بداية السلام عليكم ورحمة الله وبركاته

حقيقى انا مبقتش فاهمة الجواز اليومين دول بقى ولا مباحاثات القمم العربية اللى دايما مكنتش بتطلع بنتيجة مفيدة .. زمان كنا بنقول ان البنات بتتشرط وتقول عاوزة شبكة بكذا وشقة ملك فى الحتة الفلانية وعريس بيشتغل فى المكان الفلانى ومهر وعفش وهكذا .. يعنى كانت المشكلة فى طلبات العروسة .. لكن لو لاحظنا ان حتى بعد ما كتير من البنات اتخلوا عن كل الطلبات دى حتى الشبكة فى بعض الأحيان ومع ذلك برده لسة مفيش جواز ...

المشكلة دلوقت بقت فى العريس .. فاكر اكمن الجواز قل والبنات سنها بيكبر يبقى يقدر هو واهله يتحكموا فى بنات الخلق.. يجى العريس من دول يقولك دورولى على عروسة وعلطول امه او اخته يكلموا كل معارفهم .. بصوا بقى الطلبات .. عاوزها بيض وامورة وطويل متبقاش قزعة .. عاوزها خريجة كلية محترمة ومتشتغلش بعد الجواز .. وتكون ساكنة فى المنطقة اللى انا سكن فيها علشان لما اجى ازورها ايام الخطوب مدبش مشوار طويل ويطلع عينى .. وياريت من الآخر تجبولى صورتها علشان اوفر تمن علب الشيكولات والا الجاتوه اللى هروح بيهم فى اول مقابلة ويضيعو عليا لو العروسة معجبتنيش .. اه نسيت اقلكو كمان ياريت تبقى اصغر منى ب 5 او 6 سنين .. مش عاوزها اقل بسنة مبحبش السن دا ... وكأن اللى عندها 28 والا 29 عور مثلا والا مش هتخلف والا فى حاجة فيها ناقصة .. على فكرة يعنى ممكن كمان اللى عندها 24 متبقاش حلو وممكن متخلفش بردو دا كل دا بإيد ربنا

نيجى بقى نشوف لما نعرض عليه عروسة يكون الرد ايه منه او من امه .. لو قلنا العروسة هادي يقولولك لألأ مش عاوزينها كدا هادية وبتضرب لخمة احنا عاوزينها حركة واجتماعية .. لو قولنالهم حركة واجتماعية يقولولنا لألأ مش عاوزينها تركب ابننا وتقويه علينا بعد الجواز ..

اللى يفقعك بقى ان العريس دا اساسا ممكن ميكونش أمور ولا شخصيته حلوة ولا متدين .. هو قاعد يتشرط وبس ... هل فى عريس فكر مرة يبعت صورته للعروسة تشوفها قبل ما يدخل بيتهم ؟!!! طبعا لأ .. العروسة بس هيا تبعت صورتها علشان تبقى معرض يتفرج عليه كل من هب ودب .. لأ والأنئح من كدا ان امه ممكن هيا اللى تشوف الصورة الأول ولو معجبتهاش ترفض من برة برة من غير ما ابنها يقول رأيه .. عجبى على هذا الزمان.. مفكرتش الأم دى ان دا ممكن يحصل فى بنتها فى يوم من الأيام !!!

خلاص معدش حد بيدور على الشخصي المحترمة ست البيت اللى تقدر تتحمل وتكمل .. فين أيام زمان لما كان الناس بتخطب من ابعد البلاد لمجرد انهم سمعوا ان البيت اللى منه العروسة بيت محترم .. كان العريس يسافر لخطيبته مئات الأمتار علشان يفرحها فى موسم معين ويجيبلها الهدايا .. معدش فى رجالة بمعنى الكلمة .. للأسف يعنى .. إلا من رحم ربى

اما بقى اللى يضايقك أكتر ويحزنك ان البنت تبقى فى الآخر هيا اللى عليها اللوم .. تيجى امها والا اختها والا واحدة جارتهم تقولها ما تشدى حيلك بقى مفيش عريس ظهر كدا والا كدا ... وكأن العريس دا سمكة ممكن نصتادها بالصنارة .. ويفضل الناس يقرفوها وينغصوا عليها عيشيتها ويقلولها اللى قدك دلوقت اتجوزوا ومعاهم بدل العيل ثلاثة .. للأسف نسيوا ان كل دا بإيد ربنا سبحانه وتعالى وان الجواز دا رزق زيه زى اى رزق فى الدنيا ...

عزيزتى البنوتة .. لا تحزنى .. كونى قوية .. كونى واثقة من نفسك .. كونى واثقة من ان عدم جوازك الى الآن هو الخير كل الخير لكى .. هذا ليس عيبك انتى بل عيب الزمن الذى نعيش فيه الآن ..

أميرة تسلم إديكي على الموضوع الحلو زيك مضحك بس الصراحة
حقيقة في أنواع كتير فيها المواصفات ديه الله يهدي الجميع

الله يسلمك حبيبة قلبى .. والله مضحك فى الظاهر بس يا جيجى لكن فى الباطن محزن جدا لأن دى الحقيقة وعلشان كدا نسبة العنوسة زادت جدا

مش عارفة أقولك إيه يامرمر والله
أنا أكتر واحدة حاسة بيكى بجد
بس فعلا تسلم ايديكى يارب
والله نفسى حد من اللى بيدورا على عرايس لأبنائهم يقروا الكلام ده ويشفوه
بس العيب مش فى الزمن العيب فين احنا وصدق من قال ( نعيب زماننا والعيب فينا وما لزماننا عيب سوانا )
يابنتى ده قليل قليل من كثيرررر أووووووووى من اللى بيحصل
أحكيلك كدة حاجة بسيطة مرة واحدة راحت لعروسة وزى ماقولتى كانوا واخدين علبة شيكولاتة المهم راحو وماعجبتهمش العروسة تعمل ايه بقى بعد ماخطبت لأبنها واحدة تانية طبعا اتصلت بالوسيطة اللى كانت تبع العروسة الأولى قالتلها اعزمى أهل العروسة دى علشان أنا ليا جميلة عندهم اللى هيا علبة الشيكولاتة خليهم يجوا الفرح ويردوا الجميل عمرك شوفتى نتانة أكتر من كدة ( أنا آسفة على اللفظ ) بس ده للأسف الواقع المريرررررررررررررر
جيتى على الألم يامرمر ودوستى جامددددددد أووووووووى شيلى ايدك بقى لحسن وجعتينى ههههههههههههههه اضحكى بقى ربنا كريم وإن شاء الله البنات كلها هاتتجوز ويعيشوا فى سعادة وربنا مقدر لكل واحدة فى وقت معين لما يحين خلاص مافيش حاجة توقف أمام إرادة الله
ربنا يعزك يارب على شعورك النبيل بأخواتك فى الله اللى ماتزوجوش ولازم البنات مايزعلوش اللى يحصل معاهم أى موقف لأن تقدير ربنا كله خير
ربنا يرزق بنات المسلمين جميعا الأزواج الصالحة فى القريب العاجل اللهم آآآآآآمين

جزاكى الله خيرا حبيبتى ام سنابل على كلامك الحلو .. بس صدقينى انا مش متضايقة من عدم جواز البنات دول اكتر مانا متضايقة من الاسلوب اللى بقت الناس بتفكر بيه .. لأن الجواز أولا وأخيرا نصيب ورزق هيجى وقت ما ربنا يريد او ميجيش ويبقى دا الخير .. وانا شيلت ايدى اهو يا قمر اوعى تتألمى تانى ههههههه ,, وايه الناس اللى انتى بتحكى عنهم دول أعوذ بالله للدرجة دى انحطت اخلاقنا مش افكارنا بس ,. ربنا يعافينا ويرحمنا يارب

ههههههههههه جزانا وإياكى ياقمر
ربنا يهدى المسلمين جميعا يارب لما يحب ويرضى
شوفتى نسأل الله العفو والعافية والله يابنتى الناس دول
حاجة بسيطة من بلاااااااااوى كثيرة ربنا يرحمنا ويعافينا ولا يبتلينا

فعلا يا أميرة دي ظاهرة منتشرة مش بس في مصر

دا عندنا كدا وأكيد في كل مكان

يكون العريس معفن لا شكل ولا شهادة وقاعد بيعطي شروط

جه من فترة صاحب جوزي لويارة عندنا وطلب مني أدورلو عروسة تكون كويسة

فأنا اخترت لي صديقتي بسم الله ما شااء الله متدينة وجسمها حلو وملامحها حلوة

ومعايا ماجستير وموظفة مش ناقصها حاجة

وراحو أهله يشوفوها جم يعاتبوني ويقولو تعبنا نفسنا مواصلات على شيء مش مستاهل

بقلهم شو يلي مش مستاهل بقولو البنت سمرانية ونحنا عاوزينها بيضة

بصراحة تغزت جدااااااااااا

وهو عفوا كاين ايه يا دوب في أول الطريق وشكله عادي واسمر كمان

اللهم اهدي قومي فإنهم لا يعلمون

والله يا أم ليا انا مش فاهمة ايه حكاية بيضة اللى ماسكين فيها دى .. هو السمرة مالها انا مش فاهمة .. ممكن كون واحدة بيضة جدا ومش حلوة او دمها تقيل وبقابل منهم كير والله .. المهم الشخصي والروح الواحد مش بيتجوز عروسة مولد المفروض انه بيتجوز بنى آدمة من روح وفكر واخلاق .. على كدا بقى لين بنتى سمارة ومحدش هيتجوزها ههههههههه يالهوى على الزمن اللى احنا فيه .. رحماك يا ربى

تسلمين اخيتي على الموضوع ,,,

ويعطيك العافية ,,,


تحياتي

ام لييييييييييييييييين طرح رائع نفع الله بك الاسلام والمسلمين

الله يعينا ع الزمن اللي احنا فيه ........ واللع بتسمعي حاجات الله المستعان ........

اللهم ارزق بنات المسلمين الازواج الصالحين