحضري العدس بجبه وتسلقيه في حله لوحده
وبعد كده ممكن للزينه تجيبي بطاطس وتقطعيها على شكل شيبسي ولو عندك حمص الشام تسلقي شويه صغيرين ...............بس الخطوه دي للزينه بس يعني مش ضروري أنا مش بعملها بس قرايبي بيعملوها
التقديم :
تحضري عدد من الأطباق على حسب أفراد البيت
وفي كل طبق تحطي فيه مثلا عدد 5 ملاعق أرز + 5 ملاعق مكرونه اسباجتي +5ملاعق مكونه عاديه +5 ملاعق عدس بجبه +2ملعقة صلصه وده حسب الرغبه+ حسب الرغبه الكاتشب
ولو عاوزه تزيني كل طبق تحطي 4 حبات حمص شامي و 2 شيبسي
لو أي واحد عندها أي استفسار في اي حاجه عن الكشري لا تترددي علشان حقيقي الكشري ده بنطبخه في البيت وانا معنديش اي مانع مستنياكم
قولوا لي ايه رأيكم .................ز
رد مع الاستدلال
كتبت بواسطة om.semsem
الروابط المفضلة