عزيزتي منى
أنا من المتتبعات لكل مواضعيك رغم غيابك عن المشاركات من مدة
كتير بهتم بمواضيعك لأكتر من سبب
واحد لأنو إختياراتك للمواضيع دايما متميزة
اتنين لأنو تنفيذك دايما عاأصولو
و تلاتة لأنك بنت البلد حبيبتي
متل ما بتعرفي المطبخ الحلبي يعتمد بأسسه على المطبخ التركي و جزء كتير من طبخاتنا أصلها تركي رغم بعض التطوير و التعديل اللي دخل عليها إلا أنها تركية الأصل و النفس
تابعي يا غالية موضوعك و أنا بالإنتظار سواء بمنتدانا أو على صفحتك

اهلين بالغالية منمن
تسلم ايديك على الوصفات
وفعلا هدي هي الطريقة الصحيحة للاسكندر
انا عايشة هون في تركيا الي فترة
ودقت معظم اكلاتهم
هي طيبة لكن لو تقارني بينها وبين الأكل العربي او حتى الغربي متل الفرنسي
بيطلعوا اطيب
مثلا الكباب عنا اطيب من الأورفالي كباب او الأدانا كباب
هدا غير ان اكلاتهم هي دسمة جدا
يعني كلي صحن بتضلي لتاني يوم ماقادرة تاكلي شي
بيستخدموا فيها سمن بلدي خالص
وعفكرة الأتراك في بيتهم قليل ما بيعملوا هدي الأكلات
دايما بيعملوا طبخات اخف واوفر
معظم الأكل الدسم بيتقدم في المطاعم
يسلموا ايديك عالفكرة الحلوة ومستنيين باقي الملف ياعسل

هلا طيوفة
كيفك ,, بعد زمان
نور الموضوع بردك الي احلى من العسل ..
و ان شاء الله دايما الافراح في ديار المسلمين








































خليلي عينك يا وعودة
تقبري قلبي انت و حكياتك شو بينزلوا على قلبي متل العسل
و الوزن مضمووون ,, بس بشرط تعملي كل يوم ساعتين رياضة :

عرايس تركية ؟ رح اسال قريبتي و اجي لعندك طيرراان و لا يهمك
كيفها كاتي ؟ و كيف جامعتها ؟؟
هلا صارت بالتالت أظن ؟
الله يوفقها دنيا و اخرة
سلميلي عليها




























هلا ام مريم و زياد
هلا عيوني و الله يخليلك الاولاد و يفرحكم فيهم
نورتي حبيبتي

هلاا ملاك الروح
الله يسلمك و يخليك على هل الدعوة الحلوة
نورتي الموضوع اختي










































هلا رينو
هلا ببنت بلدي
خليلي عينك على الرد الحلو و الكلام الي ما بيطلع الا من قلب طيب
و بالفعل الطبخ الحلبي بيعتمد بشكل كبير على المطبخ التركي , و في كتير اشيا مشتركة
يمكن لهيك بالنسبة لي انا كتير بحب الطبخ التركي و بحسه فيه نفس غير شكل
نورتي الموضوع و نورتي صفحتي و الف شكر ليك علىالرد الي بيبل القلب















































هلا أختي mahmouds angel

بتعرفي اختي , بالنسبة لي انا احب التويع , و بحس ان الاكل التركي من اطيب ما يكون لانه قريب على ذوقنا مع لمسات جديدة
و بالفعل اكلهم دسم كتير , بس هلا الجيل الجديد كله بيطبخ بدسم ااقل
و الاسكندر هي بالاساس اختصاص مطاعم و كلامك ان هي الطريقة المظبوطة شهادة لي
نورتي , و يا ريت اذا في عندك اي اضافة تقوليلي , لان اكيد خبرتك انت اكتر مني ما دامك عايشة بتركيا
تسلمي حبيبتي على الرد و نورتي

لانه قريب على ذوقنا مع لمسات جديدة

بتعرفي يا منمن انا هدا الي كنت بدي اقولك اياه
فعلا هدي اللمسات البسيطة بتعمل فرق كبير بالطعم
عشان هيك باقولك اكلنا اطيب
مثلا هم عندهم مابيضيفوا بقدونس للكباب
بس احنا بنضيفه وبيطلع اطيب
وفيه اكلة عندهم اسمها مانتي قريبة عالشيشبرك
بس الشيشبرك اطيب بسبب طريقة طبخ اللبن والتقلية اللي بنضيفها
بس تعرفي هو في شي من ناحيتنا احنا كعائلة
لأن حتى ماما لما اجت زارتني قالتلي اكلنا اطيب
ولأن احنا اكلنا اكلات منوعة مثلا صيني-فرنسي-هندي-سوري-ارمني-انجليزي
وكان آخرها التركي فالمقارنة بتصير على هالأساس
ولأن احنا مابنحب الدسم ابدا فالأكل الغربي اقرب لزوقنا
بتعرفي الغرب بيطبخوا بدسم اقل ودجاج اكتر من لحم وازا في لحم بيكون بقري
وبإضافة لمستنا الخاصة من بهارات ونكهة بيطلع تمام
عندك انا مثلا بأموت من شي اسمه دهن
يعني كنت آكل اللحمة في بيت اهلي خيط خيط
وكانت ماما تقولي بتسدي نفس الواحد
وبشكل عام ما باكل اللحمة الا مفرومة وبدون دهن مخصوض وهدي قليل كمان
تتخيلي عاد ان الكباب التركي الدهن بيكون مبين فيه قطع صغيرة عيني عينك
بقى انا كيف بدي آكلها
لكن انا اكتر اكلة تركية باحبها هي الاسكندر لأنها بتنعمل بالبفتيك
يعني لحمته مافيها دهن
مع ذلك بيحطولي عوشها طن زبد بلدي اصلي
معدتي بتصير اشكال الوان
لكن مثلا الأتراك مشهورين كتير بشورباتهم
عندهم انواع كتير شوربة واغلبها بتكون تقيلة في القوام
وفي انواع كتير منها فعلا طيبة
عفكرة يا منى انا باموت في الأكل السوري مع انه زي مابتقولي قريب من التركي
بس السوري فيه لمسة غير
في المحاشي واليبراك والكبة واليلنجي ياللي هم اكلات كمان تركية

وعفكرة انا لما حكيتلك ان طريقتك في الاسكندر كباب صحيحة
ما كان قصدي اني اتفلسف او ابين حالي
بس لأني شفت قبل هيك في المنتدى وصفة للاسكندر
فيها طحينة وليمون وخبز مقلي ومابعرف شو وشغلات ما الها علاقة بالاسكندر
وايامها خفت احكي مايعجب صاحبة الموضوع

بس انا فعلا مبسوطة اني لاقيت مين اقدر اناقشه في شي تركي حتى اتونس
آسفة عالمداخلة الطويلة ومستنيينك ياعسولة

هلاااا و الله هلا

بالعكس ردك انا الي مستنيته
يمكن انا بحبه لان هو قريب كتير من مطبخنا
بتعرفي نحنا لما منروح على تركيا منحتاار شو ناكل لناكل من كتر ما منحب أكلهم
و زوجي بيقول لي الطبخ للأتراك و بس !!!

و انا متلك ما بقدر باكل دسم ابدا ,, هلا مثلا الاسكندر ما بحط الزبدة ,و لو انها رح تعطيها طعمة اطيب بس انا مو مستغنية عن معدتي
بس انا حطيتها بالطريقة فوق للحتى تكون الطريقة المظبوطة

رح خبرك شي تاني ,, بس خليه سر بينا :
احنا كمان بحلب ما منضيف بقدونس للكباب , منكتفي بس بالبهارات و طعمة الدهن الي رح يدوب وقت الشوي
بس منحط بقدونس و بصل مع خبز المشاوي مع الدبس فليفلة و يم يم يم
و لما منحط مع الكباب بصل و بقدونس منسميها كفتة
مع اني مو من محبي اللحمة
بي خبز المشاوي هاد انا باكله لحاله من كتر ما بحبه



و اذا بتعرفي تعملي هي الشوربة الي قلتي عليها , يا ريت تعلميني يااها
انا بحب كتير الشوربات

بتعرفي مو بس عنا بالمنتدى , بكتير مواقع بيقولوا ان الخبز لازم ينقلى و طحينة و و و , و كمان مرة شفت واحدة كاتبة لحمة مفرومة !!

هلا سؤال فضولي ,, انت لهجتك حسيتها سورية , بس كلامك قال انك مو سورية ؟؟
فيك تقوليلي من اي بلد ؟ و اذا سؤالي محرج اعملي حالك مو شايفتيه :


نورتي الموضوع

الله يسعدك شو ضحكتيني
سبحان الله الناس ازواق
وياريت بس يختلفوا عالأكل :s
بس تعرفي انا باعرف عن الدهن اللي بالكباب اللي بيسيح في الشوي
بس هون عندهم نوع تااااني من الدهن ما بيروح بالشوي
وبيضل مبين في الحمة على شكل قطع صغيرة بيضا
زمان كنت اعمل حالي مو شايفاه وآكل
بس بعدين ماقدرت اتجاهل الموضوع
بعدين تعالي ليش بتجي عتركيا ومابتجي عندي والله حرام انا لحالي اغلب الوقت
بتسليني
بالنسبة للشوربات انا باشتريها جاهزة او باكلها في مطعم
لكن راح ابعتلك الوصفات اول ما احصل عليها وعد
اما جنسيتيفأنا فلسطينية لكن غريبة انت تاني بنت تفكرني سورية

ان شاء الله مبسوطة على طوول

غريبة قصة الدهن بالكبااب ,, و انا لو منك ما بقدر حطه بتمممممممي

يا ويلي ابشع الشي قرقطة الدهن تحت السنااان

خلص اذا الله راد و بقيت عند كلمتك بجي بعملك زيارة لما بجي على تركيا


انا بانتظار الطريقة ذا قدرت تجيبيها

بتعرفي لهجتك كتير قريبة للسورية لهيك فكرتك سورية
و على كل نحنا كلنا حكياتنا قريبة لبعض

سعبيدة كتير لمعرفتك ,, نورتي يا قمر

هلا الوصفة التانية من الموسوعة , كمان من الوصفاات الي كتير مشهورة و كتير الها شعبية و اسمها بالتركي هنكار بيغندي يعني : أحبها السلطان و نحنا منسميها :

بهجة السلطان


هلا الصورة :




و هلا نخش على الطريقة و المقادير :




المقادير :

750 غ لحمة غنم شقف
سمنة أو زبدة
2 كوب ماء
حبة بصل
حبة فليفلة خضراء
حبة بندورة كبيرة
فص ثوم
ملعقة كبيرة رب البندورة
ملح و فلفل

مقادير بهجة السلطان :

كيلو باذنجان مدعبل
عصير نصف ليمونة
3 ملعقة كبيرة زبدة
2 ملعقة كبيرة طحين
كوب حليب
2 ملعقة كبيرة جبنة موزاريلا مبشورة
ملح و فلفل



طريقة التحضير :



· تقشر البندورة و تزال بذورها ثم تفرم ناعماً , يفرم البصل و الفليفلة و الثوم .

· تقلب اللحمة بالسمنة حتى يتبخر مرقها و تحمر من كل الأطراف ثم يضاف الماء و يغطى القدر و يترك على نار هادئة حتى يبقى القليل من الماء .

· يقلب البصل و الثوم و الفليفلة بالمزيد من السمنة حتى يطرى البصل , يضاف البصل و الثوم و الفليفلة لقدر اللحمة مع البندورة و رب البندورة و الملح و الفلفل ثم يغطى القدر و يترك 15 دقيقة أو حتى تكمل اللحمة نضجها , إذا جف الماء قبل نضج اللحمة يضاف المزيد .

تحضير بهجة السلطان :

· يحمى الفرن على أعلى عيار , يثقب الباذنجان بالشوكة كي ينضج داخله ثم يرتب على صينية الشوي و يشوى لمدة 35 دقيقة أو حتى تتحمص قشرته و يطرى داخله .

· يقشر الباذنجان و يتم التخلص من أي قطع قاسية بداخله ثم ينقع بالماء و عصير الليمون و الملح لمدة 10 دقائق لكي يحافظ الباذنجان على لونه الشهي , يصفى الباذنجان و يعصر بلطف بين راحتي اليد للتخلص من الماء الإضافي .

· تذوب الزبدة ثم يضاف الطحين و الملح و الفلفل , يحرك المزيج بملعقة خشبية حتى تمتزج الزبدة و الطحين جيداً , يضاف الباذنجان و يهرس بشوكة مع تقليبه حتى ينعم تماماً .

· يضاف الحليب بالتدريج و يقلب المزيج بمضرب سلكي بعد كل إضافة , تترك هريسة الباذنجان لتغلي قليلاً على نار هادئة حتى تتكثف , تبعد عن النار و تضاف الجبنة و يحرك المزيج ثم يصب على حواف طبق التقديم و يترك المنتصف فارغاً ليملئ باللحمة المطبوخة و يقدم ساخناً .



ان شاء الله تجربوها ,,و لا تنسوا تردوا و تعطوني رايكم

مشكوره حبيبتي على الوصفات الطيبه واللذيذه وبانتظار باقي الاطباق