مرحبااا اذا احد راح تايلند ويعرف الاماكن يعمل دليل سياحي عن تايلند وعن الاماكن السياحية والسوق
الله يعطيكم العافية.....

حبيبتي انا رحت تايلند و مستعده الي معلومات تحتاجينها

تسلمين والله اريد معلومات عن الاسواق اللي في تايلند غير اللي مجود في المنتدى
الله يعطيج العافية.....

في هذا الموضوع راح اعرض لكم تفاصيل رحلتنا الرائعه الى تايلند أول شي احنا اربعه كبار و طفله و رحلتنا كانت من 1-7 سبتمبر 2005 على الخطوط الاماراتيه و بدأت من الدمام←دبي←بانكوك ←فوكيت←بانكوك←دبي←الدمام طيران الامارات كان ممتاز ومريح جدا
(( بانكوك ))
وصلنا بانكوك الظهر و خلصنا اجراءات الفيزا بسهوله من المطار و اخذنا سياره من المطار الى فندق (Davis Bangkok) وكنت حاجزه فيه ليلتين من الانترنت ب250 ريال في الليله في منطقة سكومفيت وكان فندق حلو بس صار لنا موقف طريف خلى الفندق احلى..
لما وصلنا وسوينا شيك ان قالولنا ان غرفه وحده بس جاهزه و الثانيه بتتاخر فرحنا الغرفه وحاولنا نفتح الباب بس انه طلع مقفول من داخل, قلنا يمكن ينظفون, دقينا الباب و فتح لنا واحد وهو لابس روب حمام(تخيلوا شكلنا)
و ابتسم لنا و فهمنا ان هذي غرفته, المهم راح زوجي لهم و هزأهم فتخيلوا شسووا!!!
اعتذروا وعطونا جناحين يهبلون, في كل واحد ساونا وجاكوزي و مكان للمساج و المكان يجنن
بعد ما ارتحنا قررنا نروح مطعم fish marketوكان قريب فرحنا مشي وكان مطعم رهيب مع ان الاكل فيه غالي (اغلى من مطاعمنا)
والمشي في شوارع بانكوك خطر و غير مريح والجو احسه ملوث و كئيب و خنقه بعد
بعدين ركبنا sky trainورحنا شارع العرب nana وكان شارع او حي بالأحرى مخزي ومقرف من قذارته والناس اللي فيه تفشل وحتى محل فريده علي اللي يمدحون فيه ما عندها سالفه
ثاني يوم رحنا mbk وكان سوق زحمه بس لقينا بعض الشغلات حلوه و في الليل رحنا مجمع Emborium صراحه مجمع راقي وفيه ماركات وبعدين رجعنا الفندق وجبنا ناس يسوون مساج في الجناح وريحنا عدل
ثالث يوم رحنا السوق العائم floating market و اماكن بيع منحوتات و صراحه استمتعنا بالرحله جدا
والعصر طرنا الى فوكيت
(( فوكيت ))
سافرنا لها عن طريق Thai Air وحجزنا التمشيات من مطار بانكوك الشخص ب137 دولار شامله 3رحلات مع وجبه و النقل من والى المطار من مكتب اسمه Team Tour
سكنا 5 ليالي في منتجع ماريوت وكانت شققه خياليه وطلع علينا رخيص لأن احنا رايحين عن طريق التايم شير (500 ريال الأسبوع) بس ان مكانه بعيد جدا عن كل شي
اول ما وصلنا استقبلونا بالورد و الكوكتيل وخلصوا الشيك ان بسرعه ووصلونا للشقه وهذا جدولنا في فوكيت
الأثنين صباحا:
جوله في فوكيت تاون, اعلى نقطه في فوكيت (مكان حلو) , مصنع الكازو, عرض الأفاعي (ما عندهم سالفه),نادي الرمايه(طلقنا نار), اكبر معرض مجوهرات في اسيا , وبعدين المنتجع
و العصر خذونا الى فانتازي الى الليل وبصراحه كانت ليله خياليه ورائعه جدا وطبعا مع العشاء في بوفيه فانتازي العظيم
]الثلاثاء:
رحلة سفاري و ركوب الفيل (روعه) وعرض الفيله, وبعدين جزيرة جيمس بوند وركوب القوارب والغداء في جزيرة المسلمين Floating Island وكان يوم ممتع جدا
الأربعاء:
استأجرنا سياره الى باتونج بيش وتغدينا في مطعم دبي (اكله لذيذ) وتسوقنا هناك وبصراحه لقينا فيه اشياء احلى من بانكوك بس ان الشباب الخليجيين هناك يسودون الوجه
الخميس:
رحله الى بي بي ايلاند اكثر من يستمتع فيها اللي يحب الغوص واذا كان ما يغوص احسن له ما يروح لأنها بعيده مره وفي الليل رحنا ال spa وسوينا مساج هديه من المنتجع
الجمعه:
فطرنا في الفندق (بوفيه رهييييييييب ) و الظهر طرنا الى بانكوك
بصفه عامه فوكيت كانت اكثر من رائعه و انصحكم فيها بس ان جوها رطب زياده في الفتره اللي رحنا فيها وهذا هو الشي الوحيد اللي نكد علي

يا سلام على الرحلة الجميلة يا ايتام والحمد لله انكم انبسطتوا برغم الرطوبة

بس يا شيخة حطي لنا كم صورة خلينا نشوف هالاماكن كيف صايرة بدل ما انا قاعدة اتخيل الحين :rolleys:

بس تسلم ايديكِ على التقرير الجميل ،، وان شاء الله تكوني استفدتي اختي الشيخة