الأعضاء الكرام,
نقدم لكم اليوم رحلة الاخت بنت مفيد الى رم فالعقبه ثم البتراءوالتي شاركت معنا بها في المسابقة الصيفية



قررت انا وزوجي نطلع رحلة 3 ايام مع عمي وزوجته للراحه من مشاغل الحياه وكان طول عمري نفسي اشوف البتراء مع اني من سكان الاردن بس متلي متايل المهم قررنا نزور اول شي رم وبعدين العقبه وبالترويحه البتراء زي ما خطط زوجي كونه بشتغل بالسياحه وبعرف تنظيم الرحلات السياحيه المهم:

وصلنا على رم ومااااا اجمل مدخله عاملينه زي القلعه نظافة المكان لاتوصف والحمامات العامه هناك نفس فنادق الخمس نجوم انا اعجبني الترتيب والنظافه جدااا طبعا دفعنا للدخوليه دينار للشخص الواحد::تدفع عند البوابه::

نصيحه::جيبو معكم مي لانه بوسط الصحراء ما في دكاكين ولاشي في عين مي بس الافضل تجيبو مي معكم ::




طبعا لحتى نفوت جوا الصحرا استأجرنا جيب واجارها 27 دينار ساعه كامله مع مرشد وهو بدوي الاصل من اهل الصحراء يعني لا تخافو ما راح اضيعو جواها::

كانت اجمممممل محطه هي جبال رم وبالزات منطقه بيحكولها الخزعلي
عنجد لاول مره بحياتي بسمع الهدوووووووووووووء ولا صوت ولا نفس وكانه القيامه قامت من شدة الهدوء حتى الارسال للموبايل راح::
شعرت هناك وانا بوسط جمال وروعة الجبال انه الناس كانو عايشين داخل لوحه فنيه لانه مجرد النظر الى الجبال كانك بتنظري الى لوحه رسمها فنانه والله بدون مبالغه واكيد اكبر فنان ما راح يرسم او يبدع كهاللوحات هاي زمان كانو بختاروا اجمل الاماكن ويسكونها اما احنا شعرت انه حياتنا زي يلي عايشين داخل قفص فئران التجارب(عفوا على التعبير) وبندور داخل حلقه مفرغه الى المالا نهايه وبلا فايده وما بنجني الا التعب::



شوفوا جمال جبال رم دعوه لكل من لم يزرها وعلى مسؤليتي ما راح تندموا::
من هون من اعلى الجبل في عين مي :: وهي بسموها عين لورانس ولورانس وهي نبذه صغيره عنه وهو ظهر ايام الثورة العربيه الكبرى
هذا الرجل من الشخصيات التي أبرزها الاستعمار وأحاطها بهالة ضخمة من البطولة : شخصية الضابط لورنس الذي وصف بأنه (ملك العرب غير المتوج)هذا لورنس الذي كانت الصحف تكتب عنه وتصوره على أنه منقذ العرب وملك العرب غير المتوج والذي جعلوه صانع الثورة العربية وقائدها الفعلي وقد قام لورناس بخداع العرب وعايشهم في خيامهم (إبان الحرب العالمية الأولى) على هدف واضح هو إسقاط الدولة العثمانية والإيقاع بين العرب والترك ودفع العرب إلى الاقتتال من أجل استيلاء فرنسا وبريطانيا على أراضي فلسطين وسوريا ولبنان.



شوفو ماسورة المي الممدوده من اعلى الجبل وهاي المي بتمد بدو صحراء رم بيجو وبعبو منها وبشربو::







لاحظت تحليق غربان فوق الجبال وسألت زوجي عن سببهم حكالي انهم بيجو مع المراكب الراسيه بالعقبه من بلدان اخرى وطبعا الحكومه الاردنيه حاولت تحد منهم ::


بعد ما شفنا عين مية لورنس العرب رجعنا وركبنا الجيب ورحنا لمنطقة الخزعلي وما كنت اعرف اني موعوده مع لوحة فنيه لازالت لحد الان محفوره بمخيلتي ::لون التراب والصخر وبرودة المكان وغيره: ومن هالمكان بالزات عشق جبال رم::


ازا بتنتبهو على الطرف اليمين في درج عاملة وزارة السياحه لحتى الواحد يطلع ويفوت بين الجبال جوا المكان خييااااااااااااال برودة وهدوء وخيال بجننننن::


هون من جوا واخر النفق هاد في وديان وهون بيجيو يلي بحبو تسلق الجبال اما احنا هربنا لانه معي ولادي بلاش يوقعوووو:


شجرتين بسفح الجبل طالعين لوحدهم كانهم شجر تمر وهاي الصوره مقربه لاقصى حد لانه الجبل عالي كتير لكن منظرهم كان كتيير حلو::

شجره شاقه الصخر منظرها كتير حلو (هاي الطاوله نسيت اشيلها بس هاي بستعملوها اوقات الهاي سيزن وقت السياحه بيعملو بوفيه للسياح بوسط الصحراء مع سهره على الشموع::

رسومات قديمه محفوره بجبال رم::

نظره فوقيه لداخل شق جبلي برم وهناك بوسط الصحراء لو تفوتو هون بتشوفو البراد وكانه فيه مكيف::كوندشن::



هاد المكان اعدنا فيه شوي ويا عيني على البراد وكانه في مكيف سبحان الله بعز الصحراء والجو من الجبال والمي تحت الارض بااااااارد بس هون جنب الجبال بس تبعدو شوي الجو حاااااار طبعا اخدت اكم حجر من صحراء رم للذكرى والحجار محتفظه فيهم بفازا بجننووووو::



وودعنا رم الغاليه متجهين الى العقبه اخدت الطريق معنا من رم للعقبه تقريبا ساعه ونصف ومن عمان لرم ساعتين وربع تقريبا وهناك بالعقبه بعد ما وصلنا رحنا نشوف معرض الاحياء البحريه ومنظمته الجامعه الاردنيه كتير منظم ومرتب عن كل الاحياء الموجوده بالعقبه شكلهم حلووووو حتى الحوت بس الحوت محنط::ودخوله للشخص الواحد نصف دينار::



و بعد الزياره روحنا لنرتاح و اخدنا شقه مفروشه وهي اوفر من الفندق لانه راح نستعملها فقط للنوم وسعر الشقق بالعقبه حسب البعد عن البلد بتتراوح من 16 الى 40 دينار باليوم احنا اخدنا الوسط 30 جنب السوق وبطل على البحر ::

ارتحنا واتعشينا ونمنا والصبح بدري رحنا على البحر على شاطىء بحكولو شاطىء السيماني مرتب ونظيف بس في واحد عقباوي (شخص من اهل العقبه) حكالنا لو تمشو شوي بتلاقو منطقه احلا من هون بس احنا عجبنا الشاطء واعدنا تحت مظله مجهزه من السياحه الاردنيه للسياح::



طبعا ممكن تستاجرو زورق زجاجي وتشوفو المرجان والسمك وشغلات بتجنن بس انا بخااااااااف كتيير من البحر ما رضيت وممكن تستاجرو زورق عادي واجاره بالساعه 15 دينار ::



وطبعا واحنا على الشط كان موعد وصول الزورق السريع يلي بودي على مصر ومجرد ما مر وكان رايح على المرسى يلي احنا جنبه ارتفع الموج وصار المنظر احلا واحلا بس ما صورته لانه كنت خايفه على ولادي كانو بالمي وقت الموج:



طبعا هناك لئينا مرجان بس زوجي حكالنا بسسرعه رجعوه محله بلاش نتغرم 10 الالف دينار لانه هاي من مقتنيات البلد وممنوع مرورها طبعا لانه في منطقة جمرك بالعقبه وانتي مغادره العقبه كونها منطقه حره فخفت كتير بس اخدت مرجونه زغنونه كتير واكم صدفه ومرئتهم واخدت حجار لاضيفهم لمجموعة حجاري::

اعدنا لتاني يوم بالعقبه وبيوم الترويحه للبيت رحنا للبتراااااااااء
برضو دفعنا دخوليه دينار للشخص الواحد ومشينا بالسيق الطويل مده طويله طوله كيلو ونص متر يعني 3 كيلو رايح جاي ريااااضه وفي ازا بتحبو خيول بس اجارها غالي لانهم اصحابها كل واحد بيعطي سعر على مزاجه وحلاتها تمشي وتشوفي وتحسي جبال البتراء بايدكم::

وعلى الطريق في عاملين مقاعد للاستراحه من طول السيق لكن الواحد ما بتعب لانه السيق خيالييييييييي وكمان لاحظت انه من وسط الصخر طالعين شجر تين على طول السيق كل شوي في شجره هناك وانا دفعني فضولي اكل حبه مع انه ما حد صايبه ولما اكلتها كانت زي العسل بتشهي بس خفت حسيت انها مليانه اروااح اهل البتراء عنجد خفت وصار زوجي يضحك علي ويحكيلي عادي البدو يلي هون بياكلو منه بس حسيته ما بدو اخاف لانه التين زي ما هو عليها غير يلي ناشف على الشجر ويلي واقع وبصراحه بليل صابتني حاله صحيت اصرخ ومذعوره حلمت حلم مخيييييف ما بدي اتزكره ولما صحيت على زوجي بحاول يصحيني حكيتله شفت ناس ناس كتار جايين ياخدوني ضحك علي وحكالي لانك اكلتيها وانتي خايفه للتينه هههههههههه بس انا ماسدئته



هنا على اليمين واليسار مجرى للماء كان ينزل من على الجبل من مياه الامطار وكمان لازالو لا يعرفون لحد الان من وين مصدر المي يلي كان يغذي المجريين هدول ولازال الامر من اسرار البتراء::








بعد مش طويل بالسيق فجئه بتشوفي احلاااااااااا منظر بحياتكم عنجد نظره غريبه بطل البتراء من شق ديق والها نظره مخيفه وحلوه وغريبه وما بعرف شو اوصفها واكتشفت انه كبييييييره زي عماره 15 طابق او اكترررررر؟؟؟:




صوره قرية الشوبك القديمه يلي هجوروها اهلها الان وسكونوا البيوت الحديثه ازا بدققو النظر على الشمال جنب الشارع بيوت من حجر::

اخر صوره اخدتها من السياره واحنا ماشيين للغروب::

عنجد كانت رحله حلوه لا تفوتوهااااااااااا

وين التعليقات على هالرحله الحلوه

؟؟؟؟

روعة .. الله يعطيكي العافية

مشكووووووووووورا مرا رووووووووعه ^^

يسلمووو ياعسل على الرحلة الرائعة والتصوير الأروع...

خاطري أروح بلاد الشام...من الأردن وسوريا ولبنان..وفلسطين إذا فرجها الله...

بس سبحان الله كل مافكرنا نروح..جانا ظرف يخرب السفرة!!!!!!

الموهم

اكلتها كانت زي العسل بتشهي بس خفت حسيت انها مليانه اروااح اهل البتراء

الله يسعدك يابنت مفيد

::.::

اخ منك يا بنت مفيد كل هذا من حبه تين ههههههههههههه
بس وينك يالله شو كان نفسي ازور البتراء رحت العقبه وياي ما احلاها بتجنن بس راح نص عمرك لانه ماركبتي وفتي جوا البحر احنا اخدنا قارب من نادي اليخوت الملكيه وحتى قعدت على مقدمه القارب وشو حاسه حالي طايره في السما هههههههههههه
بس في اشي حلو عجبني المنطاد اللي بكون في واحد راكب فيه وبيمشيه القارب يعني منطاد بنص البحر شكله كان حلو كثير
بس عنجد كانت رحلتك حلوه بشكل وخاصه البتراء اخ لو زرتها بس كل الحق على شركه تاجير السيارات وعدتا بسياره الصبح بدري بس جابوها الضهر والا كنا بدنا نعمل لفه على البتراء والمناطق المجاوره بس خيرها في غيرها
شوفي رحلتي
http://www.lakii.com/vb/showthread.p...E1%DA%DE%C8%C9