السلام عليكم
شلونكم اخواتي اشالله الجميع بخير
صارلي فترة مداخلة واليوم خلت وشفت البيت مقبت كلت خلي اسويها مفاجاة وافتح البيت الجديد هالمرة
ام هنودة انتي انشلغتي بالمدرسة والمسطرة واني كلت افتحه بالنيابة عنج هالمرة
ميخالف بس هالمرة
حتى يصير تسجيل الحضور الي رسمي محد يكول متخل
يعني كلما تدخلون تشوفون اسمي ههههه
المهم شلونكم شخباركم انشالله الجميع بخير
المهم يامية هلا بيكم بالبيت الجديد وانشالله بخير الخير والسلامة والعافية

السلام عليكم
مشكورة اختي على فتح البيت الجديد
والله يجعله فاتحة خير علينا كلنا انشالله
اني صار لي زمان مداخلة بس قريت الصفحات السابقة من البيت القديم
ام سكاتي والله بالي يمج حبيبتي الله يشفيلج سكاتي وابو سكاتي انشالله
ام هنودة الظاهر المدرسة ماخذة وقتج لان اشوف عتاب البنات دائما
ام سراوي شلونج عيوني سراوي شلونها
ام سيف حبيبتي تسلمين على السؤال عني دائما
ام محمد همزين هسا عطلة نص السنة على الاقل ترتاحين شوية
شلونج ويا الحمل الله يتمم عليج بالسلامة انشالله انتي والعزيزة ام بينات
ام وسيم مشتاقين والله
بعد اذا نسيت وحدة اعذروني
ها بعد بحيرة القمر شيخلصني منها
سارة مبروك عليكم البيت الجديد الله يجعله بيت السعادة والعافية
تحياتي للجميع

اكيد تفاجاتو بي
اني دخلت مرة وسلمت بس ماستمريت بالدخول
والسبب والله ظروفي صعبة جدا
المهم ترا اني حاولت اغير اسمي وماعرفت منين لان كلش ضايجة منه
هسا نجي للبطاقة الشخصية
اني متزوجة وعمري اربعين سنة
يعني راح اصير امكم او اختكم الكبيرة اذا تقبلون وماتزعلون
يمكن بس ام وسيم بكدي او اكبر مني
ارجو ان محد يزعل مني
بس بصراحة احس انه اني اعرفكم من زمان ومتابعة لكل البيوت او على الاقل البيوت الخيرة اللي فتحتوها
ولذلك اعرفكم كلكم اذا مو الاغلبية على الاقل
راح تكولون هي مداخلة ومع ذلك فتحت البيت
والله صحيح بس احنا اخوات واعتبروني اختكم الكبيرة
اني متزوجة من تقريبا خمس سنوات
وعندي بنية والثانية بالطريق
بنتي عمرها سنة تقريبا يمكن شهر وشوية فوك السنة
ومغتربة بنيوزيلندا مع زوجي
وبعد سنتين زوجي يخلص دراسة ونرجع للعراق انشالله
بي احتمال ارجع اني والبنات اقصد بعد الولادة للعراق
بعد هذا هو منريد غربة تعبنا
بنتي ولدتها هنا والثانية انشالله هم تجي هنا
بعد شتريدون تعرفون؟؟؟
ام مسرة اذا عندة اي سؤال اني حاضرة
يكولون التحقيق يمج ههههه
يالله وينكم شو ماكو

غسوقة احس اني اعرفج اكثر من البقية لان رديت على موضوعي بركن الحمل
الله يحفظلك اولادك يارب

بس دلوني منين يتغير الاسم لان صدك صدك ضايجة منه
بس ترا زوجي هو اللي سجلني بهالاسم من صرت حامل وشافني ابجي ضحك علي وكال خايفة وظلومة يقصد من اهله لان ميريدون بنات واني عندي بنية والثانية بالطريق
واني هم مافرقت وياية لان كنت كلش ضايجة وكلته ميخالف
بي هسا ضايجة منه وحاولت اغيره اشوماقبل التغيير فياريت تعلموني شلون اغيره

هلا بيج اختي ريحانة
اني متابعة اخبارج بالبيت العراقي والله يكون بعونكم على الغربة
الله يوفقكم بدراستكم يارب وترجعون بالسلامة انشالله

مشكور اختي على الترحيب انشالله نتواصل بهالبيت
بس ماادري توقيتنا احنا ووياكم نفس الشي لو مختلف؟؟؟اليوم اسال زوجي واتاكد
على العموم اخواتي الشهر اللي فات كله قضيته فلونزا اني وبنتي وزوجي والحمد لله اني وزوجي زينين هسا بس بنتي خطية تروح وتجي النشلة والكحة وانطيناها مضاد حيوي هنوب صارت اسهال العفو
وفوك القهر البارحة الصبح دا اكوي ملابس زوجي قبل منطلع للدوام ولزمت الاوتي وانجوت سودة علي باصبعها
والعصر استلمناها من الحضانة ماساأأأأأأأة متعاركة ويا الجهال ماادري شعجب وعاضيها من ايدها ومن كتفها وكلها زركة من فوك ليجوا تخيلو؟؟؟؟
والله تقهر وشوية ابجي يم باب الحضانة وزوجي مسكت ورزلهم والمسؤولة تكله سوري كوان كوان
اسفة اصدقاء قصدها على الاطفال بالحضانة شوية واصير ارهابية وافجر بيهم حزام ناسف الا شوية هههههههه
والله طكيت من القهر هي منشولة وتكح ومريضة واصبعها محروك وانوب عاصيها لوما عيب كان دخلت كتلت اللي عظها هالكد منقهرت عليها وطول الليل اني وابوها ماعدنا شغل غير نسكت بيها ونرضيها لان متقبل تاكل ولا ترضع
ونسيت اكول الشهر اللي فات كله مراتجعات ويا الاطباء ولا تسالوني ليش لان لسا مامستوعبة الموضوع خلي اتاكد واخبركم انشالله بس دعواتكم الي لان كلش متضايقة والله

ههههه والله ضحكتيني على بنتج بس والله اني من يمي انقهرت عليها مسكينة
والله يفرج عنكم ويشفيكم ويعافيكم يارب

يمعودين وينكم شو ماكو لا حس ولا نفس؟؟؟؟
يعني ولا وحدة دخلت لحد الان ماعدا ريحانة ؟؟؟
شوكت تدخلون لان مامعقولة ابقى مكابلة المنتدى ولا شغلة ولا عملة بلكي تطلعون؟؟؟
بس حبيت ارحب بيكم باعتبتر اني اللي فتحت البيت
بس لا زعلانين لان اني اللي فتحت البيت؟؟؟؟
لا عفية لا تزعلون واذا تريدون عوفوه وافتحو غيره واني اول وحدة تدخل وتهني وتبارك ترا اني عندي روح رياضية ولا يهمكم ههه
بس بينو عفية لا هيج تسووها وياية من اول مرة

الظاهر زعلتو
والحق وياكم لازم اول مرة نتعرف واستاذن وبعدين افتح البيت ....هم صدك
بس والله حسيت اعرفكم من زمان من كثر مااتابع وياكم واعرف كل اخباركم
ولذلك كلت خلي التعارف يكون ببيت جديد مفاجاة يعني فقط لا غير!!!
على العموم ماعندي مانع نتعرف من جديد واي وحدة منكم تتفضل تفتح البيت الجديد ومثل ماكلت اول وحدة اني ادخل بس ترا اني هسا راح اطلع ويا زوجي وبنتي للسوق ويجوز نتاخر فما ادري الحك ادخل اليوم لو لا
على العموم باجر انشالله مابقاله شي
سلامي الحار وتحياتي للجميع واعتذاري من الجميع انتو اخواتي الصغار ترا واكيد احبكم كلكم