رجعتلكم الحمد لله أنا وجود
أنا بجد مش عارفه أقولكم أيه وحشتونى جداً جداً ، وربى لا يحرمنى منكم ومن مباركتكم الحلوة ودعواتكم الجميلة وأنا دعيتلكم كلكم وان شاء الله مش ناسية حد منكم خالص اللهم تقبل دعواتى ، وبجد انا عمرى محنسى انى من يوم متزوجت وانتسبت للمنتدى وانا دائماً كان ملجأى الوحيد انتم بعد الله سبحانة وتعالى وكنتم دائماً نعم العون والسند ربنا يخلينا لبعض يارب ويجمعنا يوم القيامة جميعاً تحت ظله ياارب العالمين.
وأنا فرحت جداً لما دخلت ولقيت حبيبة قلبى الماسة الذهبية بتطمنكم على والظاهر كان فيه رقم خاطئ فى النمرة بس امبارح كلمتنى وسعدت جداً بسماع صوتها الله لا يحرمنى منها ولا منكم يارب وكل واحده هنتنى بقدوم جود أسعدتنى جداً والله يبارك فيها يارب ويدخل السرور عليها من حيث لا تدرى ويرزقها ما يشاء.
أما عن أخبارى فعجيبة وغريبة يا بنات أنا لحد يوم السبت بليل جوزى مجاش وكان بيكلمنى حلو جداً ويقولى انه مينفعش يدخل بيتنا وكده وطبعاً انتم عارفين المشاكل اللى بينه وبين بابايا وانا أبويا صعب شوية بس أبويا حعمل ايه المهم انى اتخانقت معاه وهو متخانقش معايا وقاللى حقك عليا وسامحينى وكنت فعلاً زعلانه منه وقلتله اعمل اللى يعجبك وفعلاً جه من الساعه 6 صباحاً تحت البيت ومرداش يطلع طبعاً ورنلى انزله ووالدى معجبوش طبعاً ومسكتليش وسمعت اللى سمعته بس سكت عشان ارضى ابويا وارضى جوزى وطبعاً كل ده عشان ارضى ربنا سبحانه وتعالى فى الأول وفى الآخر ، وطبعاً بابا قعد يزعق وزعق لماما عالسكة وهى ملهاش ذنب وقالها روحى معاها انا حروح بمزاجى اخدت شنطتى وماما وبوست بابا وقلتله متتاخرش عليا فى المستشفى عشان محدش غيرك حيأذن فى ودن جود ان شاء الله ويحنكها وطبعاً انا والدى صعب جداً يعنى لو هو عاوز جوزى يطلع ااقل حاجه كان قاله اتفضل انما ابويا قاللى هو عاوزنى انا اسلم عليه ابتلعت الموقف ودعيت ربنا ونزلت وقابلنى جوزى بابتسامة وقاله سامحينى وسلم بمنتهى الاحترام على امى ورحنا المستشفى كانت الساعه 8 قعدنى وقعد يطبطب عليا ويدعيلى ويطمنى ودخلت السيستر قاست الضغط وقالتلهم غيرولها وغيرلى هدومى بمساعده ماما وكان بيعملى كل حاجه بنفسه وجه بابا دخل الأوضه وسلم على جوزى كانهم اغراب اهلا ازيك ومد ايده زوجى كان ناوى يبوسة وهو بيسلم بس سلام بابا كان رسمى اوى فقاله ازيك يا عمى وانتهى الموقف ونادونى ادخل غرفه العمليات وكنت خايفه جداً ، بصراحه زوجى كان قايلى احجز جناح معزول فى المستشفى عشان الازعاج وكان اخواتى موجودين وامى وابويا ومرات اخويا وجوزى ولبست وكنت خايفه اوى من البنج ودخلت اوضه العمليات واخر حاجه زوجى باس راسى وقالى مستنيكى ، دخلت طبعاً وكنت خايفه وانتوا عارفين ان الدكتور صديق قديم اوى لبابا وهومولد امى طمنى وقعد يهزر معايا وانا بقرا قران وبدعى لكل اللى وصانى ادعى ومجرد شكة الأبره من دكتور البنج محستش غير وجوزى ماسك حاجه فى ايده انا مش شايفاها كويس وبيقولى جبتى لى بنوته زى القمر شبهك ولو تعرفوا عمل معايا ايه من يوم مولدت انا قعدت تلات ايام فى المستشفى الله أكبر عليه انا عارفه انه طيب وحنين لكن مكنتش متخيلة انه يشيلنى وياكلنى ويساعدنى ادخل الحمام وكنت ساعات بكون محرجه من الدم وينظفنى واثبتلى فعلاً انه مرضاشيجى مجرد المشاكل اللى بينه وبين والدى وانه لو يطول كان قعد جنبى وانا بجد دعيتله من قلبى ربنا يخليه ليا انا وجود ، وسبحان الله جود تشبهنى جداً جداً ومش واخده من باباها غير ودانه وقدم رجله ، ولقيته سعيد بيها اوى اوى ، طبعاً العملية مش مؤلمة للدرجه اللى تخيلتها بس طبعاً جرح فى البطن يعنى متعرفيش تقومى وتقعدى لوحدك وكمان القسطرة اللى بتركب اثناء العملية دى للمثانه وجعتنى لما اتشالت وحسيت انها لحد النهارده عملالى جرح فى القناه البولية ولكن الحمد لله الدكتور بكرة بيشيل الشاش والبلاستر لانى عمله تجميل مش غرز وبالنسبة لجود هى اتولدت كويسة الحمد لله ولكن تالت يوم حسيت ان لون وشها اصفر واخويا جه قالى نفس الكلام عرضتها على الطبيب قاللى انها عندها صفرا فسيولوجية اغلب الاطفال بتجيلهم وبتروح بالرضاعه الطبيعية والتعرض لضوء الشمس فى الصباح الباكر او قبل الغروب وكمان الضوء النيون"الأبيض" وهى بردانه شوية مناخيرها مسدوده بس بحطلها نقط للأنف ، وبرضعها طبيعى ولكنها بتشرق كتير وبخاف، أما بالنسبة ليا فحاسة بس انى متضايقه ومش مبسوطه انا زوجى روح لعمله بعد موصلنى هنا امبارح والمفروض انى اروح بيتى عالعيد ان شاء الله كل سنة وانتم طيبين وطبعاً سالت الدكتور انى متضايقه ومش مبسوطه وبحي احياناً ان البيبى ممكن تموت ، تشرق تتخنق، قالى معلش دى طبيعى ولكن افضل انك تروحى طبعاً انتوا عارفين ان بنت اخويا مريضه وبتعمل عمليه فى الجمجمه عملتها من يومين وراسها وارمة وحالها الله لا يوريكم طبعاً انا بسمع وهما بيحكوا وبتقطع وفى انتظار نتيجه العملية من تحسنن حالتها ووالدى قاعد فى المزرعه بتاعتنا مشغول جداً حتى جالى المستشفى مرتين فقط وكلامة مع جوزى كان قصير للغايه وأمى بصراحه بينى وبين اخويا اللى بنته فى المستشفى يعنى تجلس معايا تاكلنى وتهتم بالبيبى ونضافتها وتتركنى وتروح تشوف البنت وانا بجلس لوحدى فقالى الدكتور الاحسن روحى بيتك وافرحى مع زوجكك لان ظروف بنت اخويا حتسببلك كآبه وطبعاً انا منتظرة بس احلل ل جود الصفرا مرة كمان واطعمها واستلم شهاده ميلادها ادعولى لانى فعلاً حاسة بضيق شديد وآسفه انى طولت عليكم ولكن مليش غيركم يا بنات أدعولى والله لا يحرمنى منكم أبداً يااااااااااااااارب ولكل واحدة منكم منى قطهة شيكولاته احتفالاً بوصول حبيبتى جود وقبالكم جميعاً ياااااارب.
رد مع الاستدلال
الروابط المفضلة